Cuntasacht

Cuireann an Banc Ceannais Eorpach tuarascáil bhliantúil maidir lena chúraimí, gníomhaíochtaí CEBC agus beartas airgeadaíochta an Eurochórais faoi bhráid Pharlaimint na hEorpa, Chomhairle an Aontais Eorpaigh, an Choimisiúin Eorpaigh agus na Comhairle Eorpaí. Gach bliain, cuireann Leas-Uachtarán an Bhainc Ceannais Eorpaigh an tuarascáil faoi bhráid Pharlaimint na hEorpa i seisiún tiomnaithe de Choiste ECON. Tráth díospóireachta iomlánaí, is í an tUachtarán a chuireann an tuarascáil i láthair.

Glacann Uachtarán an Bhainc Ceannais Eorpaigh páirt in éisteachtaí ráithiúla Choiste Pharlaimint na hEorpa um Ghnóthaí Eacnamaíochta agus Airgeadaíochta. Glacann comhaltaí eile an Bhoird Feidhmiúcháin páirt in éisteachtaí an Choiste sin chun réasúnaíocht agus cinntí BCE maidir le hábhair shonracha a mhíniú.

Féadfaidh Feisirí de Pharlaimint na hEorpa ceisteanna i scríbhinn a dhíriú chuig Uachtarán an Bhainc Ceannais Eorpaigh. Foilsíonn an Banc Ceannais Eorpach agus Parlaimint na hEorpa na litreacha freagartha ar a suíomhanna gréasáin faoi seach.

Glacann Uachtarán BCE agus comhaltaí eile an Bhoird Feidhmiúcháin páirt, arna iarraidh sin do Pharlaimint na hEorpa nó ar a dtionscnamh féin, i malartuithe tuairimí ad hoc os comhair an Choiste um Ghnóthaí Eacnamaíochta agus Airgeadaíochta chun saincheisteanna i réimsí inniúlachta BCE a phlé.

Gach bliain, óstálann comhaltaí Bhord Feidhmiúcháin BCE toscaireacht ón gCoiste um Ghnóthaí Eacnamaíochta agus Airgeadaíochta le haghaidh plé neamhfhoirmiúil ar shaincheisteanna i réimsí inniúlachta BCE.

Féachann BCE agus Parlaimint na hEorpa lena áirithiú go ndéanfaidh comhlachtaí inniúla Pharlaimint na hEorpa tuairimí BCE maidir le gníomhartha Aontais atá beartaithe a bhreithniú go cuí. Chuige sin, ba cheart do Pharlaimint na hEorpa, i gcás inarb iomchuí, tuairim BCE a lorg go tráthúil.

San Fheasachán Eacnamaíoch, cuirtear i láthair an fhaisnéis eacnamaíoch agus airgeadaíochta atá mar bhonn le cinntí beartais na Comhairle Rialaithe. Foilsítear 8 n‑uaire in aghaidh na bliana é tar éis gach cruinniú ar bheartas airgeadaíochta.

Le ráiteas airgeadais comhdhlúite seachtainiúil an Eurochórais, soláthraítear faisnéis maidir le hoibríochtaí beartais airgeadaíochta, oibríochtaí um malairt eachtrach agus gníomhaíochtaí infheistíochta.

Reáchtálann an Banc Ceannais Eorpach preasagallaimh tar éis gach ceann de chruinnithe na Comhairle Rialaithe maidir le beartas airgeadaíochta, i.e. gach sé seachtaine.

Foilsítear cuntas ar phléití na Comhairle Rialaithe maidir le beartas airgeadaíochta ceithre seachtaine tar éis gach cruinniú.

Déanann comhaltaí an Bhoird Feidhmiúcháin cumarsáid rialta leis an bpobal trí bhlaganna, agallaimh, óráidí agus, i gcásanna áirithe, go díreach trí na meáin shóisialta.