Nochtann BCE na dearaí gearrliostaithe le haghaidh nótaí bainc nua agus seolann sé suirbhé poiblí

23 Iúil 2026

• Nochtann BCE deich dtogra dearaidh ar an ngearrliosta don chéad sraith eile de nótaí bainc euro
• Is féidir le muintir na hEorpa a dtuairimí a chur in iúl i suirbhé ar líne go dtí an 21 Meán Fómhair
• Táthar ag súil go roghnóidh an Chomhairle Rialaithe togra dearaidh amháin thart ar dheireadh na bliana

Nocht an Banc Ceannais Eorpach (BCE) inniu na tograí dearaidh atá ar an ngearrliosta don chéad sraith eile de nótaí bainc euro agus sheol sé suirbhé poiblí inar iarradh ar dhaoine ar fud na hEorpa a n-aiseolas a thabhairt. Tá na tograí dearaidh sin bunaithe ar dhá théama éagsúla – ‘Cultúr na hEorpa’ agus ‘Aibhneacha agus éin’ – agus ar na móitífeanna gaolmhara a roghnaíodh chun iad a léiriú.

“Tá níos mó i gceist le nótaí bainc euro ná modh íocaíochta – tá siad ar cheann de na léirithe is follasaí den Eoraip,” a dúirt Christine Lagarde, Uachtarán BCE. “Trí dhearaí a cheanglaíonn áilleacht agus brí le chéile, neartóidh siad ár bhféiniúlacht chomhroinnte.”

Is toradh iad na tograí ar an ngearrliosta de chomórtas deartha uile-Aontais Eorpaigh. Fuarthas níos mó ná 1,200 iarratas ó dhearthóirí grafacha, agus tugadh cuireadh do 25 díobh sin tograí dearaidh a chruthú do théama amháin nó don dá théama. Chuir giúiré neamhspleách de 21 saineolaí as réimsí éagsúla, amhail dearadh grafach, cumarsáid, eolaíocht néarchórais agus stair – gach duine acu ainmnithe ag banc ceannais i dtír sa limistéar euro – deich gcinn de na dearaí ar ghearrliosta ansin.

Anois, iarrtar ar gach duine san Eoraip a dtuairimí a chur in iúl, tar éis chinneadh Chomhairle Rialaithe BCE suirbhé ar líne a reáchtáil ar na deich dtogra dearaidh sin. Fanfaidh an suirbhé poiblí ar oscailt go dtí an 21 Meán Fómhair 2026. Déanfaidh cuideachta taighde neamhspleách suirbhé ar leith leis na ceisteanna céanna ag an am céanna i measc sampla ionadaíoch de shaoránaigh an limistéir euro.

Foilseoidh BCE tuarascáil ar thorthaí an dá shuirbhé a luaithe a bheidh coincheap an dearaidh deiridh roghnaithe. Is príomhghné de chur chuige cuimsitheach an Eurochórais é aiseolas an phobail, lena n-áirithítear go gcuirtear tuairimí na saoránach ar fud na hEorpa san áireamh.

Táthar ag súil go ndéanfaidh an Chomhairle Rialaithe an cinneadh deiridh maidir le dearadh nua na nótaí bainc thart ar dheireadh na bliana. Bunóidh sí a chinneadh ar mheascán d’ionchuir, lena n-áirítear conclúidí Ghiúiré an Chomórtais Deartha, measúnú teicniúil agus torthaí an dá shuirbhé.

Déanfar tuilleadh forbartha agus tástála ar an dearadh roghnaithe ansin sula gcuirfear i dtáirgeadh é. Táthar ag súil go dtiocfaidh nótaí bainc ón tsraith nua i gcúrsaíocht sna blianta ina dhiaidh sin. Coinneoidh nótaí bainc euro ón tsraith roimhe seo a luach agus leanfaidh siad de bheith i gcúrsaíocht taobh leis an tsraith nua. Is é seo an chéad athdhearadh iomlán ar na nótaí bainc euro ó eisíodh iad in 2002.

“Tá athdhearadh na nótaí bainc euro mar chuid d’iarracht fhadtéarmach ón Eurochóras chun a áirithiú go leanfaidh airgead tirim de bheith ina mhodh íocaíochta slán, éifeachtúil agus inchoibhneasta, lena gcaomhnófar rochtain na saoránach ar airgead poiblí agus a saoirse chun rogha a dhéanamh maidir le conas íocaíocht a dhéanamh,” a dúirt Piero Cipollone, comhalta de Bhord Feidhmiúcháin BCE.

Trí shraith nua nótaí bainc a eisiúint go tréimhsiúil, is féidir leas a bhaint as an dul chun cinn sa teicneolaíocht chun fanacht chun tosaigh ar ghóchumadh. Ionchorprófar sna nótaí bainc nua gnéithe slándála nua agus feabhsaithe chun feabhas a chur ar éascaíocht fíordheimhniúcháin agus inrochtaineachta, agus do dhaoine lagamhairc freisin.

Tá sé mar aidhm ag BCE freisin lorg comhshaoil na nótaí bainc a laghdú trína marthanacht a fheabhsú agus trí ábhair agus próisis táirgthe níos inbhuanaithe a úsáid.

Le haghaidh íomhánna agus físeáin de na tograí ar an ngearrliosta, den phróiseas roghnúcháin, agus d’ábhar amhairc eile, féach ar ár leathanach tiomnaithe.

Más duine den phobal thú agus má tá ceist agat, féach ar ár gCeisteanna Coitianta sula gcuirfidh tú iarratas isteach tríd an bhfoirm ghréasáin.

Is féidir leis na meáin a gcuid ceisteanna a sheoladh chuig Alessandro Speciale, teil: +49 69 172 1670791; Benoit Deeg, +49 69 1344 95686.