Tibdil fil-klima
It-tibdil fil-klima jaffettwa lil kulħadd, inklużi l-banek ċentrali. Aħna fil-BĊE konxji sewwa ta’ dan il-fatt u aħna qed nikkontribwixxu – fi ħdan il-mandat tagħna – biex nindirizzaw din l-isfida globali.
L-isforzi tagħna huma ffokati fuq l-għoti ta’ appoġġ lill-parteċipanti tas-suq, il-leġiżlaturi u dawk li jfasslu l-istandards, għax jaħdmu biex jidentifikaw ir-riskji li jirriżultaw mit-tibdil fil-klima. Aħna nappoġġaw ukoll l-iżvilupp ta’ qafas ċar għall-indirizzar ta’ dawn ir-riskji.
Il-politika monetarja u t-tibdil fil-klima
“Il-BĊE, waqt li jaġixxi fil-mandat tiegħu, jista’ – u għandu – jappoġġa attivament it-tranżizzjoni għal ekonomija b’livell baxx ta’ karbonju, b’żewġ modi: l-ewwel, billi jgħin biex jiġu definiti r-regoli inkwistjoni u, it-tieni, billi jaġixxi kif xieraq, mingħajr preġudizzju għall-istabbiltà tal-prezzijiet”
Benoît Cœuré, Membru tal-Bord Eżekuttiv tal-BĊE
Il-BĊE jieħu azzjonijiet fi tliet oqsma ewlenin ta’ kompetenza
Stabbiltà finanzjarja
L-esperti dwar l-istabbiltà finanzjarja jkejlu u jivvalutaw ir-riskji għas-sistema finanzjarja bit-tibdil fil-klima. Il-konstatazzjonijiet tagħhom huma kkomunikati lill-pubbliku, lill-parteċipanti fis-suq u lil dawk li jfasslu l-politika.
Politika monetarja u l-operazzjonijiet tas-suq
Esperti fl-operazzjonijiet tas-suq jikkunsidraw is-sostenibbiltà meta jamministraw il-portafolli mhux monetarji tal-BĊE. Bħala parti mill-programmi ta’ xiri ta’ assi tal-BĊE, aħna investejna f’bonds ħodor. Dawn l-investimenti huma ristretti mill-ħtieġa li jiġu evitati distorsjonijiet bla bżonn tas-suq u jinżammu kundizzjonijiet ugwali.
Il-BĊE huwa membru tal-gruppi li ġejjin
In-Network for Greening the Financial System (NGFS)
Il-membri tal-NGFS jinkludu banek ċentrali u superviżuri finanzjarji mill-ħames kontinenti kollha. Huma jfittxu modi biex jappoġġaw tranżizzjoni bla xkiel lejn ekonomija b'livell baxx ta’ karbonju. Fis-17 ta’ April 2019 huma ppubblikaw l-ewwel rapport tagħhom b’rakkomandazzjonijiet dwar kif il-banek ċentrali u s-superviżuri jistgħu jrawmu sistema finanzjarja aktar ekoloġika.
It-Technical Expert Group on Sustainable Finance (TEG)
Bħala membru tat-TEG – grupp imwaqqaf mill-Kummissjoni Ewropea – il-BĊE jikkontribwixxi għall-iżvilupp ta’ tassonomija (jew sistema ta' klassifikazzjoni) li tiddefinixxi liema attivitajiet huma kkunsidrati ambjentalment sostenibbli (ħodor) jew ta’ ħsara (kannella). Tali sistema tgħin lill-investituri jidderieġu l-kapital tagħhom lejn investimenti sostenibbli, pereżempju permezz ta’ bonds ekoloġiċi.
Inizjattivi oħra
BĊE Aħdar
Qed naħdmu kontinwament biex innaqqsu l-impronta ekoloġika tal-BĊE. Jekk inti interessat/a tara x’irnexxielna niksbu sa issa, ara l-paġna tagħna fuq Protezzjoni ambjentali.
Ġimgħa ta’ Mobbiltà Ewropea
Il-BĊE jipparteċipa regolarment f’dan l-avveniment. Huwa jħeġġeġ lill-kollegi biex imorru għax-xogħol b’mod li jirrispetta l-ambjent kemm jista’ jkun.
Siegħa għad-Dinja
Il-BĊE jipparteċipa regolarment f’dan l-avveniment mill-2012. Bit-tifi tad-dwal fil-bini ewlieni tagħna, aħna rridu nqajmu kuxjenza dwar it-tibdil fil-klima.
Pubblikazzjonijiet rilevanti
- “Monetary policy and climate change”, diskors minn Benoît Cœuré, Berlin, 8 ta’ Novembru 2018
- “Climate Change and Central Banking”, diskors minn Yves Mersch, Frankfurt, 27 ta’ Novembru 2018
- “Central Bankers, Supervisors and climate-related risks”, diskors minn Sabine Lautenschläger, Pariġi, 17 ta’ April 2019