STQARRIJA GĦALL-ISTAMPA

Tagħrif ta’ kull sitt xhur dwar l-iffalzifikar tal-karti tal-flus ta’ l-euro

11 ta' Lulju 2007

Fl-ewwel sitt xhur ta’ l-2007, ġie rtirat miċ-ċirkolazzjoni total ta’ 265,000 karta tal-flus ta’ l-euro falza. Iċ-ċifri għal perijodu ta’ sitt xhur li ġejjin juru li l-livell ta' l-iffalzifikar varja ftit biss tul l-aħħar erba’ snin.

Perijodu 2003/2 2004/1 2004/2 2005/1 2005/2 2006/1 2006/2 2007/1
Għadd ta’ karti tal-flus foloz 312,000 307,000 287,000 293,000 286,000 300,000 265,000 265,000

Meta dawn iċ-ċifri jitqabblu man-numru ta’ karti tal-flus ta’ l-euro ġenwini fiċ-ċirkolazzjoni (medja ta’ 11-il biljun matul l-ewwel sitt xhur ta’ l-2007), il-kwantità ta’ karti tal-flus foloz hija waħda tassew żgħira.

Il-maġġoranza l-kbira (97%) tal-karti tal-flus foloz irkuprati fl-ewwel sitt xhur ta’ l-2007 instabet mill-ġdid fil-pajjiżi taż-żona ta’ l-euro. Bejn wieħed u ieħor 3% ġew minn Stati Membri ta’ l-UE barra ż-żona ta’ l-euro u numru tassew żgħir ġew mill-partijiet l-oħra tad-dinja.

L-analiżi ta' dawn il-karti tal-flus foloz skond id-denominazzjoni hi kif ġej:

€5 €10 €20 €50 €100 €200 €500
Analiżi skond id-denominazzjoni (f’%) 1 3 15 50 20 10 1

Il-karta tal-flus tal-€50 kienet l-iktar waħda li ġiet iffalzifikata matul l-ewwel 6 xhur ta’ l-2007, u dan jammonta għal madwar nofs it-total ta’ karti tal-flus foloz fiċ-ċirkolazzjoni. Bejniethom, it-tliet denominazzjonijiet tan-nofs (€20, €50 u €100) ammontaw għal madwar 85% tal-karti tal-flus foloz kollha.

Il-pubbliku għandu jkollu fiduċja fil-kwalità tal-karti tal-flus ta’ l-euro u fil-karatteristiċi ta’ sigurtà tagħhom. Fl-istess ħin, l-Eurosistema, jiġifieri l-Bank Ċentrali Ewropew (BĊE) u t-13-il bank ċentrali nazzjonali taż-żona ta’ l-euro, ikomplu jwissu lill-pubbliku biex joqgħod attent u biex jiċċekkja l-awtentiċità tal-karti tal-flus li jirċievi. Il-karti tal-flus foloz jintgħarfu faċilment minn karti tal-flus ġenwini meta wieħed juża t-test ĦOSS-ĦARES-MEJJEL imfisser fil-pubblikazzjonijiet ta' l-Eurosistema u fil-websajt tal-BĊEu l-websajts tal-banek ċentrali nazzjonali ta’ l-Eurosistema. Iżda, f’każ ta’ dubju, meta wieħed ikollu suspett li karta tal-flus tkun falza, għandu jqabbilha direttament ma’ waħda li hu jkun żgur li hi ġenwina. Kull min ikollu suspett li forsi rċieva xi karta/munita tal-flus falza għandu jikkuntattja jew lill-pulizija jew – fejn tippermetti l-prassi nazzjonali – lill-bank ċentrali nazzjonali rispettiv, u jagħti kemm jista’ jkun dettalji dwar minn fejn ġiet il-karta tal-flus.

Kuntatti midja