STQARRIJA GĦALL-ISTAMPA

Il-karti tal-euro foloz jonqsu bi ftit fit-tieni nofs tal-2015

22 ta' Jannar 2016

EMBARGO

M’għandhiex tixxandar qabel l-10:00 CET tal-Ġimgħa 22 ta’ Jannar 2016
  • 445,000 karta tal-euro falza tneħħew miċ-ċirkolazzjoni fit-tieni nofs tal-2015
  • 83% tal-karti tal-flus foloz kienu tal-€20 u l-€50
  • Il-karti kollha tal-euro jistgħu jiġu ċċekkjati bil-metodu “ħoss, ħares u mejjel”
  • Il-karti tal-euro jibqgħu mezz ta’ ħlas fdat u sigur

Il-Bank Ċentrali Ewropew ħabbar illum li madwar 445,000 karta tal-euro falza tneħħew miċ-ċirkolazzjoni fit-tieni nofs tal-2015, 2% inqas miċ-ċifra għall-ewwel nofs tas-sena. It-total ta’ karti tal-flus foloz jibqa’ żgħir ħafna meta jitqabbel mal-għadd ta’ karti tal-flus tajbin fiċ-ċirkolazzjoni li kulma jmur qiegħed jiżdied (aktar minn 18-il biljun fit-tieni nofs tal-2015).

Hawn taħt jidhru ċ-ċifri għal kull sitt xhur:

Perjodu

2012/2 2013/1 2013/2 2014/1 2014/2 2015/1 2015/2
Total ta’ karti tal-flus foloz 280,000 317,000 353,000 331,000 507,000 454,000 445,000

Minn kemm ilha li ħarġet l-ewwel sensiela ta’ karti tal-euro, l-Eurosistema – i.e. il-Bank Ċentrali Ewropew (BĊE) u d-19-il bank ċentrali nazzjonali taż-żona tal-euro – ħeġġet lill-pubbliku joqgħod attent meta jiġu f’idejh karti tal-flus. Il-karti tal-flus tajbin jintgħarfu faċilment bil-metodu sempliċi “ħoss, ħares u mejjel” imfisser fil-paġni dwar l-euro fil-websajts tal-BĊE u tal-banek ċentrali nazzjonali tal-Eurosistema.

L-Eurosistema tikkomunika b’diversi modi biex tgħin lin-nies jagħrfu l-karti tal-flus tajbin minn dawk foloz u biex tgħin lill-kaxxiera professjonali jaċċertaw ruħhom li l-magni li jipproċessaw il-karti tal-flus ikunu kapaċi jidentifikaw b’mod affidabbli u jneħħu l-karti tal-flus foloz miċ-ċirkolazzjoni.

Jekk tiġi f’idejk karta tal-flus dubjuża, għandek tqabbilha ma’ waħda li tkun taf li hija tajba. Jekk tikkonferma d-dubji, ikkuntattja lill-pulizija jew lill-bank ċentrali ta’ pajjiżek, skont il-prattika nazzjonali. L-Eurosistema tappoġġa lill-aġenziji li jinfurzaw il-liġi fil-ġlieda tagħhom kontra l-falsifikazzjoni.

L-Eurosistema għandha dmir tissalvagwarda l-integrità tal-karti tal-euro u tkompli ttejjeb it-teknoloġija tal-produzzjoni tal-karti tal-flus. Il-karti tal-flus tas-sensiela Europa huma aktar siguri u jgħinu lill-pubbliku jsaħħaħ il-fiduċja tiegħu fil-munita unika.

Hawn taħt tidher analiżi skont id-denominazzjonijiet tal-karti tal-flus foloz li tneħħew miċ-ċirkolazzjoni fit-tieni nofs tal-2015.

Denominazzjoni

€5 €10 €20 €50 €100 €200 €500

Analiżi perċentwali

1.1% 3.0% 46.2% 37.1% 10.1% 1.2% 1.3%

F’dan il-perjodu:

  • Il-karti tal-€20 u l-€50 baqgħu l-aktar denominazzjonijiet li ġew iffalsifikati. Imqabbel maċ-ċifri rrappurtati għall-ewwel nofs tal-2015, il-proporzjon ta’ karti foloz tal-€20 naqas filwaqt li dak tal-karti foloz tal-€50 żdied. Flimkien kienu jgħoddu 83.3% tat-total tal-karti tal-flus foloz.
  • Il-biċċa l-kbira (98.0%) tal-karti tal-flus foloz instabet fil-pajjiżi taż-żona tal-euro. Madwar 1.3% biss instabu fi Stati Membri tal-Unjoni Ewropea li mhumiex fiż-żona tal-euro u anqas minn 0.7% instabu f’partijiet oħra tad-dinja.

Il-karta l-ġdida tal-€20, bil-karatteristiċi ta’ sigurtà ġodda tagħha, ħarġet fil-25 ta’ Novembru 2015. Il-manifatturi tal-apparat li jipproċessa l-karti tal-flus u fornituri oħra se jkomplu jsibu l-għajnuna tal-Eurosistema biex jadattaw il-magni u t-tagħmir tal-awtentikazzjoni tagħhom għall-karta l-ġdida. Jekk l-apparat tagħhom jibqa’ ma jaċċettax din il-karta tal-flus, l-operaturi u s-sidien għandhom jikkuntattjaw lill-fornituri jew lill-manifatturi tagħhom mill-aktar fis.

Għal mistoqsijiet min-naħa tal-midja, il-persuni ta kuntatt huma William Lelieveldt (+49 69 1344 7316) jew Eva Taylor (+49 69 1344 7162).

Kuntatti midja