KONFERENZA STAMPA

Christine Lagarde, President tal-BĊE,
Luis de Guindos, Viċi-President tal-BĊE

Frankfurt am Main, 19 ta’ Marzu 2026

Il-waranofsinhar it-tajjeb, il-Viċi-President u jien nilqgħukom għal din il-konferenza stampa.

Il-Kunsill Governattiv illum iddeċieda li jżomm it-tliet rati ewlenin tal-imgħax tal-BĊE mhux mibdula. Aħna ddeterminati li niżguraw li l-inflazzjoni tistabbilizza fil-mira tagħna ta’ 2 fil-mija fuq perjodu ta’ żmien medju. Il-gwerra fil-Lvant Nofsani għamlet il-prospettiva aktar inċerta b’mod sinifikanti, li toħloq riskji ta’ żieda tal-inflazzjoni u riskji ta’ tnaqqis tat-tkabbir ekonomiku. Se jkollha wkoll impatt materjali fuq l-inflazzjoni fil-perjodu fil-qrib permezz ta’ prezzijiet ogħla tal-enerġija. L-implikazzjonijiet tagħha fuq medda ta’ żmien medju se jiddependu kemm fuq l-intensità u d-durata tal-kunflitt kif ukoll fuq kif il-prezzijiet tal-enerġija se jaffettwaw il-prezzijiet tal-konsumaturi u l-ekonomija.

Ninsabu f’pożizzjoni tajba li ninnavigaw din l-inċertezza. L-inflazzjoni kienet tinsab f’madwar il-mira ta’ 2 fil-mija, l-aspettattivi tal-inflazzjoni fuq medda ta’ żmien medju huma ankrati sew, u l-ekonomija wriet reżiljenza fit-trimestri reċenti. L-informazzjoni li se nirċievu fil-perjodu li ġej se tgħinna nevalwaw kif il-gwerra se taffettwa l-prospettiva tal-inflazzjoni u r-riskji madwarha. Qegħdin nimmonitorjaw is-sitwazzjoni mill-qrib, u l-approċċ tagħna li jiddependi mid-data se jgħinna nistabbilixxu l-politika monetarja kif xieraq.

Il-projezzjonijiet ġodda tal-persunal tal-BĊE jinkorporaw b’mod eċċezzjonali informazzjoni sal-11 ta’ Marzu, data ta’ għeluq aktar tard mis-soltu. Fil-linja bażi, l-inflazzjoni globali hija prevista li tilħaq medja ta’ 2.6 fil-mija fl-2026, 2.0 fil-mija fl-2027 u 2.1 fil-mija fl-2028. L-inflazzjoni ġiet riveduta ’l fuq meta mqabbla mal-projezzjonijiet ta’ Diċembru, speċjalment għall-2026. Dan għaliex il-prezzijiet tal-enerġija se jkunu ogħla minħabba l-gwerra fil-Lvant Nofsani. Għall-inflazzjoni bl-esklużjoni tal-enerġija u l-ikel, il-persunal ibassar medja ta’ 2.3 fil-mija fl-2026, 2.2 fil-mija fl-2027 u 2.1 fil-mija fl-2028. Dan hu ogħla wkoll mill-perkors fil-projezzjonijiet ta’ Diċembru, l-aktar minħabba l-prezzijiet ogħla tal-enerġija li jikkontribwixxu għall-inflazzjoni bl-esklużjoni tal-enerġija u l-ikel. Il-persunal jistennew li t-tkabbir ekonomiku se jilħaq medja ta’ 0.9 fil-mija fl-2026, 1.3 fil-mija fl-2027 u 1.4 fil-mija fl-2028. Dan jimplika reviżjoni ’l isfel, speċjalment għall-2026, li tirrifletti l-effetti globali tal-gwerra fuq is-swieq tal-komoditajiet, id-dħul reali u l-kunfidenza. Fl-istess ħin, ir-rata baxxa tal-qgħad, il-karti tal-bilanċ sodi tas-settur privat, u l-infiq pubbliku fuq id-difiża u l-infrastruttura għandhom ikomplu jirfdu t-tkabbir.

B’mod konformi mal-impenn tal-istrateġija tal-politika monetarja tagħna biex ninkorporaw ir-riskji u l-inċertezza fit-teħid tad-deċiżjonijiet tagħna, il-persunal evalwa wkoll kif il-gwerra fil-Lvant Nofsani tista’ taffettwa t-tkabbir ekonomiku u l-inflazzjoni f’xi xenarji alternattivi illustrattivi. Dawn ix-xenarji se jiġu ppubblikati mal-projezzjonijiet tal-istaff fuq is-sit web tagħna. L-analiżi tax-xenarju tissuġġerixxi li tfixkil prolongat fil-provvista taż-żejt u l-gass iwassal biex l-inflazzjoni tkun ogħla mill-projezzjonijiet tal-linja bażi, u li t-tkabbir ikun aktar baxx. L-implikazzjonijiet għall-inflazzjoni fuq medda ta’ żmien medju jiddependu b’mod kruċjali mid-daqs tal-effetti indiretti u tat-tieni fażi ta’ xokk għall-enerġija aktar b’saħħtu u aktar persistenti.

Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni u r-riskji ta’ madwarha, fid-dawl tad-data ekonomika u finanzjarja li tidħol, kif ukoll id-dinamiċi tal-inflazzjoni prinċipali, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

L-ekonomija kibret b’0.2 fil-mija fir-raba’ trimestru tal-2025, xprunata minn domanda domestika aktar qawwija. L-unitajiet domestiċi żiedu l-infiq tagħhom hekk kif id-dħul reali żdied u l-qgħad baqa’ qrib ir-rata storikament baxxa tiegħu. Il-kostruzzjoni u r-rinnovazzjoni tad-djar issaħħu, u d-ditti investew aktar, b’mod partikolari f’oqsma bħar-riċerka u l-iżvilupp, is-software u l-bażijiet tad-data. It-tkabbir ma baqax ostakolat mill-esportazzjonijiet netti kif kien fiż-żewġ trimestri preċedenti. Kien mirfud l-aktar bis-servizzi.

Il-persunal għadhom jaraw il-konsum privat bħala l-mutur ewlieni tat-tkabbir fuq medda ta’ żmien medju. L-investiment ukoll għandu jkompli jikber, hekk kif il-gvernijiet jonfqu aktar fuq id-difiża u l-infrastruttura, u hekk kif id-ditti jinvestu dejjem aktar f’teknoloġiji diġitali ġodda. L-ambjent estern jibqa’ wieħed ta’ sfida, inkluż fid-dawl ta’ politiki tal-kummerċ globali volatili.

Il-gwerra fil-Lvant Nofsani qiegħda tfixkel is-swieq tal-komoditajiet u hija ta’ piż fuq id-dħul reali u l-kunfidenza. Dan wassal għal reviżjoni ’l isfel tal-konsum u l-investiment fil-projezzjonijiet tal-linja bażi tal-persunal, speċjalment għall-2026. L-impatt ikun saħansitra aktar evidenti f’xenarji alternattivi b’xokk tal-enerġija aktar sever u aktar prolongat.

Il-Kunsill Governattiv jenfasizza l-ħtieġa urġenti li tissaħħaħ l-ekonomija taż-żona tal-euro filwaqt li jinżammu finanzi pubbliċi sodi. Kwalunkwe risposta fiskali għax-xokk fil-prezzijiet tal-enerġija għandha tkun temporanja, immirata u mfassla apposta. Il-kriżi tal-enerġija attwali tenfasizza kemm hu essenzjali li nkomplu nnaqqsu d-dipendenza fuq il-fjuwils fossili. It-tlestija tal-unjoni tat-tfaddil u tal-investimenti hija vitali għall-finanzjament tal-innovazzjoni u biex jiġu appoġġati t-tranżizzjonijiet ekoloġiċi u diġitali. L-euro diġitali u l-flus tal-bank ċentrali tokenizzati bl-ingrossa se jtejbu l-awtonomija strateġika tal-Ewropa, il-kompetittività u l-integrazzjoni finanzjarja, u se jsaħħu l-innovazzjoni fil-pagamenti. Għaldaqstant huwa essenzjali li jiġi adottat b’ħeffa r-Regolament dwar l-istabbiliment tal-euro diġitali. Is-simplifikazzjoni u l-armonizzazzjoni tar-regoli madwar is-Suq Uniku tal-UE se jgħinu lid-ditti Ewropej jikbru aktar malajr.

Inflazzjoni

L-inflazzjoni żdiedet għal 1.9 fil-mija fi Frar, minn 1.7 fil-mija f’Jannar. Il-prezzijiet tal-enerġija kienu 3.1 fil-mija aktar baxxi minn sena ilu, wara li kienu 4.0 fil-mija aktar baxxi f’Jannar. L-inflazzjoni fil-prezzijiet tal-ikel naqset xi ftit għal 2.5 fil-mija. L-inflazzjoni bl-esklużjoni tal-enerġija u l-ikel żdiedet għal 2.4 fil-mija fi Frar, minn 2.2 fil-mija f’Jannar. Iż-żieda rriflettiet l-inflazzjoni tal-prodotti li żdiedet għal 0.7 fil-mija minn 0.4 fil-mija, u l-inflazzjoni tas-servizzi li żdiedet għal 3.4 fil-mija minn 3.2 fil-mija.

L-indikaturi tal-inflazzjoni sottostanti ftit inbidlu f’dawn l-aħħar xhur u għadhom konsistenti mal-mira tagħna ta’ 2 fil-mija fuq medda medja ta’ żmien. Il-profitti korporattivi komplew jirkupraw aktar fir-raba’ trimestru tal-2025, filwaqt li l-ispejjeż għal kull unità tax-xogħol żdiedu b’rata simili bħal fit-trimestru preċedenti. It-tkabbir fil-kumpens għal kull impjegat naqas għal 3.7 fil-mija, minn 4.0 fil-mija fit-tielet trimestru. It-tkabbir fil-pagi nnegozjat u l-indikaturi li jħarsu ’l quddiem, bħall-indikatur tal-pagi tal-BĊE u l-istħarriġ dwar l-aspettattivi ta’ pagi, jissuġġerixxu li l-ispejjeż tax-xogħol se jkomplu jbattu matul l-2026, li għandu jappoġġa r-ritorn tal-inflazzjoni għall-mira.

Iż-żieda fil-prezzijiet tal-enerġija kkawżata mill-gwerra se tgħolli l-inflazzjoni ’l fuq minn 2 fil-mija fiż-żmien fil-qrib. Jekk ikunu persistenti, il-prezzijiet ogħla tal-enerġija jistgħu jwasslu għal żieda aktar estensiva fl-inflazzjoni permezz ta’ effetti indiretti u tat-tieni stadju, sitwazzjoni li teħtieġ li tiġi mmonitorjata mill-qrib. L-aspettattivi tal-inflazzjoni fis-swieq finanzjarji resqu ’l fuq b’mod sinifikanti fuq orizzonti iqsar. Il-biċċa l-kbira tal-miżuri tal-aspettattivi tal-inflazzjoni fuq żmien itwal huma ta’ madwar 2 fil-mija, u dan jappoġġa l-istabilizzazzjoni tal-inflazzjoni madwar il-mira tagħna.

Valutazzjoni tar-riskji

Ir-riskji għall-prospettiva tat-tkabbir ixeqilbu lejn it-tnaqqis, speċjalment għaż-żmien fil-qrib. Il-gwerra fil-Lvant Nofsani toħloq riskju ta’ tnaqqis għall-ekonomija taż-żona tal-euro, u żżid mal-ambjent volatili tal-politika globali. Gwerra fit-tul tista’ tkompli żżid aktar il-prezzijiet tal-enerġija u għal żmien itwal milli huwa mistenni attwalment, u tkun ta’ piż ukoll fuq il-kunfidenza. Dawn il-fatturi jnaqqru d-dħul u jġiegħlu lill-imrpiżi u lill-unitajiet domestiċi joqogħdu aktar lura fl-investimenti u l-infiq. Deterjorament fis-sentiment tas-swieq finanzjarji globali jista’ jkompli jnaqqas id-domanda. Frizzjonijiet addizzjonali fil-kummerċ internazzjonali jistgħu jfixklu l-ktajjen tal-provvista, inaqqsu l-esportazzjonijiet u jdgħajfu l-konsum u l-investiment. Tensjonjiet ġeopolitiċi oħrajn, b’mod partikolari l-gwerra mhux ġustifikata tar-Russja kontra l-Ukrajna, jibqgħu sors ta’ inċertezza maġġuri. B’kuntrast ma’ dan, it-tkabbir jista’ jirriżulta ogħla jekk jirriżulta li r-riperkussjonijiet ekonomiċi tal-gwerra fil-Lvant Nofsani jdumu għal żmien iqsar milli huwa mistenni attwalment. Barra minn hekk, l-infiq ippjanat fuq id-difiża u l-infrastruttura, ir-riformi għat-titjib tal-produttività, u l-adozzjoni ta’ teknoloġiji ġodda mill-impriżi taż-żona tal-euro jistgħu jkomplu jixprunaw it-tkabbir b’aktar milli huwa mistenni. Ftehimiet kummerċjali ġodda u integrazzjoni aktar profonda tas-Suq Uniku jistgħu jsaħħu wkoll it-tkabbir lil hinn mill-aspettattivi kurrenti.

Ir-riskji għall-prospettiva tal-inflazzjoni jxeqilbu lejn iż-żieda, speċjalment għaż-żmien fil-qrib. Gwerra fit-tul fil-Lvant Nofsani tista’ twassal għal żieda fil-prezzijiet tal-enerġija li tkun akbar u ddum aktar milli huwa mistenni attwalment, li jkompli jżid aktar l-inflazzjoni fiż-żona tal-euro. Din tista’ tissaħħaħ u ssir aktar persistenti jekk l-aspettattivi tal-inflazzjoni u ż-żieda fil-pagi jogħlew bħala risposta, jekk iż-żieda fil-prezzijiet tal-enerġija tiġi trasmessa għall-inflazzjoni mhux tal-enerġija sa grad ogħla milli preżunt fil-linja bażi, jekk il-gwerra tfixkel il-katini tal-provvista globali b’mod aktar estensiv. It-tensjonijiet fil-kummerċ li jinsabu għaddejjin jistgħu wkoll jikkawżaw katini tal-provvista globali aktar frammentati, jirrestrinġu l-provvista ta’ materja prima kritika u jissikkaw il-limitazzjonijiet tal-kapaċità fl-ekonomija taż-żona tal-euro. B’kuntrast ma’ dan, l-inflazzjoni tista’ tkun aktar baxxa jekk jirriżulta li r-riperkussjonijiet ekonomiċi tal-gwerra fil-Lvant Nofsani jdumu għal żmien iqsar jew jekk l-effetti indiretti jew tat-tieni fażi jkunu inqas qawwijin milli huwa mistenni attwalment. L-inflazzjoni tista’ wkoll tkun aktar baxxa jekk it-tariffi jnaqqsu d-domanda għall-esportazzjonijiet taż-żona tal-euro b’aktar milli huwa mistenni u jekk il-pajjiżi b’kapaċità żejda jżidu aktar l-esportazzjonijiet tagħhom lejn iż-żona tal-euro. Is-swieq finanzjarji aktar volatili u avversi għar-riskji jistgħu jrażżnu d-domanda u b’hekk inaqqsu wkoll l-inflazzjoni.

Kundizzjonijiet finanzjarji u monetarji

Il-gwerra fil-Lvant Nofsani kellha impatt notevoli fuq is-swieq finanzjarji globali. Il-kundizzjonijiet ta’ finanzjament globali ġew issikkati sa mill-aħħar laqgħa tagħna. Is-swieq tal-ishma waqgħu u r-rati tal-imgħax tas-suq fiż-żona tal-euro, speċjalment ir-rati għal żmien qasir, żdiedu b’mod notevoli.

F’Jannar, ir-rati tas-self tal-banek għall-impriżi u l-ispiża tal-ħruġ ta’ dejn ibbażat fuq is-suq baqgħu t-tnejn ta’ 3.6 fil-mija, filwaqt li r-rata tal-imgħax medja fuq self ipotekarju ġdid żdiedu kemxejn għal 3.4 fil-mija. Is-self mill-banek lill-impriżi żdied bi 2.8 fil-mija fuq bażi annwali f’Jannar, tnaqqis minn 3.0 fil-mija f’Diċembru. Madankollu, dan kien paċut minn ħruġ aktar b'saħħtu ta’ bonds korporattivi, bir-rata tat-tkabbir annwali tiżdied għal 4.0 fil-mija, minn 3.5 fil-mija f’Diċembru. It-tislif ipotekarju żdied bi 3.0 fil-mija, li jfisser li baqa’ l-istess minn Diċembru.

Konklużjoni

Il-Kunsill Governattiv illum iddeċieda li jżomm it-tliet rati ewlenin tal-imgħax tal-BĊE mhux mibdula. Aħna ddeterminati li niżguraw li l-inflazzjoni tistabbilizza fil-mira tagħna ta’ 2 fil-mija fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. Id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni u r-riskji ta’ madwarha, fid-dawl tad-data ekonomika u finanzjarja li tidħol, kif ukoll id-dinamiċi tal-inflazzjoni prinċipali, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.