X’inhi TARGET2?

29 ta' Ġunju 2016

TARGET2 hija sistema ta’ ħlas tal-Eurosistema li titħaddem minnha stess. Hija l-pjattaforma Ewropea ewlenija għall-ipproċessar ta’ ħlasijiet b’valur kbir u tintuża kemm minn banek ċentrali kif ukoll minn banek kummerċjali biex jipproċessaw ħlasijiet bl-euro f’ħin reali.

X’inhuma sistemi ta’ ħlas?

L-ekonomiji moderni jiddependu mill-fluss sigur u effiċjenti tat-tranżazzjonijiet. Is-sistemi ta’ ħlas jipprovdu mezz li jippermetti l-fluss tal-flus fl-ekonomija. TARGET2 hija sistema ta’ ħlas li tippermetti l-banek fl-UE jittrasferixxu flus bejniethom f’ħin reali. Dan huwa magħruf bħala pagament gross f’ħin reali (real-time gross settlement – RTGS).

Għaliex hija importanti TARGET2?

Il-BĊE għandu interess qawwi jiżgura li s-sistemi ta’ ħlas u infrastrutturi oħra tas-suq jiffunzjonaw bla xkiel u b’mod effikaċi sabiex tinżamm l-istabbiltà finanzjarja fiż-żona tal-euro. Għalhekk TARGET2 hija komponent ewlieni tal-integrazzjoni finanzjarja fl-UE. Tippermetti l-fluss ħieles tal-flus bejn il-pajjiżi u tgħin l-implimentazzjoni tal-politika monetarja unika tal-BĊE.

Kif taħdem TARGET2?

L-Eurosistema hija s-sid u l-amministratur ta’ din il-pjattaforma. Fi kliem sempliċi, tiffunzjona kif ġej:

  • Bank A u Bank B it-tnejn għandhom kontijiet ma’ bank ċentrali
  • Bank A irid jagħmel pagament bl-euro lil Bank B
  • Bank A jibgħat l-istruzzjonijiet tal-ħlas lil TARGET2
  • Il-kont ta’ Bank A jiġi debitat u l-kont ta’ Bank B jiġi kreditat – il-pagament isir
  • TARGET2 tittrasferixxi l-informazzjoni tal-ħlas lil Bank B

Min jista’ juża TARGET2?

Il-banek ċentrali tal-UE u l-komunitajiet nazzjonali tal-banek kummerċjali. Iżjed minn 1,700 bank jużaw TARGET2 biex jagħmlu tranżazzjonijiet bl-euro f’isimhom jew f’isem il-klijenti tagħhom. Jekk wieħed iqis il-fergħat u s-sussidjarji, iżjed minn 55,000 bank fid-dinja (u l-klijenti kollha tagħhom) jistgħu jintlaħqu permezz ta’ TARGET2.

X’inhi TARGET2?