Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32019D0014(01)

Deċiżjoni (UE) 2019/976 tal-Bank Ċentrali Ewropew tad-29 ta' Mejju 2019 li tistabbilixxi l-prinċipji għad-definizzjoni ta' objettivi u l-kondiviżjoni ta' feedback fi ħdan it-timijiet superviżorji konġunti u li tħassar id-Deċiżjoni (UE) 2017/274 (BĊE/2019/14)

OJ L 157, 14.6.2019, p. 61–66 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec/2019/976/oj

14.6.2019   

MT

Il-Ġurnal Uffiċjali tal-Unjoni Ewropea

L 157/61

DEĊIŻJONI (UE) 2019/976 TAL-BANK ĊENTRALI EWROPEW

tad-29 ta' Mejju 2019

li tistabbilixxi l-prinċipji għad-definizzjoni ta' objettivi u l-kondiviżjoni ta' feedback fi ħdan it-timijiet superviżorji konġunti u li tħassar id-Deċiżjoni (UE) 2017/274 (BĊE/2019/14)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (UE) Nru 1024/2013 tal-15 ta' Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta' politiki relatati mas-superviżjoni prudenzjali ta' istituzzjonijiet ta' kreditu (1), u b'mod partikolari l-Artikolu 6(1) u (7) tiegħu,

Billi:

(1)

L-Artikolu 6(1) tar-Regolament (UE) Nru 1024/2013 jistipula li l-Bank Ċentrali Ewropew (BĊE) huwa responsabbli għall-funzjonament effettiv u konsistenti tal-Mekkaniżmu Superviżorju Uniku (MSU). Il-premessa 79 ta' dak ir-Regolament tistabbilixxi li persunal b'motivazzjoni għolja, imħarreġ sew u imparzjali huwa indispensabbli għal superviżjoni effettiva.

(2)

Skont l-Artikoli 3 sa 6 tar-Regolament (UE) Nru 468/2014 tal-Bank Ċentrali Ewropew (BĊE/2014/17) (2), il-BĊE huwa inkarigat mill-istabbiliment u l-kompożizzjoni ta' timijiet superviżorji konġunti li huma komposti minn membri tal-persunal mill-BĊE u mill-awtoritajiet nazzjonali kompetenti. Koordinatur ta' tim superviżorju konġunt (TSK), assistit minn subkoordinatur wieħed jew iżjed tal-awtorità nazzjonali kompetenti (ANK), jiżgura l-koordinazzjoni tax-xogħol fi ħdan it-TSK.

(3)

Fid-dawl tar-rwoli importanti tal-koordinaturi tat-TSK u s-subkoordinaturi tal-ANK fil-koordinazzjoni tax-xogħol tal-membri tat-TSK mill-ANK, huwa neċessarju u proporzjonat li jiddaħħal proċess uniformi għad-definizzjoni tal-objettivi u l-kondiviżjoni tal-feedback fi ħdan it-TSK.

(4)

Il-feedback dwar il-prestazzjoni tas-subkoordinaturi tal-ANK kien ipprovdut qabel matul perijodu ta' prova inizjali bbażat fuq id-Deċiżjoni (UE) 2016/3 tal-Bank Ċentrali Ewropew (BĊE/2015/36) (3), u mbagħad matul perijodu ta' prova sussegwenti skont il-prinċipji stabbiliti fid-Deċiżjoni (UE) 2017/274 tal-Bank Ċentrali Ewropew (BĊE/2017/6) (4). Peress li dak il-perijodu ta' prova sussegwenti ġie konkluż, id-Deċiżjoni (UE) 2017/274 (BĊE/2017/6) għandha tiġi rrevokata fl-interessi taċ-ċertezza legali.

(5)

L-esperjenza akkwistata matul dak il-perijodu ta' prova sussegwenti indikat li mekkaniżmu ta' feedback fi ħdan it-TSK jista' jkun utli biex jiġi żgurat il-funzjonament effettiv tagħhom, kollaborazzjoni u djalogu aħjar, u sabiex ikomplu jinbnew aktar il-fiduċja u l-ftuħ fi ħdan dawk it-timijiet. Il-mekkaniżmu ta' feedback għalhekk għandu jitkompla u jintuża fuq bażi regolari. Madankollu, sabiex jiġu akkomodati reviżjonijiet li għandhom isiru għall-mekkaniżmu tal-feedback, jenħtieġ li tiġi adottata Deċiżjoni ġdida. Għalhekk, id-Deċiżjoni (UE) 2017/274 (BĊE/2017/6) għandha titħassar u tiġi ssostitwita b'din id-Deċiżjoni.

(6)

L-ANK huma weħidhom responsabbli għall-evalwazzjoni tal-persunal tagħhom, u l-BĊE huwa responsabbli biss għall-evalwazzjoni tal-persunal tiegħu. Fil-ġestjoni tal-persunal, l-ANK jistgħu jużaw il-feedback mogħti mill-koordinaturi tat-TSK lis-subkoordinaturi tal-ANK, jekk jitħallew jagħmlu dan taħt il-liġi nazzjonali relevanti, u l-BĊE jista' juża l-feedback mogħti mill-koordinatur tat-TSK, f'kull każ b'mod konformi ma' din id-Deċiżjoni.

(7)

Is-Superviżur Ewropew tal-Protezzjoni tad-Dejta ġie kkonsultat skont l-Artikolu 27 tar-Regolament (KE) Nru 45/2001 tal-Parlament Ewropew u tal-Kunsill (5) u huwa ta opinjoni fis-7 ta' April 2015 li rrikonoxxiet li l-feedback huwa meħtieġ għall-ġestjoni tat-TSK, u filwaqt li approva l-mekkaniżmu tal-feedback ta parir li l-operazzjoni preċiża tiegħu tiġi ddefinita fi strument legali xieraq,

ADOTTA DIN ID-DEĊIŻJONI:

Artikolu 1

Definizzjonijiet

Għall-finijiet ta' din id-Deċiżjoni, għandhom japplikaw id-definizzjonijiet li jinsabu fl-Artikolu 2 tar-Regolament (UE) Nru 1024/2013 u fl-Artikolu 2 tar-Regolament (UE) Nru 468/2014 (BĊE/2014/17).

Artikolu 2

Iffissar ta' objettivi u kondiviżjoni ta' feedback

1.   Mingħajr preġudizzju għar-responsabbiltà unika tal-ANK bħala l-impjegatur tas-subkoordinaturi tal-ANK, il-koordinaturi tat-TSK għandhom, wara konsultazzjoni ma' kull subkoordinatur tal-ANK, jistabbilixxu l-kompiti u l-objettivi ewlenin ta' dak is-subkoordinatur tal-ANK.

2.   L-objettivi u l-kompetenzi tar-rwol tal-koordinatur tat-TSK huma ddefiniti fi ħdan il-kuntest tal-proċess ta' ġestjoni u żvilupp tal-prestazzjoni tal-BĊE. Għall-finijiet tal-feedback fi ħdan it-TSK, is-subkoordinaturi tal-ANK għandhom jiġu infurmati dwar dawk il-kompetenzi stipulati u ddefiniti fil-qafas ta' kapaċità tal-BĊE (6) li huma applikabbi għar-rwol ta' koordinatur tat-TSK.

3.   Il-feedback għandu jkun reċiproku: il-koordinaturi tat-TSK għandhom jipprovdu feedback lis-subkoordinaturi tal-ANK u s-subkoordinaturi tal-ANK għandhom jipprovdu feedback lill-koordinaturi tat-TSK, skont il-prinċipji stabbiliti fl-Anness I.

4.   Il-koordinatur relevanti tat-TSK u s-subkoordinaturi relevanti tal-ANK għandhom jipprovdu feedback konġuntament lit-TSK tagħhom bħala ħaġa sħiħa dwar kif dak it-tim ikun laħaq l-objettivi tiegħu skont il-prinċipji stabbiliti fl-Anness I.

5.   Il-koordinaturi tat-TSK u s-subkoordinaturi tal-ANK għandhom jimmiraw li jipprovdu feedback fil-kuntest ta' laqgħa wiċċ imb'wiċċ.

6.   Il-perijodu ta' referenza li għalih jiġu ddefiniti objettivi u jingħata feedback għandu jkun il-perijodu mill-1 ta' Jannar sal-31 ta' Diċembru ta' kull sena.

7.   Il-feedback irreġistrat fl-għodda tas-sistema li jintuża biex jimmaniġġja l-proċess tal-feedback għandu jiġi aċċessat biss minn persuni li jissodisfaw il-kriterji tal-ħtieġa ta' tagħrif kif stipulati fir-Regolament (UE) 2018/1725 tal-Parlament Ewropew u tal-Kunsill (7). Kategoriji speċifiċi ta' persuni interessati li jkollhom ħtieġa ta' tagħrif tal-feedback għandhom jiġu stipulati fir-rekord relevanti tal-operazzjoni tal-ipproċessar u l-avviż ta' privatezza pprovdut lis-suġġetti tad-dejta.

Artikolu 3

Revoka

Id-Deċiżjoni (UE) 2017/274 (BĊE/2017/6) hija b'dan imħassra.

Artikolu 4

Dispożizzjonijiet finali

1.   Din id-Deċiżjoni għandha tidħol fis-seħħ fit-tielet jum wara l-pubblikazzjoni tagħha f'Il-Ġurnal Uffiċjali tal-Unjoni Ewropea.

2.   B'deroga mill-Artikolu 2(6), l-ewwel perijodu ta' referenza li għalih huma ddefiniti l-objettivi u li għalih jingħata l-feedback għandu jibda fid-data tad-dħul fis-seħħ ta' din id-Deċiżjoni u għandu jintemm fil-31 ta' Diċembru tal-istess sena.

Magħmul fi Frankfurt am Main, id-29 ta' Mejju 2019.

Għall-Kunsill Governattiv tal-BĊE

Il-President tal-BĊE

Mario DRAGHI

(1)  ĠU L 287, 29.10.2013, p. 63.

(2)  Regolament (UE) Nru 468/2014 tal-Bank Ċentrali Ewropew tas-16 ta' April 2014 li jistabbilixxi l-qafas għal kooperazzjoni fi ħdan il-Mekkaniżmu Superviżorju Uniku bejn il-Bank Ċentrali Ewropew u l-awtoritajiet nazzjonali kompetenti u mal-awtoritajiet nazzjonali ddenominati (Regolament Qafas dwar l-MSU) (BĊE/2014/17) (ĠU L 141, 14.5.2014, p. 1).

(3)  Deċiżjoni (UE) 2016/3 tal-Bank Ċentrali Ewropew tat-18 ta' Novembru 2015 li tistabbilixxi l-prinċipji għall-għoti ta' feedback dwar il-prestazzjoni tas-subkoordinaturi tal-awtoritajiet nazzjonali kompetenti fit-timijiet superviżorji konġunti tal-Mekkaniżmu Superviżorju Uniku (BĊE/2015/36) (ĠU L 1, 5.1.2016, p. 4).

(4)  Deċiżjoni (UE) 2017/274 tal-Bank Ċentrali Ewropew tal-10 ta' Frar 2017 li tistabbilixxi prinċipji biex jingħata feedback dwar il-prestazzjoni lil subkoordinaturi tal-awtoritajiet nazzjonali kompetenti u li tħassar id-Deċiżjoni (UE) 2016/3 (BĊE/2017/6) (ĠU L 40, 17.2.2017, p. 72).

(5)  Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu[individwi] fir-rigward tal-ipproċessar ta' dejta personali mill-istituzzjonijiet u l-korpi tal-Komunità u dwar il-moviment liberu ta' dak id-dejta (ĠU L 8, 12.1.2001, p. 1).

(6)  Ara d-dokument bit-titolu “The ECB capability framework: the competencies”, disponibbli fuq https://www.ecb.europa.eu/careers/pdf/leadership_competencies.en.pdf.

(7)  Regolament (UE) 2018/1725 tal-Parlament Ewropew u tal-Kunsill tat-23 ta' Ottubru 2018 dwar il-protezzjoni ta' persuni fiżiċi fir-rigward tal-ipproċessar ta' data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta' tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

ANNESS I

Prinċipji għad-definizzjoni tal-objettivi u l-kondiviżjoni ta' feedback f'timijiet superviżorji konġunti tal-Mekkaniżmu Superviżorju Uniku

Prinċipju 1

Iffissar ta' objettivi

1.

 Mingħajr preġudizzju għar-responsabbiltà unika tal-ANK bħala l-impjegatur ta' subkoordinaturi ta' ANK fil-bidu ta' kull perijodu ta' referenza jew meta subkoordinatur ta' ANK ikun ingħaqad ma' TSK, il-koordinatur tat-TSK, wara konsultazzjoni mas-subkoordinatur tal-ANK, għandu jistabbilixxi l-kompiti ewlenin u l-objettivi għal kull subkoordinatur ta' ANK.

2.

 Il-koordinatur tat-TSK u s-subkoordinatur tal-ANK jiddefinixxu konġuntament l-objettivi tat-tim u jikkomunikaw dawn l-objettivi lit-TSK annwalment matul laqgħa tat-TSK li għandha sseħħ fil-bidu ta' kull perijodu ta' referenza jew meta jkun ġie stabbilit TSK ġdid.

3.

 Il-kompiti u l-objettivi miftiehma għas-subkoordinaturi tal-ANK jistgħu jiġu rreġistrati fl-għodda tas-sistema użata għal-immaniġġjar tal-proċess tal-feedback.

Prinċipju 2

Kondiviżjoni ta' feedback

1.

 Il-koordinatur tat-TSK jipprovdi ta' mill-inqas darba fis-sena, fi kwalunkwe każ, wara t-tmiem ta' perijodu ta' referenza, feedback wiċċ imb'wiċċ lis-subkoordinatur tal-ANK dwar kif huma u t-timijiet tagħhom laħqu l-objettivi rispettivi tagħhom. Dan il-feedback iqis il-kompetenzi stabbiliti fl-Anness II.

2.

 Is-subkoordinatur tal-ANK jipprovdi ta' mill-inqas darba fis-sena, fi kwalunkwe każ, wara t-tmiem ta' perijodu ta' referenza, feedback wiċċ imb'wiċċ lill-koordinatur tat-TSK dwar il-koordinazzjoni tagħhom tat-TSK. Dan il-feedback iqis il-kompetenzi stipulati fil-qafas tal-kapaċità tal-BĊE.

3.

 Il-feedback kondiviż bejn il-koordinatur tat-TSK u s-subkordinatur tal-ANK kif deskritt fil-Prinċipju 2.1 u 2.2 jiġi rreġistrat, fuq talba mir-riċevitur tal-feedback permezz tal-għodda tas-sistema, fl-għodda tas-sistema, li tintuża għall-immaniġġjar tal-proċess tal-feedback.

4.

 Il-koordinatur tat-TSK u s-subkoordinatur tal-ANK jipprovdu feedback konġuntament lit-TSK tagħhom dwar kif it-tim laħaq l-objettivi tiegħu. Dan il-feedback jingħata lit-TSK ta' mill-inqas darba fis-sena, fi kwalunkwe każ, wara t-tmiem ta' perijodu ta' referenza, matul laqgħa tat-TSK.

5.

 Sabiex jiġi żgurat djalogu kontinwu, il-koordinatur tat-TSK jipprovdi lil kull subkoordinatur tal-ANK bi gwida u feedback kontinwu matul is-sena.

6.

 Il-koordinatur tat-TSK u s-subkoordinatur tal-ANK jipprovdu gwida u feedback kontinwu lit-tim tagħhom matul is-sena.

Prinċipju 3

Aċċess għall-feedback irreġistrat fl-għodda tas-sistema

1.

 Aċċess għall-feedback irreġistrat fl-għodda tas-sistema użata għall-immaniġġjar tal-proċess tal-feedback jingħata lill-koordinatur tat-TSK u lis-subkoordinatur tal-ANK.

2.

 Aċċess mill-persunal tal-BĊE, minbarra l-koordinatur tat-TSK u l-amministratur tal-proċess għall-feedback irreġistrat fl-għodda tas-sistema użata għall-ġestjoni tal-proċess tal-feedback jista' jiġi pprovdut fuq il-bażi tal-ħtieġa ta' tagħrif skont ir-Regolament (UE) 2018/1725.

3.

 Fuq talba tal-ANK relevanti, din għandha tingħata aċċess u titħalla tuża l-feedback dwar is-subkoordinatur tal-ANK irreġistrat fl-għodda tas-sistema użata għall-immaniġġjar tal-proċess tal-feedback, jekk dan ikun disponibbli:

(a)

għall-finijiet tal-iffaċilitar tal-ġestjoni tal-persunal tagħha, jekk dan ikun awtorizzat mil-liġi nazzjonali applikabbli;

(b)

bħala input biex jiġu identifikati ħtiġijiet ta' żvilupp professjonali, inklużi ħtiġijiet ta' taħriġ, tas-subkoordinaturi tat-TSK, b'mod konformi mar-regoli interni tal-ANK.

(c)

għall-ħolqien/tħejjija ta' valutazzjonijiet, jekk dan ikun awtorizzat taħt il-liġi nazzjonali relevanti.

4.

 L-aċċess għall-feedback, inkluż it-trasferiment tiegħu, jingħata lill-ANK skont l-Artikolu 9(1)(a) tar-Regolament (UE) 2018/1725. Jekk jiġu riċevuti talbiet għal feedback u jsir trasferiment, is-subkoordinatur tal-ANK ikkonċernat jiġi infurmat kif meħtieġ.

Prinċipju 4

Protezzjoni ta' dejta personali pproċessata fil-kuntest tal-kondiviżjoni ta' feedback

1.

 Kull dejta personali relatata mal-iffissar ta' objettivi u l-kondiviżjoni ta' feedback dwar kif għandhom jintlaħqu dawn l-objettivi tiġi pproċessata mill-BĊE b'mod konformi mar-Regolament (UE) 2018/1725.

2.

 Dejta personali relatata mal-iffissar tal-objettivi u l-kondiviżjoni tal-feedback dwar kif jintlaħqu dawk l-objettivi tintuża biss għall-finijiet deskritti fil-Prinċipju 3, u tista' tinżamm għal perijodu massimu ta' ħames snin.

ANNESS II

Lista ta' kompetenzi partikolarment rilevanti għall-persunal li jaħdem fl-MSU (kompetenzi MSU)

 

Tagħrif professjonali: Tagħrif dwar politiki, metodoloġiji u regolamenti superviżorji, speċjalment fil-kuntest tal-MSU, kif ukoll dwar il-funzjonament tal-istituzzjonijiet finanzjarji. Wieħed għandu jżomm aġġornat dwar żviluppi f'dawk l-oqsma u japplika l-għarfien għall-oqsma ta' xogħol relevanti.

 

Komunikazzjoni: Wieħed għandu jagħti informazzjoni b'mod ċar u konċiż lil gruppi jew individwi, jew verbalment jew bil-miktub, sabiex jiġi żgurat li huma jifhmu l-informazzjoni u l-messaġġ. Wieħed għandu jisma' u jirrispondi b'mod xieraq lil ħaddieħor.

 

Kooperazzjoni u kollaborazzjoni: Wieħed għandu jibni u jiżviluppa relazzjonijiet ta' ħidma kontinwi u kollaborattivi mal-kollegi tiegħu sabiex jitwettqu l-kompiti tal-MSU tat-tim bid-dimensjoni Ewropea tagħhom. Wieħed għandu jiżviluppa u jżomm relazzjonijiet effettivi ma' ħaddieħor sabiex tiġi mħeġġa u appoġġata l-ħidma bejn tim. Wieħed għandu jaqsam b'mod proattiv dejta, informazzjoni u tagħrif fi ħdan it-tim.

 

Determinazzjoni fil-kisba ta' objettivi: Wieħed għandu jwettaq kompiti b'tenaċità u perseveranza, isegwi soluzzjonijiet ta' suċċess waqt li jadatta l-imġiba tiegħu stess biex jinstab approċċ adattat għall-kisba ta' eżitu ta' suċċess.

 

Ġudizzju u intrużività: Wieħed għandu janalizza u jivvaluta sitwazzjonijiet, dejta u informazzjoni sabiex jiġu żviluppati strateġiji, pjanijiet u politiki xierqa. Wieħed għandu jifhem u jifformula perspettivi differenti u kuntrarji dwar kwistjoni, jekk meħtieġ, jadatta l-approċċi hekk kif jinbidlu l-ħtiġijiet ta' sitwazzjoni, waqt li jikkunsidra l-problemi minn perspettivi ġodda u jespandi fuq il-ħsieb jew is-soluzzjonijiet proposti minn ħaddieħor. Wieħed għandu jipprova jifhem bis-sħiħ il-kwistjonijiet qabel ma jagħmel rakkomandazzjoni jew jilħaq konklużjoni, waqt li jiġbor informazzjoni sħiħa u preċiża hekk kif meħtieġ, u jasal għal ġudizzju sod billi jistaqsi b'rispett serje ta' domandi intrużivi u billi jfittex kontinwament għal kwistjonijiet potenzjali u informazzjoni varja.

 

Kuxjenza wiesgħa u li wieħed ikun iħares 'il quddiem: Wieħed għandu jħares lil hinn mir-rwol tiegħu stess sabiex jistabbilixxi l-kuntest usa' li fih jopera, billi jifhem bis-sħiħ id-diversi funzjonijiet/oqsma, billi juri kuxjenza dwar diversi kuntesti kulturali u perspettivi, u billi jevalwa l-implikazzjonijiet tad-deċiżjonijiet tiegħu fuq ħaddieħor. Wieħed għandu jħares 'il quddiem u jantiċipa opportunitajiet u theddid fil-futur, jieħu azzjoni biex joħloq opportunitajiet jew biex jevita kwistjoni fil-futur.

 

Aġir oġġettiv b'integrità u indipendenza: Wieħed għandu jaġixxi b'mod indipendenti u oġġettiv, fl-interess tal-Unjoni bħala ħaġa sħiħa, fuq il-bażi tal-istandards professjonali tal-MSU, waqt li jivverifika ċ-ċirkustanzi biex jikseb stampa sħiħa u realistika ta' sitwazzjoni. Wieħed għandu jaħdem biex inaqqas jew jelimina preferenzi, preġudizzji jew evalwazzjonijiet soġġettivi billi jibbaża fuq dejta u fatti verifikabbli.

 

Immaniġġjar ta' timijiet tal-MSU (applikabbli għal maniġers biss): Wieħed għandu jidderieġi lit-timijiet (virtwali/remoti) u jiggwidahom lejn l-objettivi tat-tim. Wieħed għandu jikkoordina l-attivitajiet tat-tim bejn fruntieri, billi jipprovdi direzzjoni u billi juża l-kompetenzi u d-diversità tagħhom bl-aktar mod effettiv u effiċjenti. Wieħed għandu jnaqqas u jimmaniġġja l-ambigwità u jsib mod kif jidderieġi u jwassal ir-riżultati taħt inċertezza.
Top