Awstrija

L-Awstrija għażlet li tipproduċi sensiela ta’ muniti li juru fjuri, arkitettura u nies famużi mill-istorja tagħha. Id-disinji ntgħażlu minn ġurija nazzjonali wara stħarriġ tal-opinjoni pubblika. L-artist Awstrijak Josef Kaiser ħoloq id-disinji.

€2

Din il-munita turi xbieha ta' wiċċ il-paċifista Bertha von Suttner, simbolu tal-isforzi tal-Awstrija għaż-żamma tal-paċi matul għexieren ta' snin. Madwar ix-xifer tal-munita ta’ €2 jidhru 2 EURO *** imtennijin erba’ darbiet, darba weqfin u darba maqlubin.


€1

Din il-munita turi lil Wolfgang Amadeus Mozart, il-kompożitur magħruf Awstrijak, b'referenza għall-Awstrija bħala pajjiż il-mużika.


50 ċenteżmu

Din il-munita turi l-Bini tas-Seċessjoni fi Vjenna, li jfakkar it-twelid tal-art nouveau fl-Awstrija. Il-bini huwa simbolu tat-twelid ta' żmien ġdid u jirrappreżenta pont għal era monetarja ġdida.


20 ċenteżmu

Dan id-disinn juri l-Palazz Belvedere, wieħed mill-isbaħ palazzi barokki fl-Awstrija. It-trattat li reġa' stabbilixxa s-sovranità tal-Awstrija ġie ffirmat hawnhekk fl-1955, u ismu sar ħaġa waħda mat-tifsira ta' libertà.


10 ċenteżmi

Din il-munita turi l-Katidral ta' San Stiefnu, wieħed mill-ġojjelli tal-arkitettura Gotika ta' Vjenna li jiġbed bosta turisti.


5 ċenteżmi

Din il-munita turi xbieha tal-primuli tal-Alpi, fis-sensiela dedikata lill-fjuri li hija simbolu tar-rispett lejn l-ambjent u s-sehem tal-Awstrija fl-iżvilupp ta' politika ambjentali Ewropea.


2 ċenteżmi

Din il-munita turi xbieha ta' edelvajs (stilla tal-Alpi) fis-sensiela dedikata lill-fjuri li hija simbolu tar-rispett lejn l-ambjent u s-sehem tal-Awstrija fl-iżvilupp ta' politika ambjentali Ewropea.


1 ċenteżmu

Din il-munita turi xbieha ta' ġenzjana fis-sensiela dedikata lill-fjuri li hija simbolu tar-rispett lejn l-ambjent u s-sehem tal-Awstrija fl-iżvilupp ta' politika ambjentali Ewropea.