21.5.2016   

MT

Il-Ġurnal Uffiċjali tal-Unjoni Ewropea

L 132/129

(1)

Skont l-Artikolu 1(4) tal-Linja Gwida (UE) 2015/510 (BĊE/2014/60), il-Kunsill Governattiv jista', f'kull ħin, jibdel l-istrumenti, ir-rekwiżiti, il-kriterji u l-proċeduri għall-implimentazzjoni ta' operazzjonijiet tal-politika monetarja tal-Eurosistema.

(2)

Fid-29 ta' Lulju 2014, fit-twettiq tal-mandat tiegħu għall-istabbiltà tal-prezzijiet u fil-kuntest tal-miżuri mmirati għat-titjib tal-funzjonament tal-mekkaniżmu ta' trasmissjoni għall-politika monetarja bl-appoġġ ta' self lill-ekonomija reali, il-Kunsill Governattiv adotta d-Deċiżjoni BĊE/2014/34 (2). Din id-Deċiżjoni stabbilixxiet sensiela ta' operazzjonijiet speċifiċi ta' rifinanzjament għal żmien itwal (TLTROs) li għandhom jitwettqu fuq perijodu ta' sentejn.

(3)

Fl-10 ta' Marzu 2016, sabiex tissaħħaħ il-pożizzjoni tal-politika monetarja akkomodanti u sabiex tissaħħaħ it-trasmissjoni tal-politika monetarja billi jiġi inċentivat is-self tal-bank lill-ekonomija reali, il-Kunsill Governattiv iddeċieda li jagħmel sensiela ġdida ta' erba' operazzjonijiet speċifiċi ta' rifinanzjament għal żmien itwal (TLTROs-II). It-termini għal dawn it-TLTROs-II għandhom jiġu stabbiliti f'deċiżjoni separata. Sabiex l-istituzzjonijiet ikunu jistgħu jħallsu lura l-ammonti mislufa taħt it-TLTROs u jissellfu taħt it-TLTROs-II, il-Kunsill Governattiv ddeċieda li jintroduċi f'Ġunju 2016 il-possibbiltà ta' ħlas lura volontarju addizzjonali għat-TLTROs pendenti kollha.

(4)

Il-Kunsill Governattiv ddeċieda wkoll li l-ebda obbligu ta' rappurtar ulterjuri ma japplika għall-parteċipanti li ssottomettew id-dejta meħtieġa għall-kalkolu tal-ħlas lura bikri obbligatorju f'Settembru 2016.

(5)

Sabiex istituzzjonijiet ta' kreditu jkollhom żmien biżżejjed biex jagħmlu preparazzjonijiet operattivi għall-ewwel TLTRO-II, din id-Deċiżjoni għandha tidħol fis-seħħ mingħajr dewmien bla bżonn.

(6)

Għaldaqstant, id-Deċiżjoni BĊE/2014/34 għandha tiġi emendata kif meħtieġ,

1.

L-Artikolu 6 huwa ssostitwit b'dan li ġej:

“Artikolu 6

Ħlas lura bikri

1.   Mingħajr preġudizzju għall-paragrafu 2, bil-bidu jkun 24 xahar wara kull TLTRO, il-parteċipanti għandu jkollhom, fuq bażi semi-annwali, l-opzjoni li jitterminaw jew inaqqsu l-ammont tat-TLTROs qabel il-maturità. Dati ta' ħlas lura bikri għandhom jikkoinċidu ma' jum il-ħlas ta' operazzjoni ewlenija ta' rifinanzjament, kif speċifikat mill-Eurosistema.

2.   Il-partecipanti għandu jkollhom ukoll l-opzjoni li jitterminaw jew inaqqsu l-ammont ta' TLTROs qabel il-maturità f'data li tikkoinċidi ma' jum il-ħlas tal-ewwel TLTRO mwettaq bis-saħħa tad-Deċiżjoni (UE) 2016/810 tal-Bank Ċentrali Ewropew (BĊE/2016/10) (*). Sabiex jibbenefika mill-proċedura ta' ħlas lura bikri f'din l-ewwel data ta' ħlas lura bikri, parteċipant għandu jinnotifika lill-BĊN relevanti li biħsiebu jħallas lura bil-proċedura ta' ħlas lura bikri fid-data ta' ħlas lura bikri, tal-inqas tliet ġimgħat bil-quddiem ta' dik id-data ta' ħlas lura bikri. Din in-notifika għandha tkun vinkolanti fuq il-parteċipant tliet ġimgħat qabel id-data ta' ħlas lura bikri li tirreferi għaliha. Biex jiġi evitat id-dubju, l-allowance ta' self addizzjonali disponibbli għat-TLTRO li jsir f'Ġunju 2016 u li tiġi kkalkulata skont l-Artikolu 4(3) għandha tiġi kkalkulata fuq il-bażi tal-ammonti mislufin matul it-TLTROs magħmulin minn Marzu 2015 mingħajr tnaqqis ta' kull ammont imħallas lura fl-ewwel data ta' ħlas lura bikri.

3.   Fir-rigward ta' dati oħrajn ta' ħlas lura, sabiex jibbenefika mill-proċedura ta' ħlas lura bikri, il-parteċipant għandu jinnotifika lill-BĊN relevanti li biħsiebu jħallas lura bil-proċedura ta' ħlas lura bikri fid-data ta' ħlas lura bikri, tal-inqas ġimagħtejn bil-quddiem ta' dik id-data ta' ħlas lura bikri. Din in-notifika għandha tkun vinkolanti fuq il-parteċipant ġimagħtejn qabel id-data ta' ħlas lura bikri li tirreferi għaliha.

4.   Jekk il-partiċipant jonqos milli jħallas sad-data tal-ħlas lura, għal kollox jew parzjalment, l-ammont dovut taħt il-proċedura ta' ħlas lura bikri, tista' tiġi imposta penali finanzjarja. Il-penali finanzjarja applikabbli għandha tiġi kkalkulata skont l-Anness VII tal-Linja Gwida (UE) 2015/510 tal-Bank Ċentrali Ewropew (BĊE/2014/60) (**) u għandha tikkorrispondi mal-penali finanzjarja applikata għal nuqqasijiet ta' konformità ma' obbligi biex jiġi kkollateralizzat b'mod adegwat u mħallas l-ammont li l-kontroparti ġiet assenjat fir-rigward ta' tranżazzjoni mħassra għal għanijiet ta politika monetarja. L-impożizzjoni ta' penali finanzjarja għandha tkun mingħajr ħsara għad-dritt relevanti tal-BĊN li jeżerċita r-rimedji stabbiliti għal meta jseħħ każ ta' inadempjenza kif stabbilit fl-Artikolu 166 tal-Linja Gwida (UE) 2015/510 (BĊE/2014/60).

(*)  Deċiżjoni (UE) 2016/810 tal-Bank Ċentrali Ewropew tat-28 ta' April 2016 dwar it-tieni serje ta' operazzjonijiet speċifiċi ta' rifinanzjament għal żmien itwal (BĊE/2016/10) (ĠU L 132, 21.5.2016, p. 107)."

(**)  Gwida (UE) 2015/510 tal-Bank Ċentrali Ewropew tad-19 ta' Diċembru 2014ĠU L 91, 2.4.2015, p. 3 dwar l-implimentazzjoni tal-politika monetarja tal-Eurosistema (BĊE/2014/60).”;"

2.

fl-Artikolu 7, il-paragrafi 1 u 2 huma ssostitwiti b'dan li ġej:

“1.   Il-parteċipanti fit-TLTROs li s-self nett eliġibbli kumulattiv tagħhom fil-perjodu bejn l-1 ta' Mejju 2014 u t-30 ta' April 2016 ikun inqas mill-kriterju ta' referenza applikabbli tagħhom fit-30 ta' April 2016 għandhom ikunu meħtieġa jħallsu lura għal kollox l-ammonti inizjali u addizzjonali li ssellfu tat-TLTRO fid-28 ta' Settembru 2016, sakemm l-Eurosistema ma tispeċifikax xi data alternattiva oħra. L-Anness I jispjega l-kalkoli tekniċi.

2.   Jekk is-self totali ta' parteċipant fir-rigward ta' provvediment addizzjonali tiegħu fit-TLTROs imwettqin minn Marzu 2015 sa Ġunju 2016 jaqbeż il-provvediment addizzjonali kkalkolat mix-xahar ta' referenza tal-allokazzjoni ta' April 2016, f'dak il-każ l-ammont ta' dan it-teħid b'self addizzjonali eċċessiv għandu jkun pagabbli fid-28 ta' Settembru 2016, sakemm l-Eurosistema ma tispeċifikax xi data alternattiva oħra. L-Anness I jispjega l-kalkoli tekniċi.”;

3.

Fl-Artikolu 7, il-paragrafu 5 huwa mibdul b'li ġej:

“5.   Jekk il-partiċipant jonqos milli jħallas sad-data tal-ħlas lura, għal kollox jew parzjalment, l-ammont dovut taħt il-proċedura ta' ħlas lura bikri obbligatorja, tista tiġi imposta piena finanzjarja. Il-penali finanzjarja applikabbli għandha tiġi kkalkulata skont l-Anness VII tal-Linja Gwida (UE) 2015/510 (BĊE/2014/60) u għandha tikkorrispondi mal-penali finanzjarja applikata għal nuqqasijiet ta' konformità ma' obbligi biex jiġi kkollateralizzat b'mod adegwat u mħallas l-ammont li l-kontroparti ġiet assenjat fir-rigward ta' tranżazzjoni mħassra għal għanijiet ta politika monetarja. L-impożizzjoni ta' penali finanzjarja għandha tkun mingħajr ħsara għad-dritt relevanti tal-BĊN li jeżerċita r-rimedji stabbiliti għal meta jseħħ każ ta' inadempjenza kif stabbilit fl-Artikolu 166 tal-Linja Gwida (UE) 2015/510 (BĊE/2014/60).”;

4.

fl-Artikolu 8, il-paragrafu 4 huwa mibdul b'li ġej:

“4.   Jekk istituzzjoni tieħu sehem f'TLTRO u sakemm ikollha kreditu pendenti f'TLTRO, din għandha tkun meħtieġa tissottometti formoli ta' rapportar tad-dejta mimlijin kull tliet xhur skont il-paragrafu 1 sakemm tkun intbagħtet id-dejta meħtieġa għad-determinazzjoni tal-obbligu tal-ħlas lura obbligatorju skont l-Artikolu 7.”;

5.

fl-Artikolu 8, il-paragrafu 8 huwa mibdul b'li ġej:

“8.   Sakemm ma jkunx ħallas lura l-ammonti kollha pendenti taħt it-TLTROs tiegħu skont l-Artikolu 6(2), kull parteċipant fit-TLTROs għandu jkun meħtieġ li jsirlu eżami tal-eżattezza dwar id-dejta rrapportata skont il-paragrafu 1. Dan l-eżerċizzju, li jista' jsir fil-kuntest ta' verifika annwali, jista' jsir minn awditur estern. Minflok ma jintuża awditur estern, il-partiċipanti jistgħu jagħmlu pjanijiet għal arranġamenti ekwivalenti, kif approvat mill-Eurosistema. Il-BĊN tal-parteċipant għandu jiġi infurmat bir-riżultat ta' dan l-eżami. Fil-każ ta' parteċipazzjoni tal-grupp TLTRO, ir-riżultati għandhom jiġu maqsuma mal-BĊNi tal-membri tal-grupp TLTRO. Fuq talba tal-BĊN tal-partiċipant, riżultati ddettaljati tal-eżamijiet li jsiru skont dan il-paragrafu għandhom jiġu pprovduti lil dak il-BĊN u, fil-każ ta' parteċipazzjoni tal-grupp, sussegwentement jinqasmu mal-BĊNi tal-membri tal-grupp TLTRO.”.