Euro Digiteach

Modh íocaíochta leictreonach a bheadh ann a d’fhéadfadh aon duine sa limistéar euro a úsáid. Bheadh sé slán agus soláimhsithe, dála an airgid thirim. Toisc gur airgead bainc ceannais eisithe ag an mBanc Ceannais Eorpaigh a bheadh ann, bheadh sé éagsúil leis an “airgead príobháideach” ach thiocfadh le daoine cárta nó aip fóin a úsáid freisin chun íoc le euro digiteach.

Táimid ag smaoineamh ar airgeadra digiteach bainc ceannais a sheoladh san Eoraip chun freagairt don éileamh méadaitheach atá ar íocaíochtaí leictreonacha sábháilte iontaofa. Dá n-eiseodh banc ceannais airgead digiteach, ancaire cobhsaíochta a bheadh ann le haghaidh córais íocaíochta agus airgeadaíochta. Ina theannta sin, neartódh euro digiteach ceannasacht airgeadaíochta an limistéir euro agus chothódh sé iomaíocht agus éifeachtúlacht in earnáil íocaíochta na hEorpa.

Toisc go bhfuil taighde fós á dhéanamh againn, níl sonraí uile an togra deiridh againn go fóill. Mar sin féin, tá machnamh go leor déanta againn faoi choincheap an euro dhigitigh agus ar na buntáistí agus na míbhuntáistí a ghabhann leis. Is léir cheana féin gur cheart go mbeadh euro digiteach inrochtana, láidir, sábháilte, éifeachtúil agus i gcomhréir leis an dlí. Ba mhaith linn an leibhéal príobháideachais is airde a chinntiú leis freisin.

Cuireadh tús leis an gcéim fiosrúcháin i mí Dheireadh Fómhair 2021. Meastar go mairfidh sí thart ar dhá bhliain agus go dtiocfaidh deireadh léi i mí Dheireadh Fómhair 2023. Táimid ag fiosrú cén chaoi a bhféadfaí euro digiteach a dhearadh agus a leathdháileadh, agus an tionchair a d’fhéadfadh a bheith aige ar an margadh. Ansin, déanfaimid cinneadh tosú nó gan tosú le forbairt an euro dhigitigh féin.