11.4.2014

MT

Il-Ġurnal Uffiċjali tal-Unjoni Ewropea

C 109/2

---

OPINJONI TAL-BANK ĊENTRALI EWROPEW

tas-6 ta’ Novembru 2013

dwar proposta għal Regolament tal-Parlament Ewropew u tal-Kunsill li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta' kreditu u ċert[i] ditti tal-investiment fil-qafas ta’ Mekkaniżmu Uniku ta’ Riżoluzzjoni u Fond Uniku għar-Riżoluzzjoni tal-Banek u li jemenda r-Regolament (UE) Nru 1093/2010 tal-Parlament Ewropew u tal-Kunsill

(CON/2013/76)

2014/C 109/02

Introduzzjoni u bażi legali

Fit-3 ta’ Settembru 2013, il-Bank Ċentrali Ewropew (BĊE) irċieva talba mill-Kunsill tal-Unjoni Ewropea għal opinjoni dwar proposta għal Regolament tal-Parlament Ewropew u tal-Kunsill li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta’ kreditu u ċert[i] ditti tal-investiment fil-qafas ta’ Mekkaniżmu Uniku ta’ Riżoluzzjoni u Fond Uniku għar-Riżoluzzjoni tal-Banek u li jemenda r-Regolament (UE) Nru 1093/2010 tal-Parlament Ewropew u tal-Kunsill (1) (iktar “il quddiem ir-‘regolament propost’). Fl-14 ta” Ottubru 2013, il-BĊE rċieva talba mingħand il-Parlament Ewropew għal opinjoni dwar ir-regolament propost.

Il-kompetenza tal-BĊE biex jagħti opinjoni hija bbażata fuq l-Artikoli 127(4) u 282(5) tat-Trattat dwar il-Funzjonament tal-Unjoni Ewropea billi r-regolament propost fih dispożizzjonijiet li jaffettwaw il-kompiti tal-BĊE dwar politiki fuq is-superviżjoni prudenzjali ta’ istituzzjonijiet ta’ kreditu u istituzzjonijiet finanzjarji oħrajn bl-eċċezzjoni ta’ impriżi tal-assigurazzjoni, kif imsemmi fl-Artikolu 127(6) tat-Trattat u dispożizzjonijiet li jaffettwaw il-kontribuzzjoni tas-Sistema Ewropea ta’ Banek Ċentrali għat-tmexxija bla xkiel tal-politiki dwar l-istabbiltà tas-sistema finanzjarja, kif imsemmi fl-Artikoli 127(5) tat-Trattat. Skont l-ewwel sentenza tal-Artikolu 17.5 tar-Regoli tal-Proċedura tal-Bank Ċentrali Ewropew, il-Kunsill Governattiv adotta din l-opinjoni.

1.   Osservazzjonijiet ġenerali

Il-BĊE jappoġġa bis-sħiħ l-istabbiliment tal-Mekkaniżmu Uniku ta’ Riżoluzzjoni (MUR), li ser jikkontribwixxi biex tissaħħaħ l-arkitettura u l-istabbiltà tal-unjoni ekonomika u monetarja. Il-BĊE jieħu wkoll din l-opportunità biex itenni l-pożizzjoni li esprima fl-Opinjoni tas-27 ta’ Novembru 2012 fuq proposta għal regolament tal-Kunsill li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta’ istituzzjonijiet ta’ kreditu u proposta għal Regolament tal-Parlament Ewropew u tal-Kunsill (UE) Nru 1093/2010 li jistabbilixxi Awtorità Superviżorja Ewropea (Awtorità Bankarja Ewropea) (CON/2012/96) (2), jiġifieri li l-MUR jikkumplimenta neċessarjament il-Mekkaniżmu Superviżorju Uniku (MSU) sabiex ikun hemm unjoni tas-suq finanzjarju li taħdem tajjeb. Għalhekk, mekkaniżmu bħal dan għandu jiġi stabbilit sa meta l-BĊE jassumi għal kollox ir-responsabbilità superviżorja tiegħu. Ir-regolament propost fih tliet elementi essenzjali għal riżoluzzjoni effettiva, jiġifieri: (a) sistema waħda, (b) awtorità waħda, u (c) fond wieħed. Ir-regolament propost jirrispondi għall-Konklużjonijiet tal-Kunsill Ewropew tat-13/14 ta' Diċembru 2012 u tas-27/28 ta' Ġunju 2013 (3) li jibnu fuq ir-rapport “Lejn Unjoni Ekonomika u Monetarja ġenwina”. (4)

Il-BĊE huwa tal-fehma li l-prinċipji ġenerali msemmija fil-paragrafi li ġejjin huma ta’ importanza ewlenija sabiex il-MUR ikun effettiv, u jilqa’ l-fatt li huma fil-biċċa l-kbira riflessi fir-regolament propost.

1.1   L-ambitu tal-MUR għandu jinkludi kull istituzzjoni ta’ kreditu stabbilita fl-Istati Membri li japparteċipaw fl-MSU.

1.2   Awtorità Unika ta’ Riżoluzzjoni (AUR) b’saħħitha u indipendenti għandha tkun fil-qalba tal-MUR, b’biżżejjed awtorità biex tieħu deċiżjonijiet dwar it-teħid ta’ azzjoni ta’ riżoluzzjoni fl-interess tal-istabbiltà fi ħdan iż-żona tal-euro u l-Unjoni bħala ħaġa sħiħa. Il-MUR jikkumplimenta neċessarjament lill-MSU (5), billi l-livelli ta’ responsabbiltà u tat-teħid ta’ deċiżjonijiet għar-riżoluzzjoni u s-superviżjoni jridu jiġu allinjati. F’dan ir-rigward, il-BĊE jaqbel mal-fehma tal-Kummissjoni li mekkaniżmu uniku bħal dak qiegħed f’pożizzjoni aħjar biex jiggarantixxi l-aħjar azzjoni ta’ riżoluzzjoni, inkluż qsim tal-piż adegwat, milli netwerk ta’ awtoritajiet ta’ riżoluzzjoni nazzjonali. Il-koordinament bejn is-sistemi ta’ riżoluzzjoni nazzjonali wera li ma huwiex biżżejjed biex jittieħdu deċiżjonijiet l-iktar f’waqthom u bl-inqas spejjeż possibbli, partikolarment f’kuntest transkonfinali.

1.3   Il-proċess ta’ teħid ta’ deċiżjonijiet għandu jippermetti t-teħid ta’ deċiżjonijiet f’waqthom u b’mod effiċjenti, jekk meħtieġ, fi żmien qasir ħafna, pereżempju fi ftit jiem jew, jekk ikun meħtieġ, fi ftit sigħat. Għandu jkun ibbażat fuq ippjanar ta’ riżoluzzjoni adegwat.

1.4   L-AUR għandu jkollha poteri, għodod u riżorsi finanzjarji adegwati biex tirriżolvi istituzzjonijiet kif ipprovdut fid-Direttiva dwar l-Irkupru u r-Riżoluzzjoni tal-Banek (Bank Recovery and Resolution Directive - BRRD).

1.5   L-AUR għandu jkollha aċċess għall-finanzjament ta’ riżoluzzjoni permezz tal-Fond Uniku għar-Riżoluzzjoni tal-Banek (FURB), li għandu jkun iffinanzjat b’kontribuzzjonijiet bbażati fuq ir-riskju ex ante mill-banek kollha suġġetti għall-MUR, biex jiġu kkumplementati b’kontribuzzjonijiet ex post fejn meħtieġ. Barra minn hekk, garanzija ta’ kontinġenza (backstop) pubblika, fiskalment newtrali, temporanja għandha tkun disponibbli, li tista’ tiġi pprovduta fil-forma ta’ linja ta’ kreditu lill-FURB.

1.6   Il-qafas previst għall-MUR għandu jipprovdi għall-koordinazzjoni mill-qrib bejn il-funzjoni ta’ riżoluzzjoni tal-MUR u l-funzjoni superviżorja tal-MSU filwaqt li jikkonforma ma’ u jirrispetta r-responsabbiltajiet istituzzjonali rispettivi.

Kemm l-MSU kif ukoll il-MUR huma partijiet essenzjali tal-qafas finanzjarju integrat tal-Unjoni Bankarja, li ser jgħin biex tinqata’ r-rabta bejn banek u sovrani fl-Istati Membri kkonċernati u jiġi mreġġa’ lura l-proċess kurrenti tal-frammentazzjoni tas-suq finanzjarju.

Il-BĊE jappoġġa bis-sħiħ il-kronoloġija prevista għall-MUR. Skont din il-kronoloġija, il-MUR għandu jidħol fis-seħħ sa nofs l-2014 u jsir operattiv għal kollox fl-1 ta’ Jannar 2015. Din il-kronoloġija tqis li l-MUR huwa element ewlieni tal-Unjoni Bankarja.

2.   Osservazzjonijiet speċifiċi

2.1   Bażi legali

Il-Kummissjoni qed tissuġġerixxi li tibbaża r-regolament propost fuq l-Artikolu 114 tat-Trattat, li jippermetti l-adozzjoni ta’ miżuri għall-approssimazzjoni tad-dispożizzjonijiet nazzjonali li bħala għan għandhom l-istabbiliment u l-funzjonament tas-suq intern. Il-BĊE huwa konsapevoli mill-valutazzjonijiet li huma għaddejin minn istituzzjonijiet oħrajn tal-Unjoni dwar il-bażi legali proposta u jinnota t-tibdil li ġie ssuġġerit fir-regolament propost biex jiġi żgurat li l-Artikolu 114 huwa bażi legali possibbli biex jintlaħaq l-għan tar-regolament propost għall-preservazzjoni tal-integrità u t-titjib tal-funzjonament tas-suq intern permezz ta’ applikazzjoni uniformi ta’ sett wieħed ta’ regoli ta’ riżoluzzjoni minn awtorità tal-Unjoni u aċċess għall-FURB.

2.2   Governanza u responsabbiltà tal-Bord Uniku ta’ Riżoluzzjoni

B’mod ġenerali, il-BĊE jilqa’ l-qafas ta’ governanza propost, partikolarment il-fatt li l-ebda parti, speċifikament l-awtoritajiet ta’ riżoluzzjoni nazzjonali, mhu ser ikollha s-setgħa tal-veto fit-teħid ta’ deċiżjonijiet tal-Bord Uniku ta’ Riżoluzzjoni (iktar “il quddiem il-‘Bord ta’ Riżoluzzjoni”). Filwaqt li s-setgħa aħħarija tat-teħid tad-deċiżjonijiet għar-riżoluzzjoni attwali ta’ istituzzjoni ta’ kreditu tibqa’ f’idejn il-Kummissjoni, il-Bord ta’ riżoluzzjoni ser ikollu setgħat wesgħin u indipendenti biex jipprepara pjanijiet ta’ riżoluzzjoni (6) u skemi ta’ riżoluzzjoni (7) u jitlob l-implimentazzjoni tagħhom. Huwa mill-iktar importanti li l-kapaċità ta’ teħid ta’ deċiżjonijiet tal-MUR u l-modalitajiet tal-votazzjoni jiżguraw teħid ta’ deċiżjonijiet effiċjenti u f’waqthom, partikolarment matul perijodi ta’ kriżi. Ir-responsabbiltajiet tal-awtoritajiet involuti fil-proċess ta’ riżoluzzjoni għandhom jiġu ddefinit b’mod iktar preċiż sabiex jiġu evitati d-duplikazzjoni u l-koinċidenza tas-setgħat. Fir-rigward tas-setgħat tal-Bord ta’ Riżoluzzjoni, deskrizzjoni iktar iddettaljata ta’ kif dawn is-setgħat ser jiġu eżegwiti għandha ttejjeb il-konformità mad-duttrina Meroni  (8), sa fejn huwa meħtieġ, bil-għan li jiġi żgurat, fl-istess ħin, li hemm biżżejjed flessibbiltà biex jiġi ttrattat kull każ ta’ riżoluzzjoni individwali. Fl-aħħar nett, ir-regolament propost għandu jiżgura li kull deċiżjoni ta’ riżoluzzjoni attwali mill-Kummissjoni tittieħed fil-pront kemm jista’ jkun (9). Il-BĊE jilqa’ l-qafas propost għar-responsabbiltà tal-Bord ta’ Riżoluzzjoni, li huwa skont il-qafas istituzzjonali tal-Unjoni. Il-ftehim bejn il-Parlament Ewropew u l-Bord ta’ Riżoluzzjoni fuq il-modalitajiet prattiċi tal-eżerċizzju tar-responsabbiltà u s-sorveljanza demokratika (10) għandu jirrispetta l-kunfidenzjalità skont il-liġijiet nazzjonali u tal-Unjoni, partikolarment fir-rigward tal-informazzjoni superviżorja miksuba mill-Bord ta’ Riżoluzzjoni mill-BĊE u l-awtoritajiet kompetenti nazzjonali.

2.3   Kooperazzjoni bejn awtoritajiet ta’ riżoluzzjoni u superviżorji

Il-BĊE jilqa’ l-kooperazzjoni mill-qrib prevista bejn l-awtoritajiet ta’ superviżjoni u l-awtoritajiet ta’ riżoluzzjoni (11). Fir-rigward tal-BĊE, il-kompiti u r-responsabbiltajiet ipprovduti fir-regolament propost għandhom ikunu suġġetti għal u m’għandhomx imorru lil hinn mill-kompiti mogħtija mill-BĊE bit-Trattat, l-Istatut tas-Sistema Ewropea ta’ Banek Ċentrali u tal-Bank Ċentrali Ewropew (l-“Istatut tas-SEBĊ”) u, b’mod partikolari, ir-Regolament tal-Kunsill (UE) Nru 1024/2013 tal-15 ta’ Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta’ istituzzjonijiet ta’ kreditu (12) (ir-“Regolament MSU”). Il-BĊE jinnota li r-regolament propost ma jagħtihx kompiti u responsabbiltajiet ġodda, imma jipprovdi għal kooperazzjoni mill-qrib u skambju ta’ informazzjoni (13). Għall-finijiet ta’ ċarezza, il-BĊE jirrakkomanda li r-referenzi għall-kompiti u r-responsabbiltajiet tal-BĊE fir-regolament propost għandhom jirreferu, meta jkun xieraq, għall-kompiti u r-responsabbiltajiet tal-BĊE kif mogħtija lilu mir-Regolament MSU (14).

Barra minn hekk, il-BĊE jinnota li r-regolament propost jipprovdi li meta l-BĊE jistieden rappreżentant tal-Bord ta’ Riżoluzzjoni biex jipparteċipa fil-Bord Superviżorju tal-BĊE, il-Bord ta’ Riżoluzzjoni għandu jaħtar rappreżentant. Madankollu, ir-Regolament MSU jipprovdi li meta l-Bord ta’ Riżoluzzjoni jinħatar, il-Bord Superviżorju tal-BĊE jista’ jistieden lill-President tal-Awtorità Ewropea ta’ Riżoluzzjoni biex jattendi laqgħat tal-Bord Superviżorju (15) bħala osservatur. Sabiex tiġi żgurata konsistenza sħiħa, ir-regolament propost għandu bżonn li jiġi emendat f’dan id-dawl. (16)

Huwa kruċjali li r-rwoli u r-responsabbiltajiet rispettivi tal-awtoritajiet ta’ riżoluzzjoni u l-awtoritajiet superviżorji jinżammu separati qabel ma tiġi prevista xi kriżi, u fl-ewwel stadju ta’ kriżi, fejn is-superviżur jista’ japplika miżuri ta’ intervent bikri lil istituzzjoni ta’ kreditu, u meta jiġu vvalutati l-kundizzjonijiet għar-riżoluzzjoni u t-tniżżil fil-valur ta’ strumenti kapitali.

L-ewwel nett, matul il-fażi ta’ intervent bikri, l-unika responsabbiltà fir-rigward ta’ azzjonijiet jew miżuri meħuda hija tas-superviżur. Meta jiġu applikati miżuri ta’ intervent bikri, huwa importanti li s-superviżur jinforma lill-Bord ta’ Riżoluzzjoni mingħajr dewmien. Madankollu, id-dmir propost għall-BĊE (jew l-awtoritajiet superviżorji nazzjonali) li jikkonsultaw l-awtoritajiet ta’ riżoluzzjoni qabel ma jieħdu miżuri addizzjonali ta’ intervent bikri ma jaqbilx mal-bżonn li tittieħed azzjoni ta’ intervent bikri fil-pront u effettiva taħt sistema integrata ta’ responsabbiltà superviżorja unika. Għaldaqstant, il-BĊE jew l-awtorità superviżorja nazzjonali għandhom jintalbu biss li jinnotifikaw lill-awtoritajiet ta’ riżoluzzjoni b’dik l-azzjoni kemm jista’ jkun malajr (17). Barra minn hekk, matul il-fażi ta’ intervent bikri, il-Bord ta’ Riżoluzzjoni għandu jwettaq l-attivitajiet preparatorji tiegħu b’mod li jevita l-isfiduċja fis-suq u possibbilment jagħmel agħar is-sitwazzjoni tal-istituzzjoni rilevanti. Għalhekk, attivitajiet bħat-talba għal informazzjoni u spezzjonijiet fil-post għandhom jitwettqu primarjament mis-superviżur li, skont il-BRRD, għandu jipprovdi l-informazzjoni kollha meħtieġa sabiex tiġi ppreparata r-riżoluzzjoni tal-istituzzjoni lill-awtorità ta’ riżoluzzjoni. (18) Attivitajiet investigattivi mhux ikkoordinati u spezzjonijiet fil-post magħmulin mill-awtorità ta’ riżoluzzjoni għandhom jiġu evitati fuq il-bażi li dan jista’ jherri l-fiduċja. (19)

It-tieni nett, fir-rigward tal-valutazzjoni tal-kundizzjonijiet li jattivaw riżoluzzjoni, il-BĊE jinnota li r-regolament propost jirrikonoxxi li s-superviżur qiegħed fl-aħjar pożizzjoni biex jivvaluta jekk istituzzjoni ta’ kreditu hijiex qed tfalli jew x’aktarx tfalli, u jekk ma hemm l-ebda prospett raġonevoli li xi azzjoni alternattiva mis-settur privat jew superviżorju tista’ tipprevjeni l-falliment tiegħu fi żmien raġonevoli (20) . Il-BĊE huwa tal-fehma li l-unika responsabbiltà biex jiġu vvalutati dawn iż-żewġ kriterji għandhom jiġu allokati lill-awtorità superviżorja rispettiva, jiġifieri, il-BĊE jew l-awtoritajiet kompetenti nazzjonali, skont id-distribuzzjoni ta’ kompetenzi li jipprovdi r-Regolament MSU. Dan jiżgura allokazzjoni ċara ta’ responsabbiltajiet fl-interess ta’ azzjoni ta’ riżoluzzjoni fil-pront u effiċjenti (21). Ir-regolament propost għandu jipprovdi li l-Kummissjoni tista’ tiddeċiedi li tpoġġi istituzzjoni f’riżoluzzjoni unikament fuq il-bażi ta’ valutazzjoni superviżorja bħal din (22). Għalhekk, dan tal-aħħar ikun prerekwiżit neċessarju, imma mhux suffiċjenti, biex l-istituzzjoni titpoġġa taħt riżoluzzjoni.

It-tielet nett, is-superviżur qiegħed ukoll fl-aħjar pożizzjoni biex jivvaluta jekk entità jew grupp humiex iktar vijabbli mingħajr tniżżil fil-valur jew konverżjoni kapitali, jew jekk hemmx il-ħtieġa ta’ appoġġ pubbliku straordinarju. Din il-valutazzjoni ta’ vijabbiltà ssir jew qabel jew fl-istess żmien mal-valutazzjoni dwar jekk bank jissodisfax il-kundizzjonijiet għal riżoluzzjoni u għalhekk issir qabel il-bidu ta’ riżoluzzjoni. Għaldaqstant, ir-regolament propost għandu jalloka b’mod ċar ir-responsabbiltà għal din il-valutazzjoni lis-superviżur, u din il-valutazzjoni superviżorja għandha tkun prekundizzjoni neċessarja għal tnaqqis fil-valur jew il-konverżjoni ta’ strumenti kapitali. (23) .

Barra minn dan, biex jiġu żgurati kontrolli u kontrokontrolli xierqa, il-Bord ta’ Riżoluzzjoni u l-Kummissjoni għandhom ikunu f’qagħda li jitolbu valutazzjoni mis-superviżur (il-BĊE jew l-awtorità kompetenti nazzjonali) fi kwalunkwe ħin jekk istituzzjoni qed tfalli jew x’aktarx tfalli, jew jekk titqies li m’għadhiex vijabbli mingħajr tniżżil fil-valur tal-kapital. Dan ipatti għal kull nuqqas ta’ azzjoni superviżorja possibbli f’sitwazzjoni fejn l-awtorità ta’ riżoluzzjoni tqis li jkun meħtieġ li tittieħed azzjoni. (24)

Fl-aħħar nett, ir-regolament propost jipprovdi li l-BĊE u l-awtoritajiet superviżorji nazzjonali għandhom jipprovdu lill-Bord ta’ Riżoluzzjoni u lill-Kummissjoni bl-informazzjoni kollha meħtieġa għall-eżerċizzju tal-kompiti tagħhom. Il-qsim ta’ informazzjoni huwa prerekwiżit importanti sabiex kemm is-superviżjoni kif ukoll ir-riżoluzzjoni jaħdmu b’mod effettiv. Għalhekk għandu jiġi kkjarifikat li kull dmir relatat mal-għoti ta’ informazzjoni ikun reċiproku. B’mod partikolari, is-superviżur għandu jkun infurmat kemm jista’ jkun malajr dwar passi li huma ppjanati li jittieħdu fil-proċedura ta’ riżoluzzjoni, sabiex ikun jista’ jantiċipa implikazzjonijiet possibbli għall-istabbilità finanzjarja u javża lill-awtorità ta’ riżoluzzjoni b’dan kollu. (25)

2.4   Il-parteċipazzjoni tal-BĊE fil-Bord ta’ Riżoluzzjoni u l-involviment ġenerali tal-banek ċentrali

Il-BĊE jindika li l-Premessa 19 tar-regolament propost, li jirriferi għal “rappreżentanti” tal-Kummissjoni u tal-BĊE, ma jikkonformax mal-bqija tar-regolament propost, li taħtu ċerti membri tal-Bord ta’ Riżoluzzjoni jiġu appuntati mill-Kummissjoni u l-BĊE. B’mod iktar speċifiku, l-Artikolu 39 tar-regolament propost jipprovdi li l-Bord ta’ Riżoluzzjoni huwa kompost, inter alia, minn membru maħtur mill-BĊE għal terminu ta’ ħames snin li ma jiġġeddidx. Bis-saħħa tal-Artikolu 43 tar-regolament propost, il-membri tal-Bord ta’ Riżoluzzjoni għandhom jaġixxu b’mod indipendenti u oġġettiv fl-interess tal-Unjoni kollha kemm hi u la jfittxu u lanqas jieħdu struzzjonijiet mill-istituzzjonijiet jew il-korpi tal-Unjoni, jew minn xi Gvern ta’ Stat Membru jew minn xi entità pubblika jew privata oħra. Bis-saħħa tal-Artikoli 45 u 49 tar-regolament propost, il-membru maħtur mill-BĊE għandu jipparteċipa fis-sessjonijiet plenarji kif ukoll fis-sessjonijiet eżekuttivi tal-Bord ta’ Riżoluzzjoni, bi dritt għal vot.

Sabiex tkun riflessa aħjar id-differenza bejn ir-rwol tal-BĊE skont ir-Regolament MSU, u r-rwol tal-BĊE bħala parteċipant fil-Bord ta’ Riżoluzzjoni skont ir-regolament propost, kif ukoll sabiex tinżamm is-separazzjoni tar-responsabbiltajiet istituzzjonali bejn il-funzjoni superviżorja u riżoluttiva fl-Unjoni, il-BĊE jirrakkomanda li l-BĊE jkollu stedina miftuħa biex josserva l-laqgħat (plenarji u eżekuttivi) kollha tal-Bord ta’ Riżoluzzjoni. (26) .

Dwar ir-rwol importanti u l-kompetenza li għandhom il-banek ċentrali fir-rigward tal-istabbiltà finanzjarja u r-responsabbiltajiet makroprudenzjali tagħhom, banek ċentrali nazzjonali – li mhumiex qed jaġixxu bħala awtoritajiet ta’ riżoluzzjoni taħt il-liġi nazzjonali – għandu jkollhom id-dritt li jattendu l-laqgħat tal-Bord bħala osservaturi u għandhom, flimkien mal-BĊE, ikunu involuti fil-valutazzjoni tal-impatt sistemiku ta’ kwalunkwe azzjoni ta’ riżoluzzjoni. (27)

2.5   Valutazzjoni tar-riżolvibbiltà u r-rekwiżit minimu għal fondi proprji u l-obbligazzjonijiet eliġibbli (MREL)

Il-BĊE jilqa’ l-fatt li r-regolament propost jipprovdi li l-Bord ta’ Riżoluzzjoni jagħmel valutazzjoni tar-riżolvibbiltà ta’ kwalunkwe entità msemmija fl-Artikolu 2, f’konsultazzjoni mal-awtorità kompetenti, inkluż l-BĊE. (28) Filwaqt li konsultazzjoni mas-superviżur hija biżżejjed fir-rigward tal-valutazzjoni nnifisha, miżuri għat-tneħħija ta’ impedimenti għar-riżolvibbiltà għandhom jiġu ddeterminati konġuntament u implimentati f’kooperazzjoni mas-superviżur. Dan jirrifletti l-involviment superviżorju qawwi fit-tħejjija ta’ pjanijiet ta’ riżoluzzjoni (29) Din il-valutazzjoni m’għandhiex tassumi xi appoġġ finanzjarju mill-FURB, ħlief għall-għoti ta’ likwidità temporanja. Jekk wieħed jassumi appoġġ għal solvenza mill-fond dan ikun inkonsistenti mal-prinċipju ġenerali li l-azzjonisti u l-kredituri tal-istituzzjoni individwali jew tal-grupp ikunu tal-ewwel biex jassorbu t-telf f’riżoluzzjoni (30)

L-FURB għandu jipprovdi biss riżorsi jekk il-finanzjament ta’ riżoluzzjoni permezz tal-azzjonisti u l-kredituri ma jkunx biżżejjed.

Għalhekk, il-valutazzjoni tar-riżolvibbiltà ta’ istituzzjoni jew ta’ grupp għandha tiżgura li hemm biżżejjed kapaċità għall-assorbiment tat-telf għal strateġija ta’ riżoluzzjoni kredibbli ġewwa l-istituzzjoni jew il-grupp innifsu (31).

Il-BĊE huwa tal-fehma li l-MREL huwa element ewlieni biex tiġi żgurata r-riżolvibbiltà u assorbiment tat-telf adegwat. F’dan ir-rigward, l-awtorità kompetenti għandu jkollha rwol imsaħħaħ fid-determinazzjoni tal-MREL, peress li dan jista’ jkollu impatt dirett fuq in-negożju ta’ bank bħala negozju avvjat u għalhekk huwa ta’ rilevanza għall-awtorità kompetenti. L-MREL għalhekk għandu jkun iddeterminat mill-Bord ta’ Riżoluzzjoni “f’kooperazzjoni” mal-awtorità kompetenti (32). Fir-rigward tad-dispożizzjonijiet ġenerali dwar l-MREL, il-BĊE jifhem li r-regolament propost ser jiżgura konsistenza sħiħa mal-BRRD li ġejja biex b’hekk ikun hemm kontroriferenzi għall-kriterji ta’ eliġibbiltà għal passiv eliġibbli għall-MREL (33).

2.6   Rikapitalizzazzjoni

Ir-regolament propost jipprovdi li d-dispożizzjonijiet tar-rikapitalizzazzjoni għandhom japplikaw mill-1 ta’ Jannar 2018. Dan iffisser li mill-2015 sal-2018, l-MUR jista’ jkollu jirriżolvi banek mingħajr din l-għodda ta’ riżoluzzjoni. Madankollu, jekk fondi pubbliċi jew fondi mill-FURB jintużaw f’riżoluzzjoni, ir-regoli l-ġodda dwar l-għajnuna mill-Istat (34) ser jeħtieġu rikapitalizzazzjoni obbligatorja ta’ kapital u dejn subordinat. Madankollu, ser ikun hemm inċertezza dwar jekk dejn mhux iggarantit prijoritarju jistax jiġi rikapitalizzat billi l-Istati Membri ser ikunu liberi biex jiddeċiedu jekk għandhomx jantiċipaw l-introduzzjoni ta’ qafas rikapitalizzazzjoni.

Fid-dawl ta’ dan, il-BĊE jappoġġa l-implimentazzjoni tal-għodda ta’ rikapitalizzazzjoni qabel l-2018. Ir-rikapitalizzazzjoni diġà hija kkunsidrata bħala priced-in fil-biċċa l-kbira, għalhekk l-impatt fuq il-finanzjament huwa mstenni li jkun marġinali. Barra minn hekk, meta għodda ta’ rikapitalizzazzjoni tkun fis-seħħ dan jikkontribwixxi għaċ-ċertezza legali, il-konsistenza u l-prevedibbiltà biex b’hekk jiġu evitati soluzzjonijiet ad hoc  (35).

Id-dispożizzjoni fuq il-prijorità tal-klejms fl-insolvenza, li tiddetermina l-ordni kif jiġi allokat it-telf f’rikapitalizzazzjoni (36), ma tidhirx li hija identika mad-dispożizzjonijiet tal-BRRD li ġejja. Għalhekk, skont it-test finali adottat mil-leġiżlatur tal-Unjoni, għandha tintlaħaq il-konsistenza. B’mod partikolari, depożiti koperti għandu jkollhom “prijorità super” filwaqt li depożiti eliġibbli minn persuni fiżiċi u impriżi ta’ daqs żgħir u medju għandu jkollhom prijorità fuq klejms mhux iggarantiti prioritarji oħrajn. F’dan ir-rigward, ir-rwol ta’ skemi ta’ garanzija ta’ depożitu f’riżoluzzjoni għandu jiġi allinjat għal kollox mad-dispożizzjonijiet tal-BRRD li ġejja, billi tiġi pprovduta s-surroga tagħhom għad-drittijiet u l-obbligi ta’ depożituri koperti (37).

2.7   Fond Uniku għar-Riżoluzzjoni tal-Banek

Il-BĊE jilqa’ l-fatt li l-MUR ser jinkludi FURB, iffinanzjat minn kontribuzzjonijiet ibbażati fuq riskju ex ante mill-istituzzjonijiet li jinsabu fl-Istati Membri li jipparteċipaw fil-MUR. Kontroll bħal dan ta’ fond ta’ riżoluzzjoni komuni huwa element essenzjali tal-MUR, sabiex jiġi żgurat finanzjament ta’ riżoluzzjoni adegwat mingħajr ma jinġibdu flus minn fondi pubbliċi. Dan ser jippermetti lill-Bord ta’ Riżoluzzjoni biex jieħu miżuri ta’ malajr, mingħajr il-bżonn ta’ diskussjonijiet fit-tul fuq il-qsim tal-piż għal banek transkonfinali biex b’hekk tiġi żgurata l-istrateġija ta’ riżoluzzjoni l-iktar effettiva ekonomikament fil-livell Ewropew. Bil-ġbir tar-riżorsi, il-FURB ser ikun jista’ jipproteġi lill-kontribwenti tat-taxxa b’mod iktar effettiv milli b’arranġamenti nazzjonali, u għalhekk jinkiser in-ness negattiv bejn il-banek u s-sovrani rispettivi tagħhom.

Ir-regolament propost jipprovdi għal livell fil-mira ta’ mill-inqas 1 % tad-depożiti koperti għall-FURB. Il-BĊE huwa tal-fehma li d-depożiti koperti ma humiex l-iktar punt ta’ referenza xieraq peress li ma jirriflettux għal kollox l-ispejjeż tal-finanzjament possibbli fir-riżoluzzjoni. Id-depożiti koperti jistgħu jibqgħu stabbli, filwaqt li l-passiv inġenerali jiżdied konsiderevolment, jew jista’ jiżdied mentri l-passiv globali jibqa’ stabbli. Fiż-żewġ każijiet, l-espożizzjoni potenzjali tal-fond ta’ riżoluzzjoni tiġi riflessa b’mod adegwat. Il-fatt li d-depożiti koperti huma assigurati diġà permezz tal-Iskema ta’ Garanzija ta’ Depożiti (DGS) għandu jiġi kkunsidrat ukoll billi dan jikkontribwixxi għall-finanzjament ta’ riżoluzzjoni jekk id-depożiti koperti (ippreferuti) jsofru telf. Dan il-punt ta’ referenza għandu b’hekk jiġi kkumplementat b’valur ta’ referenza li jirrigwarda l-passiv kollu, li għandu jiġi kkalibrat b’mod adegwat mill-Bord ta’ Riżoluzzjoni filwaqt li l-1 % ta’ depożiti jkun bħala limitu (38).

2.8   Arranġamenti ta’ garanzija ta’ kontinġenza

Il-BĊE jilqa’ l-proposta biex jiġu stabbiliti arranġamenti ta’ garanzija ta’ kontinġenza addizzjonali li jkunu jistgħu jiġu attivati f’ċirkustanzi eċċezzjonali, fil-każ li l-kontribuzzjonijiet ex ante tal-FURB ma jkunux biżżejjed u l-kontribuzzjonijiet ex post ma jkunux aċċessibbli immedjatament biex ikopru l-ispejjeż tiegħu, billi jsir self kuntrattwali jew forom oħra ta’ appoġġ minn istituzzjonijiet finanzjarji jew terzi oħrajn. Dawn l-arranġamenti ta’ garanzija ta’ kontinġenza jagħmlu lill-MUR iktar b’saħħtu kontra xokkijiet ekonomiċi u finanzjarji negattivi ħafna biex b’hekk tissaħħaħ l-kapaċità tiegħu biex jipprevjeni kriżijiet sistemiċi. Barra minn hekk, il-BĊE jappoġġa r-rekwiżit li kull finanzjament minn arranġamenti ta’ garanzija ta’ kontinġenza jiġi rkuprat mill-industrija finanzjarja u mhux imħallas mill-awtoritajiet fiskali. Dan ir-rekwiżit jippreserva waħda mir-raġunijiet ewlenin biex jitwaqqaf il-MUR, sabiex ikun hemm ir-riżoluzzjoni tal-banek mingħajr ma jkun hemm spejjeż permanenti għall-kontribwenti tat-taxxa. Fir-rigward ta’ dawn l-elementi, ir-regolament propost huwa konsistenti għall-kollox mal-Konklużjonijiet tal-Kunsill Ewropew tat-13/14 ta’ Diċembru u t-27/28 ta’ Ġunju 2013 (39), li jibnu fuq ir-rapport “Lejn Unjoni Ekonomika u Monetarja ġenwina”.

Fl-istess ħin, il-BĊE jinnota li r-regolament propost baqa’ vag fuq id-disinn previst ta’ arranġament ta’ garanzija ta’ kontinġenza addizzjonali. B’mod partikolari, filwaqt li r-regolament propost jipprovdi għall-possibbiltà li jkun hemm self minn terzi (40), ma jispeċifikax jekk l-arranġamenti ta’ garanzija ta’ kontinġenza addizzjonali jinkludux ukoll aċċess temporanju għall-fondi pubbliċi jew inkella joqogħdux biss fuq self mis-settur privat. Kif inhu espliċitament ikkjarifikat fl-abbozz tal-Artikolu 6(4) li l-Istati Membri ma humiex obbligati li jagħtu dan l-aċċess, jidher li garanzija ta’ kontinġenza bħal din tista’ tingħata biss fuq bażi volontarja. Il-BĊE huwa tal-fehma li, filwaqt li huwa suġġett għall-prinċipju ta’ newtralità fiskali, l-aċċess għal riżorsi fiskali jkun element essenzjali tal-arranġamenti ta’ garanzija ta’ kontinġenza tal-MUR. Dan għaliex sorsi privati tal-finanzjament jistgħu, speċjalment fil-bidu tal-MUR, ikunu skarsi u temporanjament jevaporaw meta jkun hemm taqlib kbir fis-suq finanzjarju. Il-BĊE jifhem li l-Kummissjoni ma inkluditx obbligu fuq Stati Membri parteċipanti li jingħata aċċess għall-fondi pubbliċi billi dan jista’ jinterferixxi mas-sovranità fiskali tal-Istati Membri li ma tistax tintmess taħt il-bażi legali tar-regolament propost. F’dan l-isfond, il-BĊE jikkunsidra li huwa importanti li l-Istati Membri parteċipanti jieħdu ħsieb jipprovdu garanzija ta’ kontinġenza konġunta u solida biex tkun disponibbli mad-dħul fis-seħħ tar-regolament propost (41).

Din il-garanzija ta’ kontinġenza tista’ tinkludi linja ta’ kreditu li tagħti lill-MUR aċċess għal riżorsi fiskali konġunti mill-Istati Membri parteċipanti. Sabiex jiġi sodisfatt il-prinċipju ta’ fiskalità newtrali, il-linja ta’ kreditu jkollha tiġi rkuprata kollha fil-każ li tiġi attivata. Ikun importanti li jiġi kkalibrat b’attenzjoni l-orizzont taż-żmien biex jiġu rkuprati dawn il-fondi mis-settur finanzjarju sabiex jiġu evitati imposti li jkunu marbutin wisq favur iċ-ċikli. Arranġament ta’ linja ta’ kreditu bħal dak ikun konsistenti għal kollox mal-konklużjonijiet tad-dispożizzjonijiet tal-Kunsill Ewropew ta’ Diċembru 2012 (42) u ma’ oqsfa ta’ riżoluzzjoni simili f’pajjiżi oħrajn, pereżempju, il-linja ta’ kreditu lil Federal Deposit Insurance Corporation mit-Teżor tal-Istati Uniti.

2.9   Relazzjoni mal-qafas tal-għajnuna mill-Istat

Il-BĊE jinnota li r-regolament propost huwa ddisinjat biex jiżgura l-preservazzjoni tal-kompetenzi tal-Kummissjoni fuq l-għajnuna mill-Istat f’każijiet ta’ riżoluzzjoni kollha li jinvolvu l-appoġġ li jikkwalifika bħala għajnuna mill-Istat. Dan l-għan jintlaħaq billi l-proċedura dwar l-għajnuna mill-Istat timxi b’mod parallel mal-proċedura ta’ riżoluzzjoni (43). Madankollu r-regolament propost għandu l-intenzjoni wkoll li japplika l-kontroll tal-għajnuna mill-Istat f’każijiet li jinvolvu appoġġ mill-FURB b’analoġija u b'mod parallel mal-proċedura ta’ riżoluzzjoni (44).

Il-BĊE jirrikonoxxi li l-qafas tal-għajnuna mill-Istat wera li hu essenzjali fid-definizzjoni ta’ parametri komuni għall-appoġġ pubbliku nazzjonali fil-kuntest ta’ riżoluzzjoni ta’ bank fl-Unjoni kollha. Madankollu, il-BĊE huwa tal-fehma li l-impatt tal-applikazzjoni tal-kontroll tal-għajnuna mill-Istat u l-impatt tal-applikazzjoni fuq riżoluzzjonijiet tal-MUR għandhom jiġu vvalutati b’attenzjoni. Ladarba l-MUR ikun operattiv għal kollox, id-deċiżjonijiet ta’ riżoluzzjoni ser jitieħdu fil-livell tal-Unjoni biex b’hekk jiġi żgurat trattament ugwali u ma jkunx hemm distorsjoni fis-suq uniku (45). Fid-dawl ta’ dan, il-valutazzjoni parallela taħt il-proċedura tal-għajnuna mill-Istat m’għandhiex iddewwem, tidduplika jew tostakola l-proċess ta’ riżoluzzjoni. L-għan tal-preżervazzjoni tas-suq intern u li ma jkunx hemm distorsjoni tal-kompetizzjoni bejn l-Istati Membri parteċipanti u Stati Membri li mhumiex parteċipanti jista’ jintlaħaq fil-proċess ta’ riżoluzzjoni. B’mod partikolari tista’ tiġi prevista l-integrazzjoni ta’ aspetti tal-għajnuna mill-Istat fil-proċess ta’ riżoluzzjoni peress li l-Kummissjoni għandha l-poter deċiżjonali aħħari. Fi kwalunkwe każ, l-applikazzjoni tar-regolament propost għandha tiżgura li l-kontroll tal-għajnuna mill-Istat la jirriżulta f’dewmien bla bżonn u lanqas jostakola li jintlaħqu l-għanijiet ta’ riżoluzzjoni, partikolarment minħabba l-bżonn li tiġi protetta l-istabbiltà finanzjarja (46). Għal raġunijiet ta’ ċarezza u ċertezza legali, bla dubju jkun ta’ għajnuna li l-Kummissjoni tispeċifika b’mod ċar fir-regolament propost liema regoli tal-qafas tal-għajnuna mill-Istat u liema proċedura ser jiġu applikati b’analoġija, u jekk ikun meħtieġ, jiġu spjegati iktar id-dettalji tal-applikazzjoni tagħhom bl-użu ta’ mezzi xierqa.

Fl-aħħar nett, jista’ jkun hemm il-ħtieġa ta’ iktar analiżi fil-futur dwar l-applikazzjoni ta’ regoli ta’ għajnuna mill-Istat b’analoġija u fir-rigward tal-interazzjoni bejn kunsiderazzjonijiet ta’ għajnuna mill-Istat u kunsiderazzjoni dwar l-istabbiltà finanzjarja fil-kuntest ta’ riżoluzzjoni (47).

2.10   Stħarriġ ġudizzjarju tad-deċiżjonijiet ta’ riżoluzzjoni

Ir-regolament propost ma fih l-ebda dispożizzjoni fuq kontroll ġudizzjarju u affarijiet relatati dwar deċiżjonijiet ta’ riżoluzzjoni. Il-BĊE jifhem li (a) kemm id-deċiżjonijiet tal-Bord ta’ Riżoluzzjoni/tal-Kummissjoni fuq ir-riżoluzzjoni (48) u d-deċiżjonijiet tal-Kummissjoni li jikkunsidraw il-konformità mar-regoli tal-għajnuna mill-Istat, fuq naħa, kif ukoll (b) l-azzjonijiet ta’ riżoluzzjoni tal-awtoritajiet ta’ riżoluzzjoni nazzjonali li jimplimentaw l-iskema ta’ riżoluzzjoni skont dawk id-deċiżjonijiet u r-regoli tal-għajnuna mill-Istat, minn-naħa l-oħra, jibqgħu suġġetti għall-istħarriġ ġudizzjarju mill-Qorti tal-Ġustizzja tal-Unjoni Ewropea u l-qrati nazzjonali rispettivament. Il-BĊE jinnota li t-taħlita ta’ rimedji quddiem il-Qorti li jipprovdu t-Trattati u r-regolament propost kif ukoll quddiem il-qrati nazzjonali bis-saħħa tal-liġijiet domestiċi tal-Istati Membri parteċipanti, għandhom jiggarantixxu drittijiet ta’ smigħ xieraq lil persuni naturali u legali affettwati bid-deċiżjonijiet tal-MSU.

Għal raġunijiet ta’ ċarezza legali, ikun ta’ għajnuna jekk ir-regolament jispeċifika li jkun mingħajr preġudizzju għall-kompetenza tal-qrati nazzjonali li jistħarrġu l-azzjonijiet jew l-ommissjonijiet ta’ awtoritajiet nazzjonali ta’ riżoluzzjoni u kompetenti oħrajn meta jiġu implimentati d-deċiżjonijiet tal-Bord ta’ Riżoluzzjoni magħmulin fi ħdan il-proċedura ta’ riżoluzzjoni bis-saħħa tal-Artikolu 16. Barra minn hekk, għandu jiġi kkunsidrat jekk għandhomx jiddaħħlu dispożizzjonijiet li jipprekludu jew tal-inqas jillimitaw ir-riversibbiltà ta’ deċiżjonijiet meħudin mill-Bord ta’ Riżoluzzjoni, partikolarment fir-rigward tad-deċiżjonijiet meħudin skont l-Artikolu 26(2) tar-regolament propost, skont id-dispożizzjonijiet li hemm fil-BRRD fir-rigward tad-dritt tal-appell u l-esklużjoni ta’ azzjonijiet oħrajn. Id-dispożizzjonijiet rilevanti għandhom jiġu bbilanċjati b’attenzjoni sabiex tiġi żgurata l-konformità ma’ garanziji ta’ drittijiet tal-proprjetà taħt il-Karta tad-Drittijiet Fundamentali tal-UE u l-Konvenzjoni Ewropea fuq id-Drittijiet tal-Bniedem.

Fl-aħħar nett sabiex jiżdied il-livell ta’ trasparenza fir-rigward ta’ rimedji ġudizzjarji disponibbli skont l-MSU, huwa konsiljabbli li jiġu deskritti l-ambitu u l-kontenut tad-dritt għall-istħarriġ ġudizzjarju tal-partijiet affettwati b’miżuri ta’ riżoluzzjoni taħt il-MUR, billi jiġi speċifikat, pereżempju, li l-istħarriġ ġudizzjarju ta’ azzjonijiet u ommissjonijiet tal-awtoritajiet ta’ riżoluzzjoni nazzjonali għandhom jikkunsidraw għal kollox li skont l-Artikolu 16(8) tar-regolament propost l-awtoritajiet nazzjonali huma obbligati li jieħdu l-miżuri kollha meħtieġa biex jimplimentaw id-deċiżjonijiet tal-Bord ta’ Riżoluzzjoni, u li dawn id-deċiżjonijiet tal-aħħar huma suġġetti għall-istħarriġ ġudizzjarju mill-Qorti tal-Ġustizzja tal-Unjoni Ewropea. Dan jista’ jsir fil-Memorandum ta’ Spjegazzjoni mar-regolament propost jew f’dokument separat.

2.11   Terminoloġija

Il-BĊE jilqa’ l-għan tal-Kummissjoni li tiżgura li r-regolament propost jikkonforma mal-BRRD li ġejja, li għandu jiżgura konsistenza globali, anki fir-rigward tad-definizzjonijiet użati. Id-definizzjonijiet tal-BRRD għandhom jinżammu sakemm ma jkunx hemm raġunijiet oġġettivi li wieħed ma jsegwihomx għal kollox jew ineħħihom fir-regolament propost (49). F’dan ir-rigward, meta ssir referenza għall-awtorità superviżorja, ir-regolament għandu juża approċċ konsistenti, pereżempju, b’referenza għall-“awtorità kompetenti”, filwaqt li jiġi kkjarifikat li dan jinkludi l-BĊE fir-rwol tiegħu bħala superviżur kif ukoll awtoritjaiet superviżorji nazzjonali.

2.12   Stati Membri li daħlu f’kooperazzjoni mill-qrib

Il-BĊE jirrakkomanda li fir-regolament propost tiddaħħal dispożizzjoni li tittratta l-proċeduri ta’ riżoluzzjoni li għadhom ma ntemmewx, jekk Stat Membru li daħal f’kooperazzjoni mill-qrib (50), u għalhekk huwa awtomatikament suġġett għar-regolament propost, itemm din il-kooperazzjoni.

---

(1)  COM(2013) 520 finali.

(2)  ĠU C 30, 1.2.2013, p. 6. L-opinjonijiet kollha tal-BĊE huma ppubblikati fis-sit elettroniku tal-BĊE fuq www.ecb.europa.eu.

(3)  Disponibbli fuq is-sit tal-Kunsill Ewropew fi www.consilium.europa.eu.

(4)  Ippreżentati matul il-Kunsill Ewropew f’Diċembru 2012 u disponibbli fis-sit tal-Kunsill Ewropew fi www.consilium.europa.eu.

(5)  Ara wkoll l-Opinjoni tal-Bank Ċentrali tad-29 ta’ Novembru 2012 dwar proposta għal direttiva li tistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment (CON/2012/99) (ĠU C 39, 12.2.2013, p. 1.).

(6)  Ara l-Artikolu 7 tar-regolament propost.

(7)  Ara l-Artikolu 20 tar-regolament propost.

(8)  Sentenza tat-13 ta’ Ġunju 1958 fil-Kawża 9/56, Meroni vs L-Awtorità Għolja (Ġabra 1958, p. 133 bl-Ingliż), sentenza tal-14 ta’ Mejju 1981 fil-Kawża 98/80 Romano vs INAMI (Ġabra tal-1981, p. 1241) u s-sentenza tat-12 ta’ Lulju 2005 fil-Kawżi Magħquda C-154/04 u C-155/04 Alliance for Natural Health et (Ġabra 2005, p. I-6451)

(9)  Ara, pereżempju, il-kummenti fuq l-Artikolu 16 tar-regolament propost, kif jidher iktar ’isfel u fil-proposta għall-abbozzar fl-Emenda 6.

(10)  Artikolu 41(8) tar-regolament propost.

(11)  Ara l-Kapitolu 4: Kooperazzjoni tar-regolament propost.

(12)  ĠU L 287, 29.10.2013, p. 63. Ara b’mod partikolari l-Artikoli 3(3) u 27(2) tar-Regolament MSU.

(13)  

Artikolu 27(2) u (3) tar-regolament propost

(14)  Ara, pereżempju, il-proposti għall-abbozzar fl-Emendi 2, 5, 8 u 10.

(15)  Ara l-Artikolu 26(11) u l-Premessa 70 tar-Regolament SSM.

(16)  Ara l-proposta għall-abbozzar fl-Emenda 12.

(17)  L-Artikolu 11(4) tar-regolament propost għandu għalhekk jiġi emendat. Ara l-proposta għall-abbozzar rispettiva fl-Emenda 5.

(18)  L-Artikolu 23(1) (ec) tal-approċċ ġenerali fuq l-abbozz tad-direttiva li jistabbilixxi qafas għall-irkupru u r-riżoluzzjoni ta’ istituzzjonijiet ta’ kreditu u ditti ta’ investiment u li temenda d-Direttivi tal-Kunsill 77/91/KEE u 82/891/KE, id-Direttivi 2001/24/KE, 2002/47/KE, 2004/25/KE, 2005/56/KE, 2007/36/KE u 2011/35/KE u r-Regolament (UE) Nru 1093/2010 kif miftiehem mill-Ministri tal-Finanzi tal-Istati Membri fil-Kunsill ECOFIN tas-27 ta’ Ġunju 2013. [2012/0150 (COD)-11148/1/13 Rev 1].

(19)  Ara l-proposta għall-abbozzar fl-Emenda 14.

(20)  Il-premessa 16 tar-regolament propost jgħid, “Il-BĊE, bħala s-superviżur fl-MSU, huwa fl-aqwa pożizzjoni biex jevalwa jekk istituzzjoni ta’ kreditu hijiex qed tfalli jew probabbli tfalli u jekk ma hemm l-ebda prospett raġonevoli li azzjoni alternattiva mis-settur privat jew superviżorja tkun tista' tevita li din tfalli fi żmien raġonevoli”.

(21)  Dan il-punt tqajjem ukoll fl-Opinjoni CON/2012/99, paragrafu 2.1.

(22)  Ara l-proposta għall-abbozzar fl-Emenda 6.

(23)  Ara l-proposta għall-abbozzar fl-Emenda 8.

(24)  Ara l-proposta għall-abbozzar fl-Emenda 8.

(25)  Ara l-proposta għall-abbozzar fl-Emendi 11, 12 u 13.

(26)  Ara l-proposta għall-abbozzar fl-Emendi 15, 16 u 17.

(27)  Ara l-proposta għall-abbozzar fl-Emenda 15.

(28)  Dan huwa konformi mal-Attributi Ewlenin ta’ Sistemi ta’ Riżoluzzjoni Effettivi għal Istituzzjonijiet Finanzjarji tal-Bord tal-Istabbiltà Finanzjarja, Ottubru 2011, disponibbli fuq il-websajt tal-FSB f’www.financialstabilityboard.org. Ara l-Anness II u t-taqsima 10.

(29)  Ara l-proposta għall-abbozzar fl-Emenda 3.

(30)  Ara l-Artikolu 13(1) tar-regolament propost.

(31)  Ara l-proposta għall-abbozzar fl-Emenda 7.

(32)  Ara l-proposta għall-abbozzar fl-Emenda 4.

(33)  Ara pereżempju l-abbozz tal-Artikolu 39(2) BRRD li jipprovdi l-kundizzjonijiet biex passiv jgħodd bħala passiv eliġibbli.

(34)  Ara l-Komunikazzjoni tal-Kummissjoni dwar l-applikazzjoni, mill-1 ta’ Awwissu 2013, tar-regoli dwar l-għajnuna mill-istat għal miżuri ta’ appoġġ favur il-banek fil-kuntest tal-kriżi finanzjarja tat-30 ta’ Lulju 2013 (ĠU C 216, 30.7.2013, p. 1).

(35)  Ara l-proposta għall-abbozzar fl-Emenda 22.

(36)  Bla ħsara għal-lista ta’ esklużjonijiet li jistgħu jiġu applikati f’ċirkustanzi eċċezzjonali. Ara l-Artikolu 24(5) tar-regolament propost.

(37)  Għalhekk, l-Artikoli 15 u 73 tar-regolament propost għandhom jagħmlu referenza għall-Artikolu 98a u 99 tal-BRRD li ġejja.

(38)  Ara l-proposti ta’ abbozzar għall-Emenda 19.

(39)  Disponibbli fuq is-sit tal-Kunsill Ewropew fi http://www.consilium.europa.eu

(40)  F’dan ir-rigward, il-BĊE jinnota li skont il-projbizzjoni fuq il-finanzjament monetarju, bank ċentrali ma jistax jiffinanzja fond ta’ riżoluzzjoni. Ara, pereżempju, ir-Rapport ta’ Konverġenza tal-BĊE 2013, p. 28.

(41)  Ara l-proposti ta’ abbozzar għall-Emenda 20.

(42)  Skont il-konklużjonijiet tal-Kunsill Ewropew tat-13/14 ta’ Diċembru 2012“…Il-mekkaniżmu uniku ta’ riżoluzzjoni għandu jkun ibbażat fuq kontribuzzjonijiet mis-settur finanzjarju nnifsu u jinkludi arranġamenti ta’ salvagwardja effettivi u adatti. Dan l-arranġament ta’ salvagwardja għandu jkun newtrali f’termini ta' baġit fuq it-terminu medju, billi jiżgura li l-imposti ex post fuq l-industrija finanzjarja jagħmlu tajjeb għall-assistenza pubblika.” Il-BĊE huwa konxju li r-regolament propost, fih innifsu ma jistax jistabbilixxi din il-linja ta’ kreditu u għandu bżonn jiddependi fuq l-obbligu tal-Bord ta’ Riżoluzzjoni biex isibha b’mod attiv, sakemm il-mekkaniżmi finanzjarji jkunu fis-seħħ biex jingħata aċċess għal din il-linja ta’ kreditu.

(43)  Ara l-paragrafu 4.1.3 tal-Memorandum ta’ Spjegazzjoni għar-regolament propost (iktar “il quddiem il-‘Memorandum ta’ Spjegazzjoni”) u ara wkoll l-aħħar sentenza tal-Artikolu 16(8) tar-regolament propost.

(44)  Ara l-Artikolu 16(10) tar-regolament propost u l-paragrafu 1.2 tal-Memorandum ta’ Spjegazzjoni.

(45)  Ara, b’mod partikolari, il-premessi 7, 9 u 13 tar-regolament propost.

(46)  Ara l-proposta għall-abbozzar fl-Emenda 6.

(47)  Ara l-proposta għall-abbozzar fl-Emenda 21.

(48)  Ara l-Artikolu 16 tar-regolament propost, filwaqt li jittieħed inkunsiderazzjoni l-Artikolu 78 fuq ir-responsabbiltà mhux kuntrattwali tal-Bord ta’ Riżoluzzjoni.

(49)  Ara, pereżempju, l-Artikolu 3(13) tar-regolament propost li jiddefinixxi “grupp”. Dan jiddevja mid-definizzjoni ta’ dan it-terminu mogħti fl-Artikolu 2(4) tal-Approċċ Ġenerali dwar l-abbozz tad-direttiva li tistabbilixxi qafas għall-irkupru u riżoluzzjoni ta’ banek li qed ifallu tas-27 ta’ Ġunju 2013.

(50)  Kif iddefinit fir-Regolament MSU.

---

---