Aġġustamenti fl-iskema tas-sottoskrizzjoni tal-kapital tal-BĊE minħabba t-tkabbir tal-UE

Il-Bank Ċentrali Ewropew illum ħabbar l-aġġustamenti fl-iskema tal-kapital tiegħu u l-kontribuzzjonijiet imħallsa mill-banek ċentrali nazzjonali tal-Istati Membri tal-Unjoni Ewropea.

Bi qbil mal-Artikolu 29 tal-Protokoll dwar l-Istatut tas-Sistema Ewropea ta’ Banek Ċentrali u tal-Bank Ċentrali Ewropew, is-sehem tal-banek ċentrali nazzjonali fl-iskema tal-kapital tal-BĊE huwa ppeżat skont is-sehem tal-Istat Membru rispettiv mit-total tal-popolazzjoni u tal-prodott domestiku gross tal-Unjoni Ewropea, fi proporzjon indaqs, kif notifikat lill-BĊE mill-Kummissjoni Ewropea. Il-piżijiet jiġu aġġustati kull ħames snin jew kull meta jissieħeb Stat Membru ġdid fl-Unjoni Ewropea. Għalhekk illum sar tibdil fl-iskema tal-kapital tal-BĊE minħabba li l-Kroazja ssieħbet fl-Unjoni Ewropea u l-bank ċentrali nazzjonali tagħha, Hrvatska narodna banka, sar membru tas-Sistema Ewropea ta’ Banek Ċentrali (SEBĊ).

Bi qbil mal-Artikolu 48.3 tal-Istatut, il-kapital sottoskritt tal-BĊE jiżdied awtomatikament meta pajjiż jissieħeb fl-Unjoni Ewropea u l-bank ċentrali nazzjonali tiegħu jsir membru tas-SEBĊ. Iż-żieda tiġi determinata billi jiġi multiplikat l-ammont attwali tal-kapital sottoskritt (i.e. EUR 10,760,652,402.58) bil-proporzjon, fl-iskema estiża tal-kapital, bejn il-piż tal-bank ċentrali nazzjonali li jkun qiegħed jissieħeb u l-piż tal-banek ċentrali nazzjonali li jkunu diġà membri. Għalhekk, mil-lum il-kapital sottoskritt tal-BĊE żdied għal EUR 10,825,007,069.61.

Il-banek ċentrali nazzjonali tal-Eurosistema jridu jħallsu l-ammont sħiħ tal-kapital sottoskritt tagħhom. Il-11-il bank ċentrali nazzjonali barra ż-żona tal-euro (fosthom Hrvatska narodna banka) iridu jħallsu perċentwali żgħir mis-sehem tagħhom fil-kapital sottoskritt tal-BĊE (li mid-29 ta’ Diċembru 2010 huwa ta’ 3.75%) bħala kontribuzzjoni għall-ispejjeż operattivi tal-BĊE. L-ishma l-ġodda tal-banek ċentrali nazzjonali fl-iskema tal-kapital tal-BĊE jidhru hawn taħt.

Id-deċiżjonijiet rilevanti tal-BĊE jinsabu fil-websajt tal-BĊE u iżjed ’il quddiem se jixxandru f’Il-Ġurnal Uffiċjali tal-Unjoni Ewropea.