7.6.2012   

MT

Il-Ġurnal Uffiċjali tal-Unjoni Ewropea

C 161/3

1.1.

Fl-20 t’Ottubru 2011, il-Kummissjoni adottat l-erba’ proposti msemmija hawn fuq biex jissostitwixxu d-Direttivi 2004/39/KE (6) u 2003/6/KE (7), li għandhom il-ħsieb li jiżguraw l-effiċjenza, l-integrità, ir-reżiljenza u t-trasparenza tas-swieq finanzjarji. B’mod partikolari, il-MiFID proposta tabbozza mill-ġdid id-Direttiva 2004/39/KE fir-rigward tal-aċċess għall-attività ta’ ditti ta’ investiment, swieq irregolati u provvedituri ta’ servizzi ta’ dejta, il-qafas ta’ governanza u superviżorju tagħhom, it-twettiq ta’ attivitajiet ta’ investiment, u d-ditti ta’ pajjiżi terzi li jipprovdu servizzi ta’ investiment permezz ta’ fergħa. Il-MiFIR propost itejjeb aktar id-Direttiva 2004/39/KE u jintroduċi regoli ġodda għall-pubblikazzjoni ta’ dejta dwar in-negozju, ir-rappurtar dwar it-tranżazzjonijiet, in-negozju mandatorju ta’ derivati f’postijiet organizzati, l-aċċess mhux diskriminatorju għal faċilitajiet ta’ ikklerjar, l-intervenzjoni tal-prodott u l-ġestjoni ta’ pożizzjonijiet rigward id-derivati u l-għoti ta’ servizzi minn ditti ta’ pajjiżi terzi mingħajr fergħa. Il-MAR propost jirrevoka u jissostitwixxi d-Direttiva 2003/6/KE. Il-MAD proposta, ibbażata fuq l-Artikolu 83(2) tat-Trattat, teħtieġ li l-Istati Membri jintroduċu livelli minimi ta’ sanzjonijiet kriminali kontra l-forom l-aktar serji ta’ abbuż tas-suq.

1.2.

Il-BĊE jappoġġa l-miżuri proposti biex jittejjeb l-irregolar tas-swieq tal-istrumenti finanzjarji bħala pass importanti lejn it-tisħiħ tal-protezzjoni tal-investituri u l-ħolqien ta’ sistema finanzjarja aktar b’saħħitha u aktar sigura fl-Unjoni Ewropea.

2.1.

Il-qafas propost se jwassal għal aktar ċertezza legali billi jillimta l-għażliet u d-diskrezzjoni tal-Istati Membri, u se jnaqqas ir-riskji tat-tfixkil fis-swieq u l-arbitraġġ regolatorju. B’mod partikolari, hija milqugħa ż-żieda fl-armonizzazzjoni permezz ta’ żewġ regolamenti applikabbli direttament u direttiva dwar is-sanzjonijiet kriminali, billi se jiġi żgurat trattament ugwali u regoli minimi kumparabbli għal miżuri, sanzjonijiet u multi amministrattivi, kif ukoll għal sanzjonijiet kriminali.

2.2.

Il-BĊE jappoġġa bis-sħiħ l-iżvilupp ta’ Rulebook Ewropew wieħed għall-istituzzjonijiet finanzjarji kollha (8) billi jippromwovi t-tħaddim bla xkiel tas-suq wieħed ġewwa l-Unjoni u jiffaċilita aktar l-integrazzjoni finanzjarja fl-Ewropa (9). Barra minn dan, kif indikat f’opinjonijiet preċedenti (10), il-BĊE jirrakkomanda li jiġi żgurat, li jkunu prinċipji ta’ qafas li jirriflettu għażliet politiċi bażiċi u kwistjonijiet sostantivi biss, li jibqgħu suġġetti għall-proċedura ordinarja leġiżlattiva, u li r-regoli tekniċi għandhom jiġu adottatti bħala atti ddelegati jew implimentattivi skont l-Artikoli 290 u 291 tat-Trattat, skont kif xieraq permezz tal-iżvilupp minn qabel ta’ abbozz ta’ standards regolatorji jew abbozz ta’ standards implimentattivi mill-Awtoritajiet Superviżorji Ewropej (ASEi) (11). F’dan ir-rigward, meta wieħed jikkunsidra l-importanza tal-atti ddelegati u implimentattivi bħala komponent sostanzjali tar-Rulebook Ewropew wieħed, il-BĊE jistenna li jiġi kkonsultat kif ikun xieraq u fiż-żmien dovut dwar dawn l-atti proposti tal-Unjoni (12).

2.3.

Barra minn dan, il-BĊE jirrakkomanda li tiġi żgurata l-konsistenza kross-settorali tal-leġiżlazzjoni tas-servizzi finanzjarji tal-Unjoni.

3.1.

Il-BĊE jilqa’ l-qafas propost li jsaħħaħ u jallinja s-setgħat tal-awtoritajiet li jissorveljaw id-ditti ta’ investiment u s-swieq tal-istrumenti finanzjarji kif ukoll l-eżerċizzju tas-setgħat investigattivi tagħhom (13), b’enfasi speċjali fuq il-kooperazzjoni transkonfini (14). Huwa ta’ importanza kruċjali għall-funzjonament kif suppost tas-swieq tal-istrumenti finanzjarji li l-awtoritajiet kompetenti ġewwa l-Unjoni jibnu netwerk ta’ superviżuri armati u setgħana sew, li kapaċi jindirizzaw xejriet mhux mixtieqa, azzjonijiet jew theddid fis-swieq. F’dan ir-rigward, il-BĊE jappoġġa l-irwol b’saħħtu tal-Awtorita' Ewropea għat-Titoli u s-Swieq (AETS) fil-qafas propost u partikolarmentfir-rigward tal-funzjoni ta’ faċilitazzjoni u koordinazzjoni, u l-iżvilupp ta’ standards tekniċi. Barra minn dan, l-obbligu tal-awtoritajiet nazzjonali kompetenti biex jikkooperaw u jipprovdu lill-AETS bl-informazzjoni kollha neċessarja, se jseddaq l-applikazzjoni konsistenti tar-regolamenti proposti u t-trattament ugwali ġewwa l-Unjoni. F’dan ir-rigward, kif indikat f’opinjonijiet preċedenti (15), il-BĊE jissuġġerixxi aktar titjib fil-kooperazzjoni u l-iskambju ta’ informazzjoni ġewwa s-Sistema Ewropea ta’ Superviżjoni Finanzjarja u bejn l-awtoritajiet superviżorji u l-banek ċentrali tas-SEBĊ, inkluż il-BĊE, meta din l-informazzjoni hija rilevanti għat-twettiq tal-kompiti rispettivi tagħhom (16).

3.2.

Jinħtieġ ukoll, kif previst fil-qafas propost, biex l-awtoritajiet kompetenti jikkooperaw m’awtoritajiet oħra fl-istess Stati Membri (17). Barra minn dan, biex jiġi żgurat li tiġi kkunsidrata kif jixraq perspettiva makro-prudenti, il-BĊE jirrakkomanda li jitwaqqfu u jittejbu proċeduri adegwati ta’ kooperazzjoni ma' awtoritajiet makroprudenzjali, fejn it-theddid għall-istabbiltà tas-sistema finanzjarja jiġi vvalutat (18). Dan jista’ jimplika kooperazzjoni bejn l-awtoritajiet kompetenti u l-awtoritajiet makroprudenzjali nazzjonali (19), jew, fi drabi oħra, kooperazzjoni mill-AETS mal-Bord Ewropew għar-Riskju Sistemiku (BERS) (20). F’dan id-dawl, jista’ jkun xieraq li wieħed jipprovdi għal din il-kooperazzjoni meta jirrevedi r-Regolament (UE) Nru 1095/2010 (21).

3.3.

Il-proposta biex jissaħħaħ ir-reġim ta’ sanzjonijiet amministrattivi billi awtoritajiet kompetenti jingħataw livell ta’ minimu stabbilit ta’ miżuri, sanzjonijiet u multi amministrattivi, huwa mod xieraq biex jiġu żgurati standards komuni ġewwa l-Unjoni, filwaqt li titħalla fid-diskrezzjoni tal-leġiżlaturi nazzjonali biex jagħtu lill-awtoritajiet kompetenti setgħat addizzjonali ta’ ssanzjonar, u partikolarment biex jipprovdu għal livelli ogħla ta’ sanzjonijiet amministrattivi bil-fluss (22). Barra minn dan, biex jiġu żgurati t-trasparenza u l-konsistenza tas-sanzjonijiet amministrattivi adottati ġewwa l-Unjoni, l-Istati Membri għandhom jinnotifikaw lill-Kummissjoni u lill-AETS bir-regoli nazzjonali applikabbli u bi kwalunkwe emendi sussegwenti tagħhom (23).

5.1.

Il-BĊE jappoġġa l-estensjoni proposta tal-iskop tal-obbligi ta’ trasparenza ta’ qabel u wara n-negozju lil hinn minn strumenti ta’ ishma, biex jinkludi bonds, prodotti strutturati u derivati ammissibbli għan-negozju jew biex jiġu nnegozjati f’suq irregolat, faċilità ta’ negozju multilaterali (MTF) jew OTF, kif ukoll derivati meqjusa eliġibbli għall-ikklirjar ċentrali, billi dan itejjeb il-formazzjoni tal-prezz u jsaħħaħ il-proċess ta’ valutazzjoni ta’ dawn l-istrumenti.

5.2.

Il-MiFID proposta (24) u l-MiFIR propost (25) jintroduċu dispożizzjonijiet biex itejbu l-konsolidazzjoni tad-dejta għat-trasparenza tal-informazzjoni. Skont dawn id-dispożizzjonijiet, “consolidated tape providers” (CTPs) jiġbru informazzjoni minn postijiet tan-negozju u, għan-negozju eżegwit barra l-postijiet tan-negozju, minn ditti ta’ investiment permezz ta’ arranġamenti ta’ pubblikazzjoni approvati. Fil-fehma tal-Kummissjoni, id-dispożizzjonijiet proposti jistabbilixxu l-kundizzjonijiet għall-emerġenza tal-CTPs (26). Minkejja l-iżvilupp possibbli ta’ dawn is-soluzzjonijiet kummerċjali, il-BĊE iqis li trasparenza xierqa tista’ tintlaħaq biss bit-twaqqif ta’ CTP wieħed. F’dan ir-rigward, il-BĊE jinnota li l-Kummissjoni ser tirrapporta dwar il-funzjonament tal-consolidated tape fil-prattika, u jekk jintqies xieraq, iressaq proposta leġiżlattiva għat-twaqqif ta’ entità waħda li tikkonsolida l-informazzjoni ta’ wara n-negozju (27). Madankollu, il-BĊE iqis li l-esperjenza sa mit-traspożizzjoni tad-Direttiva 2004/39/KE wriet falliment tas-suq fil-konsolidazzjoni tad-dejta li diġà f’dan l-istadju tiġġustifika proposti leġiżlattivi biex jindirizzaw dawn il-kwistjonijiet.

7.1.

Il-qafas ta’ trasparenza u rappurtar imsemmi hawn fuq ma jipprovdix għal eżenzjoni fir-rigward ta’ tranżazzjonijiet li tagħhom bank ċentrali tas-SEBĊ huwa kontroparti (29).

7.2.

F’dan ir-rigward il-BĊE jinnota illi waqt li l-pubblikazzjoni ta’ tranżazzjonijiet imwettqa mill-banek ċentrali bħala parti mill-għanijiet u l-kompiti statutorji tagħhom ma twassalx għal aktar trasparenza fis-suq, l-effettività ta’ dawn l-operazzjonijiet, partikolarment fil-qasam tal-politika monetarja jew l-operazzjonijiet tal-kambju barrani, u b’hekk it-twettiq ta’ dawn il-kompiti mill-banek ċentrali, li jiddependi fuq il-puntwalità u l-kunfidenzjalità, jista’ jiġi kompromess sew permezz tal-pubblikazzjoni ta’ informazzjoni fir-rigward ta’ dawn it-tranżazzjonijiet, sew jekk issir fil-ħin reali sew jekk issir b’dewmien. Barra minn dan, it-trasparenza ta’ tipi speċifiċi ta’ negozji u d-daqs ta’ dawk in-negozji f’ċerti żminijiet jistgħu jippermettu lill-parteċipanti tas-suq biex jidentifikaw kważi għal kollox it-tranżazzjonijiet tal-banek ċentrali tas-SEBĊ, saħansitra mingħajr il-publikazzjoni ta’ isimhom. Għalhekk, il-BĊE jirrakkomanda bis-sħiħ li t-tranżazzjonijiet tal-banek ċentrali tas-SEBĊ jiġu eżentati mill-obbligi tat-trasparenza (30).

7.3.

Fir-rigward tal-obbligi ta’ rappurtar, li jeżiġu li l-kontropartijiet tat-tranżazzjonijiet - li tagħhom membru tas-SEBĊ jkun parti - jirrappurtaw id-dettalji kollha relatati lill-awtoritajiet kompetenti, dan jista’ jinterferixxi wkoll mar-reġimi ta’ kunfidenzjalità tal-BĊE u l-banek ċentrali nazzjonali u jtellef l-iskop tal-immunitajiet mogħtija lill-BĊE skont it-Trattat, partikolarment l-invjolabbiltà tal-arkivji u l-kommunikazzjonijiet uffiċjali tal-BĊE (31), speċjalment billi l-proċess ta’ rappurtar lill-awtoritajiet kompetenti jista’ jsir ukoll permezz ta’ entitajiet oħra bħal postijiet ta’ negozju, mekkaniżmi ta’ rappurtar approvati jew repożitorji tan-negozju. Għal dawn ir-raġunijiet, tranżazzjonijiet fejn bank ċentrali tas-SEBĊ huwa kontroparti, għandhom ikunu eżenti wkoll mill-obbligi ta’ rappurtar (32).

9.1.

L-Eurosistema diġà nnutat (35) l-urġenza biex tittieħed azzjoni biex timplimenta fl-Unjoni l-impenn tal-G20 milħuq f’Settembru 2009 li ‘l-kuntratti kollha standardizzati tad-derivati OTC għandhom jiġu nnegozjati f’boroż jew pjattaforma elettronika ta’ negozju, fejn xieraq, u kklirjati permezz ta’ kontropartijiet ċentrali sa mhux aktar tard mill-aħħar tal-2012, bil-għan li tittejjeb it-trasparenza fis-swieq tad-derivati OTC, jitnaqqas ir-riskju sistemiku u jkun hemm protezzjoni kontra l-abbuż tas-suq.

9.2.

F’dan il-kuntest, il-BĊE jappoġġa d-dispożizzjonijiet (36) li jsostnu l-obbligu li derivati OTC eliġibbli għandhom jiġu nnegozjati fi swieq irregolati, MTFs u OTFs, u jafda lill-AETS bl-identifikazzjoni tal-iskop preċiż ta’ dan l-obbligu ta’ negozju waqt li tiġi kkunsidrata likwidità (37). Madankollu l-BĊE jinnota li dan il-metodu jista’ jkollu bżonn jiġi kkumplimentat biex jindirizza r-rakkomandazzjoni tal-Bord għall-Istabbilta' Finanzjarja li l-‘awtoritajiet għandhom jiżviluppaw inċentivi u, fejn xieraq, regoli, biex iżidu l-użu ta’ prodotti standardizzati u proċessi standardizzati’ (38). F’dan l-isfond, il-BĊE huwa tal-fehma li għandu jitwettaq sorveljar regolari ta’ negozju ta’ kuntratti mhux standard barra suq irregolat, MTF jew OTF, fuq livell ta' Unjoni.

10.1.

Negozju algoritmiku (AT), inkluż negozjar ta’ frekwenza għolja (HFT), jista’ jikkawża riskji għal-likwidita' u l-effiċjenza tas-swieq finanzjarji, speċjalment fi żminijiet diffiċli. Għalhekk, il-BĊE jilqa’ l-emendi proposti għad-Direttiva 2004/39/KE li jintroduċu salvagwardji organizzativi xierqa għal postijiet ta’ negozju, per eżempju f’temini ta’ kapaċità ta’ negozju, l-istabbiliment ta’ circuit-breakers, li joffru aċċess għas-suq lil negozjanti ta’ frekwenza għolja u ditti ta’ investiment li jipprovdu aċċess elettroniku dirett lil postijiet ta’ negozju. Id-dispożizzjonijiet proposti jiffaċilitaw ukoll is-sorveljanza u l-monitoraġġ ta’ HFT u AT minn awtoritajiet kompetenti.

10.2.

Madankollu, il-BĊE huwa tal-fehma li l-qafas regolatorju għandu jiċċara li l-entitajiet kollha involuti f’AT fuq bażi professjonali għandhom jitqiesu fid-definizzjoni ta’ ditti ta’ investiment u b’hekk jaqgħu fl-ambitu tal-MiFID u l-attivitajiet tagħhom ikunu suġġetti għas-superviżjoni u l-monitoraġġ mill-awtoritajiet kompetenti (39). Li tiġi żgurata kopertura komprensiva tal-entitajiet kollha involuti professjonalment fl-HFT u l-AT jillimita l-iskansar potenzjali tar-regoli proposti.

10.3.

Il-BĊE jilqa’ id-dispożizzjonijiet tal-MiFIR propost relatati mad-dettalji tar-rappurtar tat- tranżazzjonijiet, li ser jinkludu titlu biex jiġu identifikati l-algoritmi tal-kompjuter ġewwa d-ditta ta’ investiment responsabbli għad-deċiżjoni tal-investiment u l-eżekuzzjoni tat-tranżazzjoni (40). Il-BĊE huwa tal-fehma li sabiex tiġi ffaċilitata s-sorveljanza ġewwa s-suq u biex ikun hemm prevenzjoni u identifikazzjoni ta’ abbuż tas-suq, dawn l-identifikaturi uniċi għandhom ikunu żviluppati għall-identifikazzjoni ta’ tranżazzjonijiet iġġenerati minn kull AT fi ħdan u bejn pjattaformi ta’ negozju.

10.4.

Fl-aħħar nett, l-obbligi proposti biex suq irregolat (41) ikollu f’postu sistemi, proċeduri u arranġamenti effettivi, għandhom jiżguraw li sistemi ta’ AT ma joħolqux jew jikkontribwixxu għal xkiel fil-kundizzjonijiet tan-negozju fis-suq. F’dan ir-rigward, il-BĊE jilqa’ (i) li jiġu stabbiliti kundizzjonijiet li taħthom in-negozju għandu jieqaf jekk ikun hemm ċaqliq sinifikanti fil-prezz ta’ strument finanzjarju f’dak is-suq, u (ii) li jiġi stabbilit proporzjon massimu ta’ ordnijiet mhux eżegwiti għal tranżazzjonijiet u daqsijiet minimi ta’ funzjonament (minimum tick sizes) (42). Filwaqt li l-BĊE jikkunsidra li l-Kummissjoni għandha tingħatalha s-setgħa biex tistabbilixxi proporzjon massimu ta’ ordnijiet mhux eżegwiti għal tranżazzjonijiet, il-BĊE huwa tal-fehma li mhux meħtieġ li jiġi stabbilit proporzjon minimu ta’ ordnijiet mhux eżegwiti għal tranżazzjonijiet (43).

11.1.

Il-MiFID proposta tipprovdi li Stati Membri għandhom jiżguraw li swieq irregolati, operaturi ta’ MTFs u OTFs li jippermettu li jiġu nnegozjati derivati ta’ kommoditajiet, japplikaw limiti xierqa jew arranġamenti b’effett ekwivalenti, biex isaħħu l-likwidità, jipprevenu l-abbuż tas-suq u jsaħħu l-kundizzjonijiet tal-ipprezzar bla xkiel u tas-saldu għal kommoditajiet ikkunsinnati fiżikament (44). Skont il-MiFID proposta, dawn il-limiti jistgħu jiġu armonizzati permezz ta’ atti ddelegati mill-Kummissjoni, (45) u l-awtoritajiet kompetenti tingħatalhom ukoll is-setgħa biex jistabbilixxu limiti ta’ pożizzjonijiet ex ante għal derivati ta’ kommoditajiet (46) matul perijodu ta’ żmien speċifiku, filwaqt li l-AETS tingħata rwol ta’ koordinazzjoni ta’ dawn il-miżuri kif ukoll setgħat speċifiċi diretti f’dan il-qasam (47). Il-BĊE jilqa’ dawn id-dispożizzjonijiet.

11.2.

Madankollu, fir-rigward tal-limiti fuq derivati ta’ kommoditajiet, il-BĊE jisħaq l-importanza li wieħed jindirizza kif suppost ir-riskju ta’ arbitraġġ regolatorju u t-tfixkil tal-kompetizzjoni, mhux biss ġewwa l-Istati Membri imma wkoll fil-konfront ta’ ċentri finanzjarji kbar oħra. Għalhekk huwa ta’ importanza kbira ħafna li f’dan il-qasam jinstabu metodu komuni. Dan jista’ jintlaħaq billi l-AETS tingħata rwol kemm fl-elaborazzjoni ta’ prinċipji komuni fuq livell ta‘ Unjoni, kif ukoll fil-koordinazzjoni tal-miżuri meħuda mill-awtoritajiet nazzjonali kompetenti.

11.3.

Barra minn dan, filwaqt li l-BĊE jappoġġa l-adozzjoni tal-limiti għat-teħid ta’ pożizzjonijiet (48), hemm xi aspetti li jitolbu aktar kjarifika. B’mod partikolari dan japplika għad-definizzjoni ta’ limitu xieraq, il-perjodu li matulu għandhom jiġu applikati dawn il-limiti u l-użu ta’ kuntratti ta’ derivati minn parteċipanti tas-suq (49). Barra minn dan, il-BĊE huwa tal-fehma li l-argumenti li l-limiti għat-teħid ta’ pożizzjonijiet jikkontribwixxu biex itejbu l-likwidità tas-suq, iridu jiġu mfissra aktar.

11.4.

Il-MiFID proposta tipprovdi (50) għall-pubblikazzjoni ta’ pożizzjonijiet miżmuma minn tipi varji ta’ negozjanti. Barra minn dan, hija ser titlob li swieq irregolati, MTFs jew OTFs fejn jiġu nnegozjati derivati ta’ kommoditajiet jew ta’ emissjonijiet, jippubblikaw rapport ta’ kull ġimgħa dwar dawn il-pożizzjonijiet. Dejta dwar pożizzjonijiet twal u qosra, kif ukoll dwar imgħax bla rata fissa (open interest), tkun adegwata biex tivvaluta l-imġieba tal-parteċipanti tas-suq, speċjalment fir-rigward tal-monitoraġġ tal-konċentrazzjoni tal-pożizzjonijiet tal-parteċipanti tas-suq.

12.1.

Il-BĊE jilqa’ l-għoti tas-setgħa lill-AETS biex tipprojbixxi temporanjament jew tirrestrinġi r-reklamar, id-distribuzzjoni jew il-bejgħ ta’ ċerti strumenti finanzjarji jew ta’ tip ta’ attività jew prattika finanzjarja (51). F’dan ir-rigward, waqt li jqis li l-azzjoni tal-AETS tista’ tindirizza wkoll it-theddid għall-funzjonament bla xkiel tas-swieq finanzjarji jew l-istabbilta' tas-sistema finanzjarja kollha jew ta’ parti minnha (52), il-BĊE jirrakkomanda li tiġi żgurata l-koordinazzjoni xierqa mal-BERS dwar dawn l-aspetti (53).

12.2.

Huwa meħtieġ metodu regolatorju konsistenti għad-distribuzzjoni lil investituri bl-imnut ta’ prodotti finanzjarji differenti li jissodisfaw bżonnijiet simili ta’ investituri u li joħolqu sfidi kumparabbli ta’ protezzjoni tal-investituri (54). F’dan l-isfond, il-BĊE jinnota li l-MiFID proposta testendi l-obbligi, u partikolarment ir-regoli dwar it-twettiq tan-negozju u dwar il-kunflitti ta’ interess, lill-istituzzjonijiet ta’ kreditu li jbiegħu jew jagħtu pariri dwar depożiti strutturati. F’dan ir-rigward, il-BĊE jisħaq il-bżonn li: (i) tiġi ċċarata d-definizzjoni ta’ ‘depożiti strutturati’; (ii) jiġi speċifikat ir-reġim dwar il-protezzjoni tal-konsumatur applikabbli għall-prodotti finanzjarji; u (iii) jiġi żgurat metodu konsistenti fl-inizjattivi leġiżlattivi differenti tal-Unjoni, bħal ma huma r-reviżjoni tad-Direttiva 94/19/KE tal-Parlament Ewropew u tal-Kunsill tat-30 ta’ Mejju 1994 dwar skemi ta’ garanzija ta’ depożitu, (55) u x-xogħol għaddej dwar prodotti bl-imnut ta’ investiment li jinbiegħu f’pakkett fuq dawk l-aspetti. Barra minn dan, biex jiżgura metodu konsistenti fis-setturi tas-servizzi finanzjarji, il-BĊE jenfasizza l-importanza li, sa fejn hu possibbli, l-oqfsa regolatorji u superviżorji relatati mal-protezzjoni tal-investituri jiġu ddisinjati u implimentati, b’kooperazzjoni mill-qrib fost l-ASEi, pereżempju fil-qasam tal-prattiċi ta’ bejgħ inkroċjat (cross-selling) (56).

12.3.

Il-BĊE jilqa’ wkoll il-proposti tal-Kummissjoni fir-rigward tal-pariri dwar l-investimenti. Filwaqt li dan huwa pass fid-direzzjoni t-tajba, il-BĊE jinkoraġġixxi lill-Kummissjoni biex tikkunsidra aktar miżuri biex isaħħaħ il-protezzjoni tal-investituri bl-imnut, bħal ma hu t-titjib fil-litteriżmu fil-qasam finanzjarju (57).

12.4.

Il-MiFID proposta (58) tintitola lill-Istati Membri biex jadottaw kriterji speċifiċi biex jivvalutaw l-għerf u l-għarfien ta’ muniċipalitajiet u awtoritajiet pubbliċi lokali li jitolbu li jkunu ttrattati bħala klijenti professjonali. Dan il-metodu jikkunsidra li l-abbiltà ta’ dawn l-entitajiet biex jivvalutaw il-konsegwenzi tal-impenni finanzjarji tvarja b’mod sinifikanti ġewwa l-Ewropa. Il-finanzi pubbliċi fl-Istati Membri jistgħu jkunu effettwati serjament minn deċiżjonijiet ħżiena li jsiru minn entitajiet pubbliċi, b’impatt potenzjalment negattiv fuq l-istabbiltà finanzjarja fuq livell Ewropew. Barra minn dan, jista’ jkun ukoll xieraq li l-Istati Membri jintalbu jistabbilixxu kriterji li jiċċaraw liema kategoriji ta’ entitajiet jistgħu jkunu eliġibbli għal trattament bħala klijenti professjonali. L-AETS tista’ tkun mistiedna wkoll biex tagħti gwida f’dan il-qasam.

13.1.

Il-BĊE jilqa’ b’mod ġenerali l-qafas armonizzat propost għas-servizzi mogħtija minn ditti f’pajjiżi terzi fi ħdan l-Unjoni, u li jħalli lil ditti jistabbilixxu fergħat fi Stat Membru biex jipprovdu servizzi fi Stati Membri oħra mingħajr ma jistabbilixxu aktar fergħat. Reġim ta’ aċċess armonizzat għal ditti ta’ pajjiżi terzi jnaqqas il-frammentazzjoni, itejjeb it-trattament ugwali fost l-Istati Membri u jżid iċ-ċertezza legali għall-parteċipanti kollha tas-suq, billi l-kundizzjonijiet għall-aċċess tas-suq isiru aktar prevedibbli. Il-BĊE jinnota li l-iżgurar ta’ livell ugwali ta’ protezzjoni għall-investituri u standards regolatorji ugwali għall-attivitajiet ta’ ditti ta’ pajjiżi terzi mqabbla mad-ditti tal-UE/ŻEE, huwa ta’ relevanza kruċjali u neċessarju biex jiġi evitat kull tfixkil tas-suq.

13.2.

Il-metodu ddifferenzjat propost jiddistingiwxxi bejn l-istabbilment mandatorju ta’ fergħa jekk servizzi jew attivitajiet ta’ investiment għandhom jingħataw lil klijenti bl-imnut, u l-għoti possibbli ta’ dawn is-servizzi mingħajr l-istabbilment ta’ fergħa f’każijiet oħra. Dan jirrifletti l-ħtieġa li jittejjeb il-livell ta’ protezzjoni għal klijenti bl-imnut, li huma indirizzati fil-MiFID proposta partikolarment permezz ta’ (i) deċiżjoni tal-Kummissjoni dwar l-ekwivalenza tal-qafas prudenzjali tal-pajjiż terz; (ii) li l-fergħa tiġi suġġetta għal xi wħud mill-obbligi fil-MiFID; u (iii) li ssir possibbli s-superviżjoni tal-awtorità kompetenti fl-Istat Membru fejn il-fergħa tkun ingħatat l-awtorizzazzjoni (59). Madankollu, il-BĊE jinnota li biex jiġi żgurat li investituri bl-imnut jirċievu effettivament l-istess grad ta’ protezzjoni, l-arranġamenti ta’ kooperazzjoni mal-pajjiż terz għandhom jiżguraw li l-obbligu għal kapital inizjali suffiċjenti jipproteġi effettivament lill-investituri, billi d-ditta tal-pajjiż terz biss, u mhux il-fergħa, hija d-detentur tad-drittijiet u l-obbligi, u fl-aħħar mill-aħħar din hija responsabbli fil-konfront tal-investituri. Barra minn dan, jista’ jkun ta’ dannu għall-investituri jekk il-kwistjonijiet ikollhom jiġu miftiehma skont il-liġi u suġġetti għall-ġurisdizzjoni tal-pajjiż terz.

14.1.

L-ambitu (60) tar-reġim tal-abbuż huwa mwessa’ billi jinkludi swieq ġodda, partikolarment postijiet ġodda ta’ negozju bħal MTFs u OTFs, u billi jiġu koperti strumenti finanzjarji OTC, inklużi d-derivati. Barra minn dan, kull aġir jew tranżazzjonijiet relatati ma’ strument finanzjarju li jaqgħu fl-ambitu tal-MAR propost, huwa kopert, anke jekk dan l-aġir jew it-tranżazzjonijiet iseħħu barra s-suq irregolat, l-MTF jew l-OTF. Il-BĊE jappoġġa l-proposta tal-Kummissjoni biex tespandi l-ambitu tal-qafas tal-abbuż tas-suq, sakemm dan ikattar l-effettività tar-reġim tal-abbuż tas-suq, billi jaddattah għall-innovazzjoni finanzjarja u l-aħħar żviluppi teknoloġiċi.

14.2.

Il-projbizzjonijiet u r-rekwiżiti fil-MAR propost ser japplikaw ukoll għal azzjonijiet imwettqa barra l-Unjoni (61), biex iżommu milli wieħed idur magħhom permezz ta’ ċaqliq ta’ attivitajiet għal barra l-Unjoni. Għal kontroll u sanzjonar effettiv ta’ dawn l-azzjonijiet, il-BĊE jikkunsidra li jkunu essenzjali ftehim ta’ kooperazzjoni ma’ pajjiżi terzi. F’dan ir-rigward, il-BĊE jilqa’ li l-MAR propost jindirizza dan u jistipola wkoll biex l-AETS tikkoordina u tiffaċilita dan il-proċess permezz ta’ mudelli (62). F’dan l-isfond, il-BĊE jirrakkomanda li r-reġim ta’ esklużjoni jiġi estiż għal attivitajiet ta’ ġestjoni ta’ dejn monetarju u pubbliku f’xi każijiet ukoll lil hinn mill-Unjoni.

14.3.

Il-BĊE jilqa’ li l-MAR propost jagħti stampa ta’ każijiet speċifiċi ta’ manipulazzjoni tas-suq (63), billi jirreferi għal tekniki ġodda ta’ negozju bħal ma hu n-neogzju algoritmiku inkluż in-negozju ta’ frekwenza għolja. Kif imsemmi hawn fuq, minkejja li l-prattiċi tan-negozju algoritmiku jistgħu jkollhom skopijiet leġittimi, huma jistgħu joħolqu riskju konsiderevoli, peress li jistgħu jfixklu l-funzjonament normali tas-suq u jżidu l-volatilità,, li mhumiex fl-interess pubbliku. Għalhekk il-BĊE jappoġġa l-monitoraġġ strett ta’ dawn it-tekniki ta’ negozju biex jiġu protetti l-funzjonament bla xkiel tas-suq u l-interess pubbliku.

14.4.

Il-MAR propost (64) jidentifika b’mod impliċitu n-negozju fl-għeluq tas-suq bħala manipulazzjoni tas-suq jew attentat ta’ involviment f‘manipulazzjoni tas-suq. Madankollu, ħafna swieq jaraw volumi ta’ negozju ogħla fit-tmiem u fil-bidu tal-jum tan-negozju, meta l-pożizzjonijiet huma ssetiljati, tiġi pproċessata l-informazzjoni ta’ matul il-lejl jew meta punti speċifiċi tal-aħbarijiet ikunu jistgħu jiġu rilaxxati lis-swieq. F’dan ir-rigward, il-BĊE jirrakkomanda analiżi aktar iddettaljata jew titjib ta’ din id- definizzjoni ta’ manipulazzjoni tas-suq.

16.1.

Il-MAR propost jeżiġi li emittent ta’ strumenti finanzjarji jinforma lill-pubbliku malajr kemm jista’ jkun b’informazzjoni privileġġata li tikkonċerna direttament lill-emittent (69). Fl-istess ħin, il-MAR propost iżomm id-dispożizzjoni tad-Direttiva 2003/6/KE li tippermetti li emittent idewwem l-iżvelar fejn (i) in-nuqqas x’aktarx ma jkunx ser jiżvijja lill-pubbliku, u (ii) tista’ tiġi żgurata l-kunfidenzjalità tal-informazzjoni. Fejn tintuża din il-possibbiltà ta’ pubblikazzjoni imdewwma, l-emittent irid jinforma lill-awtorità kompetenti immedjatament wara l-pubblikazzjoni biex ikun jista’ jsir il-kontroll ex post tal-kundizzjonijiet speċifiċi għad-dewmien (70). Barra minn dan, il-MAR propost jistipula, bħala element ġdid tar-reġim tal-iżvelar, li awtorità kompetenti tista’ tippermetti ex ante d-dewmien tal-pubblikazzjoni mill-emittent fejn (i) l-informazzjoni hija ta’ importanza sistemika, (ii) huwa fl-interess pubbliku li tiddewwem il-pubblikazzjoni tagħha, u (iii) il-kunfidenzjalità tal-informazzjoni tista’ tiġi żgurata (71).

16.2.

Kif intqal f’opinjoni preċedenti (72), il-BĊE jappoġġa aktar titjib tal-qafas legali għall-iżvelar imdewwem skont il-MAR propost. L-interess ġenerali fi żvelar pubbliku bħal dan jista’ jkollu bżonn jiġi bbilanċjat kontra l-bżonn li tinżamm il-kunfidenzjalità mill-anqas għal perjodu limitat, jew fl-interess tal-emittent jew f’dak tal-pubbliku. Id-dewmien tal-iżvelar pubbliku jista’ jseħħ f’żewġ sitwazzjonijiet, jew (i) fl-interess u taħt ir-responsabbiltà tal-emittent innifisu (73), jew (ii) fl-interess pubbliku u wara li jingħata l-permess mill-awtorità kompetenti (74). Il-BĊE jilqa’ din l-eżenzjoni fl-interess pubbliku li hija marbuta mal-kundizzjoni li l-informazzjoni għandha tkun ta’ importanza sistemika, biex b’hekk tħalli li jitqiesu kunsiderazzjonijiet ta’ stabbiltà finanzjarja, billi dawn jistgħu jinqalgħu partikolarment f‘każ ta’ assistenza ta’ likwidita' ta’ emerġenza li jkun irċieva l-emittent.

16.3.

Fil-każ tal-istituzzjonijiet finanzjarji, il-valutazzjoni ta’ jekk l-informazzjoni hijiex ta’ importanza sistemika, u jekk dewmien fl-iżvelar huwiex fl-interess pubbliku, għandha ssir f’kooperazzjoni mill-qrib mal-bank ċentrali nazzjonali u l-awtorità nazzjonali superviżorja, u – jekk differenti mill-bank ċentrali jew is-superviżur – mal-awtorità makro-prudenzjali. Proċeduri xierqa u effiċjenti biex jiżguraw l-involviment f’waqtu ta’ dawn l-awtoritajiet għandhom ikunu stabbiliti fuq livell nazzjonali, sostnuti minn sett ta’ prinċipji fuq livell ta’ Unjoni. Fejn iġġustifikat mill-importanza sistemika u l-interess pubbliku, l-awtorità kompetenti għandha tingħata s-setgħa biex tordna d-dewmien tal-pubblikazzjoni. B’mod partikolari, jista’ jkun meħtieġ li informazzjoni dwar self ta’ banek ċentrali jew faċilitajiet oħrajn ta’ likwidita' mogħtija lil istituzzjoni ta’ kreditu partikolari, inkluża l-assistenza ta’ likwidità ta’ emerġenza, tinżamm kunfidenzjali biex tikkontribwixxi għall-istabbilta' tas-sistema finanzjarja kollha u biex tinżamm il-kunfidenza pubblika fi kriżi (75).

17.1.

Il-BĊE jilqa’ d-dispożizzjonijiet tal-MAD proposta li jiddefinixxu r-regoli minimi għal sanzjonijiet kriminali għar-reati ta’ abbuż tas-suq l-aktar serji. Dawn ir-regoli huma essenzjali biex jiżguraw l-effettività u s-suċċess tal-qafas leġiżlattiv u b’hekk l-implimentazzjoni effettiva tal-politika tal-Unjoni dwar il-ġlieda kontra l-abbuż tas-suq. Barra minn dan, reġimi ta’ sanzjonijiet ugwali, b’saħħithom u deterrenti kontra reati finanzjarji u l-infurzar konsistenti u effettiv tagħhom, huma komponenti kruċjali ta’ stat ta’ dritt, billi jwasslu għall-ħarsien tal-istabbiltà finanzjarja.

17.2.

Il-BĊE jilqa’ l-fatt li l-MAD proposta (76) tindirizza r-responsabbiltà ta’ persuni legali, peress illi r-responsabbiltà fuq livell korporattiv tista’ tistabbilixxi l-inċentivi t-tajba lejn monitoraġġ intern u kontrolli aktar stretti, biex b’hekk jissawru l-governanza korporattiva u d-dixxiplina tas-suq. Madankollu, l-implimentazzjoni b’suċċess ta’ dawn id-dispożizzjonijiet u l-kisba tar-riżultat ta' politika intiż jitolbu kunsiderazzjoni bir-reqqa ta’ speċifikitajiet legali nazzjonali, billi l-kunċett ta’ responsabbiltà kriminali ta’ persuni legali ma jeżistix fl-Istati Membri kollha.