Iż-żona tal-euro mqabbla
Aġġornat fl-1 ta' Jannar 2023 (ippubblikat għall-ewwel darba fil-25 ta' Awwissu 2017)
L-euro jwassal għal benefiċċji tanġibbli fil-ħajja taċ-ċittadini Ewropej. Bħala bank ċentrali għaż-żona tal-euro, il-BĊE jissorvelja l-munita li tgħaqqad flimkien iżjed madwar 346 miljun ruħ li jitkellmu iżjed minn 24 lingwa differenti.
Bħala unjoni monetarja ta' 20 pajjiż membru, iż-żona tal-euro hi struttura unika. Iżda ż-żona tal-euro kif titqabbel fuq livell internazzjonali? Kif taħdem ekonomikament? U dan xi jfisser għaċ-ċittadini Ewropej?
Kemm jgħixu nies fiż-żona tal-euro?
B'madwar 350 miljun resident, iż-żona tal-euro hi d-dar ta' madwar 5% tal-popolazzjoni dinjija. Dan hu ogħla mill-għadd ta' residenti tal-Istati Uniti.
Popolazzjoni taż-żona tal-euro
Dan ifisser ukoll li ż-żona tal-euro hi waħda mill-ikbar ekonomiji tad-dinja. Minn meta twaqqfet iż-żona tal-euro, issieħbu magħha tmien pajjiżi membri ġodda, u mistennija jissieħbu oħrajn ukoll.
Kif tiffunzjona ż-żona tal-euro fuq livell ekonomiku?
Il-popolazzjoni taż-żona tal-euro hi produttiva ħafna. Bħal f'ekonomiji oħra żviluppati sew, is-settur tas-servizzi għandu l-ikbar sehem tal-produzzjoni; warajh hemm is-settur industrijali u settur agrikolu relattivament żgħir.
Ekonomiji dinjija ewlenin skont il-PGD per capita
Sorsi: Eurostat, Kalkoli tal-Bank Dinji u tal-BĊE. Nota: 2016; id-data għall-Istati Uniti, il-Ġappun u ċ-Ċina hija kkonvertita f'paritajiet tal-poter tal-akkwist (PPPs) tal-OECD.
Il-produzzjoni ekonomika qawwija tagħha tagħmel liż-żona tal-euro waħda mill-ikbar ekonomiji tad-dinja. F'termini ta' prodott domestiku gross (PDG) per capita, iż-żona tal-euro tikklassifika fit-tieni post fost l-ekonomiji ewlenin tad-dinja, u dan jirrifletti l-istandard għoli tal-ħajja li jgawdu ċ-ċittadini tagħha.
Xi ngħidu dwar il-kummerċ internazzjonali?
Bħala ekonomija industrijalizzata sew, iż-żona tal-euro tesporta proporzjon sinifikanti ta' prodotti u servizzi lejn is-swieq dinjin. Ħafna mill-prodotti manifatturati taż-żona tal-euro, bħalma huma makkinarju, prodotti farmaċewtiċi, karozzi u ajruplani, huma magħrufa internazzjonalment.
Esportazzjoni ta' oġġetti u servizzi bħala perċentwal tal-PGD
Sorsi: data tal-BĊE, OECD, FMI. Żona tal-euro: ibbażata fuq tranżazzjonijiet barra ż-żona tal-euro.
Iż-żona tal-euro żammet u anke tejbet il-pożizzjoni ewlenija tagħha fil-kummerċ internazzjonali minn meta twaqqfet fl-1999. Is-sħab kummerċjali ewlenin tagħha huma l-Istati Uniti, ir-Renju Unit u ċ-Ċina, waqt li l-kummerċ mas-swieq emerġenti qiegħed dejjem jiżdied.
Iż-żona tal-euro hi ekonomija miftuħa meta mqabbla ma' ekonomiji kbar oħra. Il-livell ta' kummerċ miftuħ tagħha żdied notevolment mill-2004, primarjament bħala riżultat ta' żieda fil-kummerċ ma' Stati Membri ġodda tal-UE u ċ-Ċina. Iż-żona tal-euro tinsab fil-qalba ta' ħafna katini tal-produzzjoni internazzjonali.
Livelli għoljin ta' esportazzjoni għandhom effett pożittiv fuq l-impjieg, it-tkabbir ekonomiku u l-investiment fiż-żona tal-euro, li min-naħa tagħhom imbagħad isostnu l-prosperità ġenerali taċ-ċittadini tagħha.
Kif inhu meqjus l-euro?
L-euro jgawdi livell għoli ta' fiduċja kemm internament kif ukoll f'pajjiżi barra ż-żona tal-euro. Tlieta minn kull erba' persuni fiż-żona tal-euro jappoġġjaw l-euro, skont l-istħarriġ tal-Eurobarometer, stħarriġ tal-opinjoni pubblika li tagħmel darbtejn fis-sena l-Kummissjoni Ewropea. Dan huwa l-ogħla livell ta' appoġġ pubbliku mill-2004.
Internazzjonalment, l-euro jikklassifika fit-tieni post kemm f'termini tal-muniti li jiġu negozjati l-iżjed kif ukoll f'termini tal-muniti ta’ riżerva l-iżjed importanti. Dan jirrifletti livell għoli ta' fiduċja li għandhom l-investituri fid-dinja kollha fl-istabbiltà u l-qawwa tal-ekonomija taż-żona tal-euro.
Iż-żona tal-euro kienet u għadha forza ewlenija fl-ekonomija globali. Dan hu ta' benefiċċju għaċ-ċittadini tagħha u jagħti liż-żona tal-euro vuċi iżjed qawwija fl-ekonomija globali.
U naturalment, iċ-ċittadini taż-żona tal-euro jistgħu jivvjaġġaw u jaqsmu l-fruntieri fi ħdan iż-żona tal-munita unika mingħajr ma jkollhom isarrfu l-flus. Jistgħu wkoll iqabblu l-prezzijiet taż-żona tal-euro kollha biex isibu l-iżjed prodotti rħas.