L-euro barra l-Ewropa
24 ta' Jannar 2017 (aġġornat fit-1 ta' Frar 2020)
Madwar 346 miljun ruħ fiż-żona tal-euro jużaw il-karti u l-muniti tal-euro fil-ħajja ta’ kuljum. Iżda kont taf li l-euro jintuża wkoll barra l-Unjoni Ewropea u lil hinn mill-kontinent Ewropew? Sib fejn!
Gżejjer Kanarji (Spanja)
Il-Gżejjer Kanarji huma arċipelagu fl-Oċean Atlantiku u komunità awtonoma ta’ Spanja. Bħala “reġjun imbiegħed” tal-UE, il-gżejjer huma parti miż-żona tal-euro għalkemm ġeografikament mhumiex parti mill-kontinent Ewropew.
Ceuta u Melilla (Spanja)
Ceuta u Melilla huma żewġt ibliet Spanjoli awtonomi li jinsabu fix-xatt tat-tramuntana tal-Afrika. Il-Baħar Mediterran jifridhom mill-medda tal-art ewlenija Spanjola. Billi jaqgħu ma’ Spanja, huma parti mill-UE u r-residenti tagħhom iħallsu bl-euro.
Azores u Madeira (Portugall)
L-Azores u Madeira huma żewġ arċipelagi fl-Oċean Atlantiku li jiffurmaw iż-żewġ Reġjuni Awtonomi tal-Portugall. Bħall-Gżejjer Kanarji, huma reġjuni mbiegħda tal-UE u għalhekk jagħmlu sehem miż-żona tal-euro.
Mayotte u Réunion (Franza)
Mayotte u Réunion huma żewġ gżejjer li jinsabu fl-Oċean Indjan, rispettivament lejn il-punent u l-lvant ta’ Madagaskar. It-tnejn huma “dipartimenti barranin” ta’ Franza u reġjuni mbiegħda tal-UE. In-nies li joqogħdu hemm għalhekk iħallsu bl-euro.
Saint Pierre u Miquelon (Franza)
Saint Pierre u Miquelon jiffurmaw arċipelagu lil hinn mix-xatt tal-lvant tal-Kanada u huma “kollettività barranija” ta’ Franza. Dan ifisser li huma parti minn Franza iżda mhumiex parti mill-UE. Il-gżejjer iffirmaw ftehim mal-UE biex ikunu jistgħu jużaw l-euro.
Gujana Franċiża
Il-Gujana Franċiża hija dipartiment barrani ta’ Franza li jinsab fuq l-Atlantiku fix-xatt tat-tramuntana tal-Amerika t’Isfel. Bħala parti minn Franza, il-Gujana Franċiża tifforma reġjun imbiegħed tal-UE u għalhekk tagħmel sehem miż-żona tal-euro.
Gżejjer Franċiżi fil-Karibew
Il-gżejjer Karibej ta’ Guadeloupe u Martinique huma dipartimenti barranin ta’ Franza u għalhekk huma parti mill-UE. Saint Martin saret kollettività barranija ta’ Franza fl-2007 iżda għadha tifforma parti mill-UE. Il-kollettività barranija ta’ Saint-Barthélemy, li mhijiex parti mill-UE, iffirmat ftehim monetarju mal-UE biex tkun tista’ tuża l-euro.
Mikrostati fl-Ewropa
Il-mikrostati Ewropej ta’ Andorra, Monako, San Marino u l-Belt tal-Vatikan mhumiex parti mill-UE. Madankollu, ilkoll iffirmaw ftehim monetarju mal-UE. Dan ifisser li n-nies li joqogħdu f’dawn l-istati jużaw l-euro bħala l-munita uffiċjali tagħhom. L-erba’ stati huma awtorizzati wkoll joħorġu kwantità limitata ta’ muniti ddisinjati minnhom.
Kosovo u Montenegro
L-istati tal-Kosovo u Montenegro fil-Balkani mhumiex membri tal-UE. Iż-żewġ pajjiżi adottaw l-euro unilateralment fl-2002 u qegħdin jużawh bħala l-munita de facto tagħhom. Dan ifisser li għalkemm l-euro mhuwiex valuta legali fiż-żewġ stati, il-popolazzjoni tqisu daqslikieku huwa valuta legali. Qabel l-2002, il-Kosovari u l-Montenegrini kienu jħallsu bil-mark Ġermaniż.