Għażliet tat-Tfixxija
Paġna ewlenija Midja Spjegazzjonijiet Riċerka u Pubblikazzjonijiet Statistika Politika Monetarja L-€uro Ħlasijiet u Swieq Karrieri
Suġġerimenti
Issortja skont
  • STQARRIJA GĦALL-ISTAMPA

Il-falsifikazzjoni tal-karti tal-euro baqgħet baxxa fl-ewwel sitt xhur tal-2018

27 ta’ Lulju 2018

  • 301,000 karta tal-euro falza tneħħew miċ-ċirkolazzjoni fl-ewwel sitt xhur tal-2018
  • Madwar 83% ta' dawk il-karti tal-flus foloz kienu tal-€20 u l-€50
  • Il-karti kollha tal-euro jistgħu jiġu ċċekkjati bil-metodu “ħoss, ħares u mejjel”
  • Il-karti tal-euro jibqgħu mezz ta’ ħlas fdat u sigur

Madwar 301,000 karta tal-euro falza tneħħew miċ-ċirkolazzjoni fit-tieni sitt xhur tal-2018, tnaqqis ta' 17.1% imqabbel mat-tieni sitt xhur tal-2017 u 9.1% inqas mill-ewwel sitt xhur tal-2017. Il-probabbiltà li tirċievi karta tal-flus falza hi tassew żgħira ħafna. L-għadd ta' karti tal-flus foloz jibqa' baxx ħafna meta jitqabbel mal-għadd tal-karti tal-flus fiċ-ċirkolazzjoni, li minn meta ġew introdotti, baqa' dejjem jiżdied, b'rati li huma iżjed minn dik tat-tkabbir tal-PDG. Fl-2017, pereżempju, l-għadd u l-valur ta' karti tal-flus tal-euro fiċ-ċirkolazzjoni żdiedu b'madwar 5.9% u 4.0% rispettivament. Bħalissa hemm ħafna iżjed minn 21 biljun karta tal-euro fiċ-ċirkolazzjoni, b'valur totali ta' iżjed minn €1.1 triljun.

Hawn taħt jidhru ċ-ċifri għal kull sitt xhur:

Perjodu

L-ewwel sitt xhur tal-2015

It-tieni sitt xhur tal-2015

L-ewwel sitt xhur tal-2016

It-tieni sitt xhur tal-2016

L-ewwel sitt xhur tal-2017

It-tieni sitt xhur tal-2017

L-ewwel sitt xhur tal-2018

Għadd ta’ karti tal-flus foloz

454,000

445,000

331,000

353,000

331,000

363,000

301,000

Analiżi skont id-denominazzjoni:

Denominazzjoni

€5

€10

€20

€50

€100

€200

€500

Analiżi perċentwali

1.2%

1.9%

23.8%

59.3%

10.9%

0.8%

2.1%

Matul l-ewwel sitt xhur tal-2018:

  • Il-karti tal-€20 u l-€50 baqgħu l-aktar denominazzjonijiet li ġew iffalsifikati. Flimkien, kienu jgħoddu 83% tat-total ta’ karti tal-flus foloz kollha.
  • il-biċċa l-kbira tal-karti tal-flus foloz (88.8%) instabet fil-pajjiżi taż-żona tal-euro. Madwar 10.3% instabu fi Stati Membri tal-Unjoni Ewropea li mhumiex fiż-żona tal-euro u 0.9% instab f’partijiet oħra tad-dinja.

Iċċekkja l-karti tal-flus tiegħek!

Minn kemm ilha li ħarġet l-ewwel sensiela ta’ karti tal-euro, l-Eurosistema – i.e. il-Bank Ċentrali Ewropew (BĊE) u d-19-il bank ċentrali nazzjonali taż-żona tal-euro – ħeġġet lill-pubbliku joqgħod attent meta jirċievi karti tal-flus. Tista' tiċċekkja l-karti tal-flus tiegħek bil-metodu sempliċi “ħoss, ħares u mejjel” imfisser fit-taqsima “L-€uro” fil-websajt tal-BĊE u l-websajts tal-banek ċentrali nazzjonali. Jekk tirċievi karta tal-flus li tqajjem suspett, għandek tqabbilha ma’ waħda li tkun taf li hi tajba. Jekk tikkonferma s-suspetti tiegħek, jekk jogħġbok ikkuntattja lill-pulizija, jew lill-bank ċentrali ta’ pajjiżek jew lill-bank tiegħek, skont il-prattika nazzjonali. L-Eurosistema tappoġġa lill-aġenziji li jinfurzaw il-liġi fil-ġlieda tagħhom kontra l-falsifikazzjoni.

L-Eurosistema tikkomunika b’diversi modi biex tgħin lin-nies jagħrfu l-karti tal-flus tajbin minn dawk foloz, u biex tgħin lill-kaxxiera professjonali jaċċertaw ruħhom li l-magni li jipproċessaw il-karti tal-flus ikunu kapaċi jidentifikaw b’mod affidabbli l-karti tal-flus foloz u jneħħuhom miċ-ċirkolazzjoni.

L-Eurosistema għandha dmir tissalvagwarda l-integrità tal-karti tal-euro u tkompli ttejjeb it-teknoloġija tal-produzzjoni tal-karti tal-flus. Il-karti tal-flus tas-sensiela Europa huma aktar siguri u jgħinu lill-pubbliku jsaħħaħ il-fiduċja tiegħu fil-munita.

Fl-ewwel sitt xhur tal-2019, l-Eurosistema qed tippjana li toħroġ fl-istess ħin il-karti l-ġodda ta' €100 u €200, li huma l-aħħar żewġ denominazzjonijiet tas-sensiela Europa. L-Eurosistema se tagħmel kampanja ta' informazzjoni biex tgħarraf lill-pubbliku u lill-kaxxiera professjonali dwar l-introduzzjoni ta' dawn il-karti tal-flus ġodda, li t-tnejn għandhom xi karatterisitiċi ta’ sigurtà ġodda. Il-manifatturi tal-apparat li jipproċessa l-karti tal-flus, u fornituri oħra, se jkomplu jsibu l-għajnuna tal-Eurosistema biex jaġġornaw il-magni u t-tagħmir ta’ verifika tagħhom għall-karti tal-flus il-ġodda.

Għal mistoqsijiet min-naħa tal-midja, jekk jogħġbok ikkuntattja lil Esther Tejedor, tel.: +49 69 1344 95596

KUNTATT

Bank Ċentrali Ewropew

Direttorat Ġenerali Komunikazzjoni

Ir-riproduzzjoni hija permessa sakemm jissemma s-sors.

Kuntatti għall-midja