European Central Bank - eurosystem
European Central Bank - eurosystem
Search
Għażliet tat-Tfixxija
Paġna ewlenija Midja Spjegazzjonijiet Riċerka u Pubblikazzjonijiet Statistika Politika Monetarja L-€uro Ħlasijiet u Swieq Karrieri
Suġġerimenti
Issortja skont

Mistoqsijiet frekwenti (FAQs) fuq l-euro diġitali

Aġġornat fit-30 ta’ Ottubru 2025

L-għan u l-benefiċċji tal-euro diġitali

Implimentazzjoni u funzjonalità

Il-progress u l-partijiet ikkonċernati

Impatt u kunsiderazzjonijiet

M1. Għaliex l-Ewropa għandha bżonn ta’ euro diġitali?

F’dinja fejn il-pagamenti diġitali qed isiru n-norma b’mod rapidu, l-użu tal-flus kontanti qed jonqos u l-bidla lejn ix-xiri online qed taċċellera. L-euro diġitali jkun forma diġitali ta’ flus kontanti, li jagħti lill-konsumaturi aċċess għall-flus tal-bank ċentrali f’forma diġitali, u b’hekk jikkomplementa l-karti tal-flus u l-muniti.

L-euro diġitali jagħmel il-ħajja tan-nies aktar faċli billi jipprovdi xi ħaġa li bħalissa ma teżistix: mezz diġitali ta’ ħlas aċċettat b’mod universali fiż-żona tal-euro kollha, għal ħlasijiet fi ħwienet, online jew minn persuna għal oħra. Bħall-flus kontanti, l-euro diġitali jkun aċċessibbli, bla ħlas biex jintuża meta jsiru jew meta jiġu riċevuti pagamenti, u jkollu status ta’ valuta legali.

Barra minn hekk, l-euro diġitali jippreserva s-sovranità monetarja taż-żona tal-euro billi jagħti spinta lill-effiċjenza tal-ekosistema Ewropea tal-pagamenti kollha kemm hi, irawwem l-innovazzjoni u jżid ir-reżiljenza tagħha għall-attakki ċibernetiċi u t-tfixkil tekniku.

Aktar informazzjoni dwar għaliex għandna bżonn tal-euro diġitali.

M2. Kif jista’ l-euro diġitali jagħti spinta lill-awtonomija strateġika tal-Ewropa?

L-euro diġitali joffri soluzzjoni ta’ pagament pan-Ewropea, disponibbli fiż-żona tal-euro kollha, taħt il-governanza Ewropea u operata minn fornituri Ewropej.

Il-pagamenti diġitali fiż-żona tal-euro għadhom frammentati, u jvarjaw skont il-pajjiż u skont il-każ tal-użu. Aktar minn nofs is-swieq nazzjonali kollha fiż-żona tal-euro ma għandhomx soluzzjonijiet nazzjonali ta’ pagament diġitali għall-pagamenti fil-ħwienet, u dawk li jeżistu prinċipalment ikopru biss is-swieq nazzjonali u każijiet speċifiċi ta’ użu. Dan ifisser li l-konsumaturi jridu jibbażaw fuq għadd żgħir ta’ kumpaniji mhux Ewropej li jiddominaw is-suq. L-euro diġitali jgħin biex titnaqqas id-dipendenza tal-Ewropa fuq fornituri ta’ servizzi ta’ pagament mhux Ewropej, u joffri lin-nies l-għażla li jużaw soluzzjonijiet Ewropej.

Permezz ta’ standards miftuħa u billi tiġi pprovduta infrastruttura pubblika għall-pagamenti diġitali, l-euro diġitali jista’ jippermetti lill-fornituri jespandu faċilment għal soluzzjonijiet pan-Ewropej, u b’hekk ix-xenarju Ewropew tal-pagamenti jsir aktar kompetittiv u innovattiv.

B’mod ġenerali, l-euro diġitali jista’ jibdel lill-Ewropa f’mexxej globali fil-finanzi diġitali, fejn l-innovazzjoni sservi l-ġid pubbliku.

M3. Għaliex in-nies trid tuża l-euro diġitali?

L-euro diġitali jkun soluzzjoni ta’ pagament għal kull okkażjoni, għall-użu fi kwalunkwe ħin u kullimkien fiż-żona tal-euro – bħall-flus kontanti, iżda lest għall-era diġitali. Ikun mezz ta’ ħlas diġitali aċċettat universalment li l-konsumaturi jkunu jistgħu jużaw mingħajr ħlas fil-ħwienet, online jew minn persuna għal oħra. Jagħti lin-nies l-għażla li jħallsu b’mod diġitali, filwaqt li xorta jużaw mezz pubbliku ta’ ħlas. U jkun disponibbli kemm online kif ukoll offline.

L-euro diġitali jkun imfassal biex jipprovdi l-ogħla livell ta’ sigurtà u privatezza, f’konformità mal-istandards rigorużi tal-Unjoni Ewropea li għandha l-aktar liġijiet stretti dwar is-sigurtà u l-privatezza fid-dinja.

L-Eurosistema ma tkunx tista’ tidentifika lin-nies abbażi tal-ħlasijiet tagħhom. Barra minn hekk, id-dettalji ta’ tranżazzjonijiet personali minn ħlasijiet offline bl-euro diġitali jkunu magħrufa biss lil min iħallas u lil min jirċievi l-ħlas.

L-euro diġitali jkun sikur u, bħala ġid pubbliku, jiggarantixxi aċċess għall-konsumaturi kollha, irrispettivament minn fejn jgħixu jew mil-livell ta’ ħiliet diġitali jew finanzjarji tagħhom. L-euro diġitali jakkomoda l-ħtiġijiet tal-persuni b’diżabilità u ta’ dawk mingħajr aċċess għal kont bankarju, filwaqt li jiżgura li ħadd ma jitħalla jibqa’ lura.

Biex jiġi żgurat li l-euro diġitali jkun jista’ jintuża u jkun aċċessibbli fiż-żona tal-euro kollha, l-abbozz ta’ proposta leġiżlattiva ppreżentat mill-Kummissjoni Ewropea jipprevedi aċċettazzjoni obbligatorja minn kwalunkwe negozjant li jaċċetta pagamenti diġitali, u distribuzzjoni obbligatorja mill-banek lill-klijenti tagħhom.

M4. L-euro diġitali se jieħu post il-flus kontanti?

Le. L-euro diġitali jikkumplimenta l-flus kontanti, u mhux jieħu posthom. L-euro diġitali jkun jeżisti flimkien mal-flus kontanti b’reazzjoni għall-preferenza dejjem tikber tan-nies li jħallsu diġitalment b’mod rapidu u sigur. Il-flus kontanti jibqgħu jkunu valuta legali, u jibqgħu f’koeżistenza mal-euro diġitali u ma’ kwalunkwe mezz elettroniku privat ta’ pagament li qed jintuża bħalissa.

It-tfassil mill-ġdid tal-karti tal-flus tal-euro li għaddej bħalissa, b’karatteristiċi ta’ sigurtà mtejba, juri li l-BĊE huwa impenjat għall-futur tal-flus kontanti. Il-BĊE jilqa’ l-Pakkett tal-Munita Unika tal-Kummissjoni Ewropea, li jippreserva l-libertà tal-għażla tan-nies bejn il-flus kontanti u l-euro diġitali meta jħallsu bil-flus tal-bank ċentrali.

Sir af aktar dwar l-istrateġija tal-flus kontanti tal-Eurosistema u dwar il-proċess tad-disinn mill-ġdid tal-karti tal-flus fil-paġna tal-karti tal-flus futuri fil-websajt tal-BĊE.

M5. X’valur joffri l-euro diġitali lin-negozjanti?

L-euro diġitali jkun soluzzjoni pan-Ewropea li tippermetti lin-negozjanti jikkummerċjalizzaw il-prodotti u s-servizzi tagħhom lill-klijenti madwar l-Ewropa kollha b’esperjenza ta’ pagament bla xkiel u konsistenti. Dan inaqqas id-dipendenza fuq soluzzjonijiet ta’ pagament mhux Ewropej billi joffri alternattiva Ewropea, li tpoġġi lin-negozjanti f’pożizzjoni aktar b’saħħitha biex jinnegozjaw kundizzjonijiet ma’ fornituri ta’ soluzzjonijiet ta’ pagament, u b’hekk jitnaqqsu l-kostijiet tagħhom stess.

Fl-iżvilupp tal-euro diġitali, il-BĊE qed jaħdem mill-qrib man-negozjanti u mar-rappreżentanti tagħhom. Id-disinn tal-euro diġitali jqis dak li n-negozjanti jsibu importanti, bħal integrazzjoni bla xkiel mas-sistemi ta’ checkout eżistenti, il-faċilità tal-użu u r-reżiljenza tal-pagamenti. L-euro diġitali jippermetti wkoll lin-negozjanti jirċievu pagamenti istantanjament mingħajr kostijiet addizzjonali, anke mingħajr konnessjoni tal-internet.

Sir af aktar dwar l-involviment tagħna man-negozjanti fl-inklużjoni tal-euro diġitali fir-rapport dwar l-ekosistema tal-pagamenti u r-riċerka tal-utenti tagħna ma’ negozjanti żgħar.

M6. X’valur joffri l-euro diġitali lill-fornituri ta’ servizzi ta’ pagament?

Fornituri ta’ servizzi ta’ pagament (PSP, payment service providers) taħt superviżjoni, bħall-banek, ikollhom rwol ewlieni fid-distribuzzjoni tal-euro diġitali. Dawn jaġixxu bħala l-punt ewlieni ta’ kuntatt għall-individwi, in-negozjanti u n-negozji għall-kwistjonijiet diġitali kollha relatati mal-euro u jwettqu s-servizzi kollha tal-utenti finali.

L-euro diġitali jista’ jipprovdi wkoll opportunitajiet ta’ negozju addizzjonali għall-PSPs, u jagħtihom firxa immedjata fiż-żona tal-euro kollha.

Il-pjattaforma tal-innovazzjoni tal-BĊE wriet il-potenzjal tal-euro diġitali li jgħaqqad is-suq Ewropew tal-pagamenti u li jiftaħ mudelli ta’ negozju ġodda permezz ta’ standards armonizzati u li jappoġġa żviluppi teknoloġiċi futuri. Il-BĊE qed juża s-sejbiet tal-pjattaforma tal-innovazzjoni biex jinforma l-iżvilupp ulterjuri tal-euro diġitali.

Għalhekk, l-euro diġitali jista’ jservi bħala pjattaforma għall-PSPs biex jiżviluppaw servizzi b’valur miżjud fl-offerta tagħhom (eż. pagamenti kundizzjonali jew programmi ta’ lealtà).

Barra minn hekk, il-mudell ta’ kumpens tal-euro diġitali, kif previst bħalissa fl-abbozz ta’ proposta leġiżlattiva tal-Kummissjoni Ewropea, jipprovdi lill-PSPs b’inċentivi ekonomiċi komparabbli ma’ mezzi ta’ pagament diġitali oħrajn.

Sir af aktar dwar l-involviment tagħna mal-PSPs fl-inklużjoni tal-euro diġitali fir-rapport dwar l-ekosistema tal-pagamenti.

M7. Kif se jaħdem l-euro diġitali?

L-euro diġitali għandu jippermetti lin-nies jagħmlu ħlasijiet istantanji siguri fil-ħwienet fiżiċi u f’dawk online u bejn l-individwi, irrispettivament mill-pajjiż taż-żona tal-euro li jkunu jinsabu fih jew minn liema fornitur tas-servizz ta’ ħlas jużaw.

L-ewwel pass ikun li tistabbilixxi l-kartiera tal-euro diġitali tiegħek permezz tal-bank tiegħek, uffiċċju postali jew fornitur ieħor ta’ servizzi ta’ pagament.

Ladarba tkun ħloqt il-kartiera tal-euro diġitali tiegħek, tkun tista’ tpoġġi l-flus fiha permezz ta’ kont bankarju llinkjat jew billi tiddepożita l-flus kontanti. Imbagħad tkun tista’ tagħmel pagamenti bl-użu tal-kartiera tal-euro diġitali, pereżempju permezz tal-mowbajl tiegħek jew ta’ smart card.

Il-ħlasijiet bl-euro diġitali dejjem ikunu sikuri u immedjati — kemm jekk ikunu fi ħwienet fiżiċi, fi ħwienet online jew bejn in-nies.

L-euro diġitali għandu joffri funzjonalitajiet kemm online kif ukoll offline, li jfisser li tkun tista’ tużah anki meta jkollok sinjal tan-network batut jew ma jkollokx sinjal. Barra minn hekk, id-dettalji ta’ tranżazzjonijiet personali ta’ ħlasijiet offline bl-euro diġitali jkunu magħrufin biss minn min iħallas u minn min jirċievi l-ħlas, b’hekk jipprovdi livell ta’ privatezza simili għal dak tal-flus kontanti.

Aktar informazzjoni dwar kif se jaħdem l-euro diġitali.

M8. Min ikun jista’ juża l-euro diġitali?

Kif iddikjarat fil-proposta leġiżlattiva ppreżentata mill-Kummissjoni Ewropea, l-euro diġitali jkun disponibbli għan-nies, għan-negozji u għall-entitajiet pubbliċi li jirrisjedu jew li huma stabbiliti fi Stat Membru taż-żona tal-euro fuq bażi temporanja jew permanenti.

Persuni li jivvjaġġaw lejn iż-żona tal-euro għal skopijiet personali jew professjonali jista’ jkollhom ukoll aċċess għall-euro diġitali.

Barra minn hekk, in-nies, in-negozji u l-entitajiet pubbliċi li huma residenti jew stabbiliti barra ż-żona tal-euro jistgħu jaċċessaw l-euro diġitali billi jiftħu kontijiet tal-euro diġitali ma’ fornituri tas-servizzi ta’ ħlas stabbiliti jew li joperaw f’pajjiż li huwa membru taż-Żona Ekonomika Ewropea jew f’pajjiż terz, soġġett għal ftehim konkluż minn qabel bejn l-UE u l-pajjiż terz konċernat, u/jew arranġamenti konklużi bejn il-Bank Ċentrali Ewropew u l-banek ċentrali nazzjonali tal-Istat Membru mhux taż-żona tal-euro jew pajjiżi terz.

M9. Kemm ikun privat l-euro diġitali?

Il-privatezza hija waħda mill-aktar karatteristiċi importanti tad-disinn tal-euro diġitali.

L-euro diġitali huwa mfassal biex ikun jista’ jiffunzjona offline b’mod li joffri lill-utenti livell ta’ privatezza simili għall-flus kontanti, kemm biex jibagħtu flus lil persuni oħra kif ukoll biex isiru pagamenti fil-ħwienet. Meta jħallsu offline, il-pagatur u l-benefiċjarju biss ikunu jafu d-dettalji tat-tranżazzjoni personali tal-pagamenti li jkunu saru. Il-kontrolli kontra l-ħasil tal-flus jitwettqu mill-fornitur tas-servizzi ta’ pagament (PSP) distributur matul il-proċess ta’ finanzjament u ta’ definanzjament, bħalma huwa l-każ bil-ġbid ta’ flus u bid-depożiti llum.

Fil-każ ta’ tranżazzjonijiet online, l-Eurosistema ma tidentifikax l-utenti li jagħmlu jew li jirċievu pagamenti, u b’hekk tipproteġi d-data personali tagħhom, iżda l-PSPs ikunu jistgħu jidentifikaw utenti għall-fini ta’ konformità mar-regoli kontra l-ħasil tal-flus.

Għalhekk, kemm online kif ukoll offline, l-Eurosistema ma tkunx tista’ torbot direttament it-tranżazzjonijiet bl-euro diġitali ma’ individwi speċifiċi.

L-euro diġitali jkun regolat minn regolamenti tal-UE mfassla biex jibbilanċjaw il-privatezza mas-sigurtà. Dan l-approċċ se jżomm protezzjonijiet robusti kontra attivitajiet illeċiti filwaqt li jissalvagwarda l-privatezza individwali.

Sir af aktar dwar l-euro diġitali u l-privatezza.

M10. Il-BĊE kif jiżgura li l-euro diġitali jkun inklużiv u aċċessibbli?

L-euro diġitali jkun assi pubbliku, bħall-karti tal-flus u l-muniti llum, iżda f’forma diġitali. Il-BĊE qed ifassal l-euro diġitali u l-app tal-euro diġitali bl-inklużjoni bħala prinċipju gwida biex jiżgura li l-utenti jkunu jistgħu jagħmlu pagamenti fiċ-ċirkostanzi kollha. L-app tal-euro diġitali tikkonforma mal-Att Ewropew dwar l-Aċċessibbiltà b’enfasi fuq l-aċċessibbiltà konjittiva biex jiġi żgurat li kulħadd ikun jista’ jitgħallem malajr kif jużaha.

B’informazzjoni mir-riċerka tal-utenti, kif ukoll mill-interazzjonijiet mas-soċjetà ċivili u mal-organizzazzjonijiet tal-promozzjoni tal-konsumatur, id-disinn tal-euro diġitali jħaddan il-ħtiġijiet tal-konsumaturi vulnerabbli. L-organizzazzjonijiet enfasizzaw l-importanza ta’ soluzzjoni aċċessibbli b’mod universali, disinn intuwittiv u appoġġ wiċċ imb wiċċ. L-aċċess liberu għal servizzi bażiċi tal-euro diġitali jkun disponibbli wkoll għal persuni mingħajr kont bankarju, u b’hekk jitnaqqas id-distakk fl-esklużjoni diġitali li jiffaċċjaw individwi mingħajr indirizz fiss jew benefiċjarji ta’ protezzjoni internazzjonali.

Taħt l-abbozz ta’ leġiżlazzjoni ppreżentat mill-Kummissjoni Ewropea, il-banek li jiddistribwixxu l-euro diġitali jkunu meħtieġa jipprovdu servizzi bażiċi ta’ pagament bl-euro diġitali bla ħlas meta jintalbu mill-klijenti tagħhom.

L-euro diġitali jkun imfassal biex jakkomoda l-ħtiġijiet ta’ kulħadd, u ma jħalli lil ħadd jibqa’ lura.

M11. Il-BĊE kif jiżgura li l-ħlasijiet bl-euro diġitali jaħdmu bl-istess mod fiż-żona tal-euro kollha?

Il-fornituri ta’ servizzi ta’ pagament taħt superviżjoni (PSPs), bħall-banek taż-żona tal-euro, ikunu responsabbli għad-distribuzzjoni tal-euro diġitali. Sabiex jiġi żgurat li l-iskema tal-euro diġitali tiġi implimentata bl-istess mod fiż-żona tal-euro kollha, l-Eurosistema qed tiżviluppa ġabra ta’ regoli dwar l-iskema tal-euro diġitali fi proċess kollaborattiv u iterattiv mal-parteċipanti fis-suq. Il-ġabra ta’ regoli tistabbilixxi sett uniku ta’ regoli, standards u proċeduri biex jiġu żgurati servizzi bażiċi konsistenti tal-euro diġitali fiż-żona tal-euro kollha, li jipprovdu esperjenza uniformi għall-utenti irrispettivament mill-Istat Membru li jkunu fih jew mill-PSP involut – kif inhu l-każ bil-flus kontanti llum.

M12. L-euro diġitali jkun munita alternattiva fl-Eurosistema?

Le. Bl-istess mod kif il-karti tal-flus u l-muniti mhumiex muniti alternattivi, iżda pjuttost forom differenti tal-istess munita, l-euro diġitali jkun biss mod ieħor kif wieħed iħallas bl-euro. L-euro diġitali jakkomoda l-preferenza dejjem tikber tan-nies u tad-ditti li jħallsu b’mod diġitali.

Sir af aktar dwar il-preferenzi ta’ pagament tan-nies fl-istudju dwar l-attitudnijiet ta’ pagament tal-konsumaturi fiż-żona tal-euro (SPACE).

M13. X’se tkun ir-rabta bejn il-ħlasijiet immedjati u l-euro diġitali?

Illum, meta l-konsumaturi jagħmlu pagamenti mingħajr flus kontanti fil-ħwienet, in-negozjanti ma jirċevux il-flus immedjatament. L-euro diġitali jibdel dan kollu — il-ħlasijiet kollha diġitali f’euro jkunu immedjati.

Is-sett uniku ta’ regoli, standards u proċeduri li qed jiġu żviluppati għall-euro diġitali jkun ifisser li jistgħu jiġu żviluppati aktar soluzzjonijiet ta’ pagament istantanju biex jintlaħqu l-pajjiżi kollha taż-żona tal-euro. Dan inaqqas id-dipendenza tal-Ewropa fuq l-għadd żgħir ta’ kumpaniji privati mhux Ewropej li bħalissa jiddominaw is-settur tal-pagamenti.

M14. L-arkitettura teknika tal-euro diġitali kif taħdem, u tkun ibbażata fuq teknoloġija ta’ reġistru distribwit bħall-blockchain?

L-euro diġitali jopera fuq pjattaforma ta’ saldu ċentralizzata u l-Eurosistema tirreġistra u tivverifika s-saldi u l-investimenti kollha. Bħala obbligazzjonijiet diretti tal-Eurosistema, huwa importanti li l-euro diġitali fil-kartieri tan-nies ikun sikur sabiex tinżamm il-fiduċja, kemm fl-euro kif ukoll fl-Eurosistema.

L-euro diġitali mhuwiex ibbażat fuq it-teknoloġija ta’ reġistru distribwit (DLT), iżda jagħmel użu minn prinċipji ewlenin tad-disinn mid-DLT biex itejjeb ir-reżiljenza u l-effiċjenza u jtejjeb il-prestazzjoni u l-affidabbiltà ġenerali tas-sistema.

L-arkitettura teknika reżiljenti tal-euro diġitali tkun mibnija fuq standards stabbiliti. Struttura b’diversi reġjuni, li fiha, kull reġjun ikun mgħammar b’diversi servers, li tmur ferm lil hinn mill-mudelli standard ta’ ridondanza, se tiżgura l-kontinwità tas-servizz fiċ-ċirkostanzi kollha.

M15. Fejn jinsab il-proġett tal-euro diġitali bħalissa?

Il-proġett tal-euro diġitali miexi ’l quddiem. Il-fażi ta’ tħejjija, imnedija f’Novembru 2023 u konkluża f’Ottubru 2025, avvanzat l-iżvilupp tekniku u t-tagħlim permezz tal-esperimentazzjoni. Dan ix-xogħol bena fuq l-għażliet tad-disinn u r-rekwiżiti tekniċi definiti matul il-fażi ta’ investigazzjoni.

B’segwitu għall-fażijiet ta’ investigazzjoni u tħejjija, l-Eurosistema issa qed tagħmel aktar progress fil-ħidma teknika, qed tapprofondixxi l-involviment tas-suq u qed tkompli tappoġġa l-proċess leġiżlattiv. L-għan tagħna huwa li nkunu lesti għall-ewwel ħruġ potenzjali tal-euro diġitali matul l-2029, jekk nassumu li r-regolament meħtieġ dwar l-istabbiliment tal-euro diġitali jiġi adottat matul l-2026.

M16. Min hu involut fil-proġett tal-euro diġitali?

L-Eurosistema – li tinkludi l-BĊE u l-banek ċentrali nazzjonali taż-żona tal-euro – għandha l-għan li tiżgura li l-euro diġitali jissodisfa l-ħtiġijiet tal-utenti. Għal din ir-raġuni, l-Eurosistema tinvolvi ruħha regolarment ma’ dawk li jfasslu l-politika, mal-leġiżlaturi, mal-parteċipanti fis-suq, mal-organizzazzjonijiet tas-soċjetà ċivili u mal-membri tal-pubbliku, li jkunu l-utenti finali tal-euro diġitali.

Dan l-involviment iseħħ f’diversi kuntesti, bħall-Bord tal-Pagamenti bl-Imnut bl-Euro, li jlaqqa’ flimkien partijiet ikkonċernati mill-partijiet kollha tas-suq Ewropew tal-pagamenti bl-imnut, u l-Grupp ta’ Żvilupp tal-Ġabra ta’ Regoli, li jinkludi professjonisti anzjani mis-setturi pubbliċi u privati b’esperjenza fil-finanzi u l-pagamenti (ara l-M18).

Il-BĊE jinvolvi ruħu wkoll b’mod regolari ma’:

Il-BĊE jipparteċipa regolarment fil-laqgħat tal-Grupp tal-Euro mal-Ministri tal-Fnanzi tal-pajjiżi taż-żona tal-euro u jipprovdi aġġornamenti regolari dwar il-proġett tal-euro diġitali lill-Kumitat għall-Affarijiet Ekonomiċi u Monetarji tal-Parlament Ewropew.

Aqra aktar dwar il-governanza tal-proġetti u l-involviment tal-partijiet ikkonċernati.

M17. Kif jiġu involuti l-leġiżlaturi Ewropej fil-proċess?

Fit-28 ta’ Ġunju 2023, il-Kummissjoni Ewropea ppreżentat il-Pakkett tal-Munita Unika li fih proposti biex jiġi appoġġat l-użu tal-flus kontanti u biex jiġi stabbilit il-qafas għal euro diġitali possibbli. Il-BĊE jilqa’ l-fatt li l-proposta dwar l-euro diġitali hija akkumpanjata minn proposta biex jissaħħaħ ir-rwol tal-flus kontanti, peress li t-tnejn ikunu valuta legali u forom ta’ flus tal-bank ċentrali. L-għan tal-leġiżlazzjoni proposta huwa li jiġi żgurat li kwalunkwe euro diġitali futur jagħti lin-nies u lin-negozji l-għażla biex iħallsu diġitalment bl-użu ta’ forma ta’ flus pubbliċi aċċettata b’mod wiesa’, irħisa, sigura u reżiljenti kullimkien fiż-żona tal-euro.

Il-BĊE jinsab lest li jipprovdi appoġġ u input tekniku matul il-proċess leġiżlattiv, kif meħtieġ. L-Eurosistema se tagħmel l-aġġustamenti meħtieġa għad-disinn tal-euro diġitali li jistgħu jirriżultaw minn deliberazzjonijiet leġiżlattivi.

Il-Kunsill Governattiv tal-BĊE mhux se jieħu deċiżjoni dwar jekk joħroġx l-euro diġitali sakemm jiġi adottat ir-Regolament dwar l-istabbiliment tal-euro diġitali.

M18. Kif qed tiġi żviluppata l-ġabra ta’ regoli tal-iskema tal-euro diġitali?

L-Eurosistema qed tiżviluppa l-abbozz tal-ġabra ta’ regoli b’kollaborazzjoni mill-qrib mar-rappreżentanti tas-suq Ewropew tal-pagamenti bl-imnut permezz tal-Grupp għall-Iżvilupp tal-Ġabra ta’ Regoli (RDG, Rulebook Development Group).

L-RDG, li jikkonsisti minn rappreżentanti anzjani minn assoċjazzjonijiet Ewropej li jirrappreżentaw kemm in-naħa tal-provvista kif ukoll dik tad-domanda tas-suq Ewropew tal-pagamenti bl-imnut, qed jaħdem fuq il-bażi tal-għażliet tad-disinn tal-euro diġitali li diġà ġew approvati mill-Kunsill Governattiv tal-BĊE.

Inħolqu workstreams dedikati fi ħdan il-Grupp għall-Iżvilupp tal-Ġabra ta’ Regoli biex jaħdmu fuq taqsimiet tal-ġabra ta’ regoli li jeħtieġu ħila esperta speċifika.

F’Ġunju 2025 ġie ppreżentat abbozz interim rivedut tal-ġabra ta’ regoli tal-iskema tal-euro diġitali lill-RDG għal konsultazzjoni tas-suq. L-abbozz tal-ġabra ta’ regoli jibqa’ flessibbli biżżejjed biex jakkomoda kwalunkwe aġġustament futur li jirriżulta mit-test finali tar-Regolament dwar l-istabbiliment tal-euro diġitali, ladarba jiġi adottat.

Aktar informazzjoni dwar il-ġabra ta’ regoli tal-iskema tal-euro diġitali.

M19. L-euro diġitali jkun flus programmabbli?

Il-flus programmabbli huma forma diġitali ta’ flus użati għal skop predefinit, bħal vawċer, b’limitazzjonijiet dwar fejn, meta jew ma’ min jistgħu jużawhom.

Kif previst ukoll fl-abbozz ta’ proposta leġiżlattiva tal-Kummissjoni Ewropea, l-euro diġitali qatt ma jkun flus programmabbli, iżda jista’ jiffaċilita l-pagamenti kundizzjonali (pereżempju, jekk klijent jixtri xi ħaġa online u jagħżel l-għażla li jħallas mal-konsenja).

M20. In-nies ikollhom iħallsu biex jużaw l-euro diġitali?

Bħala ġid pubbliku, l-euro diġitali jkun bla ħlas għall-użu bażiku mill-utenti individwali.

Il-banek jew fornituri oħra ta’ servizzi ta’ pagament jistgħu joffru lill-klijenti tagħhom servizzi addizzjonali tal-euro diġitali mħallsa. Tali servizzi b’valur miżjud jistgħu jagħmlu l-euro diġitali saħansitra aktar attraenti għall-utenti, pereżempju biex jagħmlu pagamenti kundizzjonali. Dawn jistgħu jippermettu lill-klijenti jixtru online b’mod aktar sikur, bil-flus jiġu ttrasferiti biss meta l-konsenja tal-prodott tkun ġiet ikkonfermata, u b’hekk jitnaqqas ir-riskju ta’ frodi u jiġu ssimplifikati r-rifużjonijiet.

M21. L-inizjattivi ta’ pagament pan-Ewropej l-oħrajn kif jirrelataw mal-euro diġitali?

Il-BĊE jilqa’ l-inizjattivi tas-suq Ewropew li jmorru lil hinn mis-swieq domestiċi.

L-euro diġitali għandu jippermetti lill-iskemi domestiċi u reġjonali jespandu f’każijiet ta’ użu differenti u bejn il-fruntieri, filwaqt li jiffaċilita aċċettazzjoni aktar faċli, usa’ u aktar effiċjenti tas-soluzzjonijiet tas-settur privat Ewropew bis-saħħa tal-użu ta’ standards ta’ aċċettazzjoni armonizzati. Il-fornituri ta’ servizzi ta’ pagament Ewropej għandhom jibbenefikaw minn dawn l-opportunitajiet, primarjament permezz ta’ żieda fil-firxa ġeografika u jużaw każijiet li ma ġewx servuti qabel.

Id-disinn jipprevedi l-possibbiltà li jiġu integrati soluzzjonijiet privati permezz ta’, pereżempju, co-badging possibbli fuq kards fiżiċi u kartieri diġitali eżistenti. Fiż-żewġ każijiet, l-euro diġitali jkun il-“fall-back” li jippermetti firxa pan-Ewropea sħiħa filwaqt li jippreserva l-aċċess għas-suq għal skemi domestiċi jew reġjonali fejn dawn huma aċċettati.

M22. Il-fornituri ta’ servizzi ta’ pagament (PSPs, payment service providers) jiġu kkumpensati għad-distribuzzjoni tal-euro diġitali?

L-Eurosistema qed tipproponi mudell ta’ kumpens li joħloq inċentivi ekonomiċi ġusti għall-partijiet kollha involuti fl-ekosistema diġitali tal-euro. Għall-banek u PSPs oħra, il-mudell ta’ kumpens jindirizza l-kostijiet operazzjonali tad-distribuzzjoni tal-euro diġitali.

Kif inhu l-każ bħalissa b’sistemi oħra ta’ pagament, il-PSPs li jqassmu l-euro diġitali jkunu jistgħu jiċċarġjaw lin-negozjanti għal dawn is-servizzi. L-iffissar tal-prezzijiet għan-negozjanti u l-PSPs ikun soġġett għal limitu massimu, kif propost mill-Kummissjoni Ewropea fl-abbozz ta’ proposta leġiżlattiva tagħha.

Bħal fil-każ tal-produzzjoni u l-ħruġ tal-karti tal-flus, l-Eurosistema ġġarrab l-ispejjeż tal-istabbiliment ta’ skema u infrastruttura tal-euro diġitali. Barra minn hekk, l-Eurosistema jkollha l-għan li tnaqqas kemm jista’ jkun l-ispejjeż ta’ investiment addizzjonali għall-PSPs billi tuża mill-ġdid l-infrastrutturi eżistenti kemm jista’ jkun.

M23. L-euro diġitali joħloq theddida għall-istabbiltà finanzjarja billi jneħħi r-rwol tal-banek bħala intermedjarji?

Is-sistema finanzjarja tagħna — bis-sistema bankarja fiċ-ċentru tagħha — tiffunzjona tajjeb, u l-Eurosistema trid tippreserva r-rwol ewlieni tal-banek fl-iżgurar tal-għoti effiċjenti ta’ kreditu lill-ekonomija.

Il-BĊE għamel dawn l-għażliet ta’ disinn biex jimminimizza kwalunkwe theddida potenzjali li l-euro diġitali jista’ joħloq għas-sistema finanzjarja.

  • L-utenti jkunu jistgħu jżommu biss ammont limitat ta’ euro diġitali fl-kont tagħhom. Dan jipprevjeni l-ħruġ eċċessiv ta’ depożiti bankarji u jgħin biex tiġi ppreservata l-istabbiltà tas-sistema finanzjarja tagħna, anke fi żminijiet ta’ kriżi.
  • Billi jillinkjaw il-kartiera tal-euro diġital tagħhom ma’ kont bankarju, l-utenti jkunu jistgħu jagħmlu ħlasijiet ogħla mil-limitu taż-żamma u jkopru kwalunkwe nuqqas istantanjament, mingħajr ma jkollhom għalfejn jiffinanzjaw minn qabel il-kartiera tal-euro diġitali tagħhom (nassumu li jkollhom biżżejjed fondi disponibbli fil-kont assoċjat).
  • Bħal fil-każ tal-flus kontanti fil-kartiera tiegħek, ma jitħallas l-ebda imgħax fuq l-ammonti miżmumin tal-euro diġitali.

Il-BĊE ħejja analiżi teknika biex jistma l-effetti potenzjali ta’ diversi limiti ta’ parteċipazzjoni ipotetiċi, wara talba li ħarġet matul in-negozjati leġiżlattivi. Din l-analiżi kkonfermat li l-użu tal-euro diġitali għall-pagamenti ta’ kuljum ma jagħmilx ħsara lill-istabbiltà finanzjarja u li – minħabba l-limiti ta’ parteċipazzjoni ipotetiċi differenti sa EUR 3,000 għal kull persuna li l-koleġiżlaturi talbu li jiġu ttestjati – l-impatt tal-euro diġitali ma jagħmilx ħsara lill-istabbiltà finanzjarja fiż-żona tal-euro, anke f’xenarju ta’ kriżi improbabbli ħafna u estremament konservattiv.

M24. L-introduzzjoni tal-euro diġitali tagħmel il-ħlasijiet fl-Ewropa aktar vulnerabbli għal attakki ċibernetiċi?

Bħal fil-każ ta’ infrastrutturi diġitali oħrajn, l-euro diġitali jista’ jkun il-mira ta’ attakki ċibernetiċi. Biex jittaffa dan ir-riskju, id-disinn tal-euro diġitali juża teknoloġiji tal-ogħla livell ta’ żvilupp tekniku biex jinħoloq ambjent reżiljenti għaċ-ċibernetika u li jibqa’ validu fil-futur. Fit-tfassil tal-kontrolli taċ-ċibersigurtà, il-BĊE qed jagħmel użu minn prattiki mixhuda bi prova tal-Eurosistema minn infrastrutturi oħra tas-suq u ttestjar ippjanat regolari kontra attakki simulati.

M25. L-euro diġitali kif ikun differenti mill-istablecoins u mill-kriptoassi?

L-euro diġitali jkun flus tal-bank ċentrali, maħruġa u ggarantiti mill-Eurosistema, li tinkludi l-Bank Ċentrali Ewropew u l-banek ċentrali nazzjonali taż-żona tal-euro. Bħall-karti tal-flus u l-muniti tal-euro, din tkun valuta legali, li jfisser li kulħadd ikun jista’ jużaha għall-pagamenti. Bħala flus tal-bank ċentrali u ġid pubbliku, dan ikun stabbli u affidabbli – dejjem tkun tista’ sserraħ rasek li euro diġitali wieħed jiswa daqs euro wieħed.

Stablecoins huma maħluqa minn kumpaniji privati. Dawn mhumiex garantiti minn bank ċentrali jew minn awtorità pubblika. Il-valur tagħhom jiddependi fuq kemm il-kumpanija timmaniġġa tajjeb ir-riżervi u l-finanzi tagħha, u dan jista’ jiġi influwenzat minn fatturi barra mill-kontroll tagħhom. Dan ifisser li l-istabbiltà tagħhom mhijiex ċerta daqs dik tal-euro.

Kriptoassi bħal Bitcoin jew Ether huma differenti wkoll. Dawn mhumiex appoġġati minn xi istituzzjoni u ma għandhom l-ebda valur sottostanti. Il-prezzijiet tagħhom jistgħu jogħlew u jonqsu drastikament, u ma hemm l-ebda organizzazzjoni responsabbli fil-każ li jitilfu l-valur tagħhom.

Ara l-ispjegatur tagħna “X’inhi l-bitcoin?”.

M26. Kemm jiswa l-proġett tal-euro diġitali lill-Eurosistema?

L-investiment fl-euro diġitali huwa kruċjali biex jiġi żgurat li s-settur tal-munita u tal-pagamenti tagħna jibqa’ adattat għall-iskop tiegħu fl-era diġitali.

Xi wħud minn dawn il-komponenti tal-euro diġitali, bħas-saldu tal-pagamenti, jiġu żviluppati internament fi ħdan l-Eurosistema. Għal oħrajn, bħall-komponent tas-servizzi offline, stabbilixxejna ftehimiet qafas ma’ fornituri esterni. Il-ftehimiet qafas ma jinvolvu l-ebda pagament u jinkludu salvagwardji li jippermettu li l-kamp ta’ applikazzjoni jiġi aġġustat f’konformità mal-bidliet fil-leġiżlazzjoni.

Il-kostijiet totali tal-iżvilupp, li jinkludu kemm komponenti żviluppati esternament kif ukoll internament huma stmati li jammontaw għal EUR 1.3 biljun, filwaqt li l-kostijiet operatorji annwali huma pproġettati li jkunu madwar EUR 320 miljun. L-Eurosistema qed tkompli bit-tħejjijiet b’reazzjoni għas-sejħiet mill-mexxejja taż-żona tal-euro biex tkun lesta għall-ħruġ potenzjali mill-aktar fis possibbli. Madankollu, il-leġiżlazzjoni meħtieġa għadha ma ġietx adottata. Għalhekk, il-ħidma hija strutturata f’moduli li jippermettu skalar gradwali u jillimitaw l-impenji finanzjarji.

L-Eurosistema ġġarrab l-ispejjeż tal-istabbiliment tal-iskema u l-infrastruttura tal-euro diġitali, bħalma tagħmel għall-produzzjoni u l-ħruġ ta’ karti tal-flus tal-euro – li, bħall-euro diġitali, huma ġid pubbliku. Kif inhu l-każ tal-karti tal-flus tal-euro, dawn l-ispejjeż jiġu koperti mis-“seigniorage” (l-introjtu li l-BĊE jdaħħal billi joħroġ il-flus) anke jekk il-parteċipazzjonijiet tal-euro diġitali kienu żgħar meta mqabbla mal-karti tal- flus fiċ-ċirkolazzjoni. Il-BĊE huwa impenjat li jżomm il-kostijiet baxxi billi juża mill-ġdid kemm jista’ jkun l-infrastruttura eżistenti, filwaqt li xorta jipprovdi euro diġitali li jġib valur lill-konsumaturi u lin-negozjanti.

F’konformità man-natura tiegħu bħala ġid pubbliku, l-euro diġitali jkun bla ħlas għall-użu bażiku għall-konsumaturi u kosteffiċjenti għan-negozjanti Ewropej. L-Eurosistema ma titlob jew ma tibbenefika minn ebda tariffa fuq it-tranżazzjonijiet bl-euro diġitali.