Il-kapital sottoskritt tal-BĊE għandu jibqa’ kostanti wara li l-Bank of England jirtira mis-Sistema Ewropea ta’ Banek Ċentrali

• Il-kapital sottoskritt totali tal-BĊE se jibqa’ ta’ €10.8 biljun.
• Il-BĊE se jħallas lura s-sehem tal-Bank of England fil-kapital imħallas tiegħu (€58 miljun)
• Is-sehem tal-Bank of England fil-kapital sottoskritt tal-BĊE se jiġi ri-allokat fost il-banek ċentrali nazzjonali l-oħrajn

Il-Bank Ċentrali Ewropew (BĊE) se jżomm il-kapital sotoskritt tiegħu kostanti fil-livell ta’ €10.8 biljun wara li l-Bank of England jirtira mis-Sistema Ewropea ta’ Banek Ċentrali (SEBĊ). Is-sehem attwali tal-Bank of England fil-kapital sottoskritt tal-BĊE, li hu ta’ 14.3%, se jiġi ri-allokat kemm fost il-banek ċentrali nazzjonali taż-żona tal-euro (BĊN) kif ukoll fost il-BĊN l-oħra barra ż-żona tal-euro.

Il-Bank of England se jirtira mis-SEBĊ bħala konsegwenza tal-ħruġ tar-Renju Unit mill-Unjoni Ewropea. Hu għandu 14.3% tal-kapital sottoskritt tal-BĊE, li minnu 3.75% – ekwivalenti għal €58 miljun – hu mħallas. Dan l-ammont se jitħallas lura mill-BĊE skont it-termini tal-Ftehim tal-Irtirar bejn ir-Renju Unit u l-UE.

Għalhekk, il-kapital sottoskritt tal-BĊE se jiġi ri-allokat fost il-BĊN l-oħra abbażi ta’ skema aġġornata għas-sottoskrizzjoni fil-kapital tal-BĊE. L-ippeżar se jerġa’ jiġi kalkolat abbażi tas-sehem ta’ kull Stat Membru fil-popolazzjoni totali u l-prodott domestiku gross (PDG) tal-Unjoni Ewropea wara li r-Renju Unit jitlaq mill-Unjoni Ewropea.

Il-BĊN taż-żona tal-euro jħallsu 100% tas-sottoskrizzjonijiet tagħhom għall-kapital tal-BĊE, waqt li l-BĊN barra ż-żona tal-euro jħallsu 3.75% tas-sottoskrizzjonijiet tagħhom. Billi l-ishma tal-BĊN taż-żona tal-euro se jiżdiedu, u se jitħallsu kompletament, dan se jwassal għal żieda fil-kapital imħallas tal-BĊE minn €7,659 miljun fl-2020 għal €8,880 miljunfl-2022, kif jidher fit-tabella hawn taħt. Il-kapital imħallas tal-BĊE se jibqa’ kif kien fis-sena tal-irtirar tar-Renju Unit mill-UE billi l-BĊN l-oħra se jkopru l-kapital imħallas u rtirat tal-Bank of England ta’ €58 miljun. Il-BĊN taż-żona tal-euro mbagħad iħallsu is-sottoskrizzjonijiet miżjuda tagħhom, bl-ewwel rata dovuta fl-2021. Dawn il-bidliet huma investiment li jidher fil-karti tal-bilanċ tal-BĊN.

Tqassim tal-kontribuzzjonijiet wara Brexit

Iċ-ċifri jistgħu ma jaqblux minħabba t-tqarrib sal-eqreb euro.

Għal mistoqsijiet min-naħa tal-midja, jekk jogħġbok ikkuntattja lil William Lelieveldt, tel.: +49 69 1344 7316.

Noti:

• Informazzjoni dwar is-Sottoskrizzjoni tal-kapital tal-BĊE
• Niċċaraw: Ta’ min hu l-BĊE?
• Kontijiet annwali tas-SEBĊ u tal-BĊE
• L-atti legali rilevanti dwar il-kontribuzzjonijiet tal-BĊN għall-kapital tal-BĊE wara Brexit se jiġu ppubblikati fil-Ġurnal Uffiċjali tal-Unjoni Ewropea fl-1 ta’ Frar 2020